قصيدة عامية مصرية(مش ناوى ترجع مالسفر )الشاعر ايمن خميس بطيخ.مصر.


عبدالرؤوف بطيخ
2025 / 5 / 6 - 02:24     

كفاياك سنين غربة عليك قلبى انفطر
أمانة عليك ما تتعبنا دا احنا الشوق ليك مدوبنا
دا اليوم فى بعدك صعب ومر
والفرح فاتنا وتاه مننا وسابنا وفر.
فكر فينا يوم وخلينا يوم ع البال
محتاجينك انت ملعون أبوه المال
اللى فرق قلوب عن بعضها
وغرب أب عن أم العيال.
عيال تنادى بابا فاتنا مالصغر
ودلوقتى بقينا