يامصيلحي أين ذهبت بلادي؟؟

عبده القطان

الحوار المتمدن-العدد: 2463 - 2008 / 11 / 12 - 04:28
المحور: كتابات ساخرة
    

مع الاعتذار للكاتب والمخرج الكبير مايكل مور الذي أصدر كتابه الرائع بعنوان "ياصاح اين ذهبت بلادي" منذ سنوات والذي ينتقد فيه السياسه الامريكيه في عهد الرئيس جورج بوش نتقدم أستضفنا عم مصيلحي المصلحجي لنطرح عليه بعض الاسئلة لكي نعرف البلد دي أختفت راحت فين ؟؟؟

عم مصيلحي مرحب بيك معانا في برنامج "قفاك يهمنا" ..
عم مصيلحي يبتسم وهو يضع يده علي قفاه فيما يبدو أنه يتذكر الايام الخوالي في أحد مراكز الشرطه..

عم مصيلحي صحيفك سوابق مليانه أول تهمه موجهه ليك إنك مصري إيه ردك؟؟
ياباشا أنا كنت مصري لغايه ماقالولي إن مصر أتلغت ومعتش باقي منها غير العلم اللي جواه نسر وبيقولوا هيشيلوا النسر ويحطوا حدايه مكانه وخيروني أبقي أهلاوي ولا مباركاوي.

إشمعني حدايه ياعم مصيلحي ؟؟
مستهيألي ياباشا عشان أي مواطن يقول الحكومه هاتي حاجة يقولوه هي الحدايه بترمي كتاكيت ياروح طنط ..

قبل ماتسأل ياباشا .. طبعا مباركاوي !!! دي فيها قواله !!
عشان لو بقيت أهلاوي الاهلي بعديه مين ؟؟ " ياحسام ياطلعت " وبعديهم " يادينا ياسوزان تميم " وتلاقي النادي بقي علي حجر الحكومة... أما مباركاوي بقي فبعديه جملاوي وعلائاوي ومعزاوي وزعبلاوي وربنا يخليلنا قانون تحديد النسل واللولو..

عم مصيلحي بتحب مصر؟؟
أيوة وعهد الله بحبها وفي قلبي فارش حبها ودايما لما الست شيرين بتغني مشربتش من كولديرها بنتع فنطاس الميه علي بوقي بنزله حالف طلاق تلاته ماعاد فيه نقطه ميه...

بالمناسبه هل أنت ليبرالي أم يساري ؟
أنا فيومي ياباشا من مواليد نكسة 4 مايو 1928بقريه الجحش حارة حماده أبو كلبة خريج كليه "خدلك صابونه عند الطابونة" .. قسم " المرارة المفقوعة " ..

هل انت منتمي للجماعه المحظورة الكباودة؟
يابيه والله معرف غير الواد كبوده اللي بيكتب المقاله دي ومقدرش اتكلم عنه انت عارف أي حد معاه قلم اليومين دول ممكن يطلعني زنديق ابن كلب وأستني بقي الافراج الصحي ولا العفو الرئاسي ..

تعرف ايه عن الديمقراطيه ياعم مصيلحي ؟
أعوذ بالله ياباشا تف من بق سعادتك ... مستهيألي ياباشا الديمقراطيه دي جايه من "المقورة" اللي مراتي بتقور بيها الكوسه لما بنعوز نعمل محشي سيادتك يعني كل واحد عاوز يبقي ديمقراطي يعني لا مؤاخذه لازم الحكومه تقورة عشان تبقي الديمقراطيه علي مقاسة ممكن بقي بعصايه أو بالخرارة ...

أكتر كلمه بترددها في حياتك ؟
حاضر ونعم واخترناك ... ولما نفسي توزني اقول حاجة تانيه بروح البيت وأقلب الكرسي وأقعد عليه وأقول أنا مجرم وابن مجرمين ...

تعرف إيه عن الاخوان المسلمين ؟؟
أستني ياباشا اصل انا مذاكرتش دي معلش ادور بس علي الورقه .. فاتوره الكهربا فاتوره الميه منديل كلينكس التلاته جنيه بتوع مكافأه الامتحانات ..أهي ياباشا أسمع بقي ....الإخوان دول هما أس كل البلاوي هما المسئولين عن سفاح الزبادي قصدي المعادي وهما المسئولين عن التهرش الجنسي والكسوف الشمسي والبلح الشامي المضروب اللي بينزل في رمضان ....

مارأيك في أفضل شعار يتبناه الحزب الوطني في انتخاباته المقبله ؟؟
أنا رأيي يستعينوا بدكاتره في علم البلطجه ويقعدوا قعدة عرب يظبطوا الجداول الانتخابية على المصاطب ويخلوا شعارهم السنه دي "اللي يحب النبي يصووووووووووت"..

أفضل نشيد سمعته ؟؟
نشيد مركز شرطه الوايلي "........بوس الواوا ......" دايما بيقولهولي الحلاق الي بيجبهولي قبل ماتعرض ع النيابه عشان يطهرلي الجروح اللي انا طبعا عورتها لنفسي يقولي بوس الواوا أقوله "تعبانه والله تعبانه " يرد عليا يقولي إثبت وإلا "هخاصمك آه" ..

بمناسبة موضوع الشرطه ! إيه رأيك في شعار الشرطه ؟
ياباشا انا احترت والله كان زمان "الشرطه في خدمه الشعب" شلتوا «الشعب» وخليتوها «في خدمة سيادة القانون».. لغيتوا القانون وحطيتوا الشعب علي حجركم وخليتوها « الشرطة والشعب في خدمة الوطن » أنا رأيي تخلوها « لو عندك قضايا هتاخد العصايه»....«ولو عندك واسطة هنأكلك بسطه»..

أفضل كتاب قريته ؟؟
"هنديك حقك " تأليف لواء سابق بأمن الدولة وسلسله مغامرات "تان تان" والاتنين سلاسل من القصص الخياليه.. تصدر عن دار نشر سوق البهاله ....

أكتر لاعب بتحبه ؟؟
بحب طارق السعيد وطارق يحيي وأبو طارق بتاع الكشري اللي في التحرير عشان كلهم اولاد الحاج طوارئ الله يعمر بيت أمه وأسمع سلام حاير طاير لقانون الطوارئ تلاتات تلاتات من جمصه لحد الشلالات ..

مين في رأيك مسئول ياعم مصيلحي عن زياده الاسعار ؟
إحنا طبعا ياباشا الشعب عشان إحنا شعب حاقد وجبرووووت والحرق فينا حلال ... ده الواد "النجومية" جاري من جبروتة طالعله مناخير تحت بقه ياباشا أيوة الله وكيل مابكدب عليك ... ده ظلمنا ياأخي وصل للملايكه ! يعني كل الناس في العالم وهي نايمه بتاكل رز بلبن مع الملايكه الا المصريين بيضربوا فول وطرشي مع الابالسة !

حته بقي كدا إذاعه وتلافازيون بتتفرج علي التلفزيون ياعم مصيلحي ؟؟
لا ياباشا عشان كلهم بقوا كدابين ! عندك مثلا الاعلان بتاع "شغاااااااال يونيفرسال" دي زتونة كدب بقي يبقي ابن مين يونفيرسال ده اللي شغال وبقيت الشباب اللي في مصر ضيوف في برنامج خمسه "صياعة" وكل واحد يطلعلك في البرنامج عامل شبه العرسه الحامل اللي مستنيه موسم الهجره ده كلام!

عم مصيلحي نصيحه لجمهورك اللي بيحبك ؟؟
أنصح كل من عنده دم في هذا البلد للتزود هذه الايام من الجاز كمخزون أستراتيجي في حاله لو حب يشوف نفسه منور من غير مايشغل العداد ولغايه مايحين وقت الولعه انصحهم بعرنوس بانجو قبل الأكل وبعد الأكل لزوم التوهان وهتبقي أجمد من الضفدع الدكر في موسم التزاوج ..

واضح ان حلولك ذكية ياعم مصيلحي عشان كدا هسألك سؤال ذكاء ...
"أستيقظت ذات يوم فوجدت نفسك في غرفه مظلمه وبها مراية " كيف تعرف بالتحديد مكانك باستخدام المراية؟
أجري ع المرايه وابص فيها لو وشي معلم أو قفايا أحمر يبقي أنا في مركز شرطه لوغير كدا يبقي عرانيس البانجو خلصت ودخلنا ع الجاز ومشرف في قبر معمول بسيراميك الجوهرة من أبو مرايات ...

في النهايه عاوزينك تهدي أغنيه بتحبها لمشاهدينا الكرام ؟؟
"اللي ضحي لأجل وطنه لأجل ما يعبي الفشار" للاستاذ عمرو كباب ..طراخ ...اه هفتكر ياباشا ...عمرو هباب ... اه اه لا بلاش هنا بلاش هنا هههههه أووووووووه ... عمرو دولاب .... هنا يصيح الديك وينتهي الكلام صورة يد تتحرك ببطئ لتنهار علي قفا عم مصيلحي وينزل الستار وهو يحمل شعار
."دياب هو الحل".

#عبده_القطان (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات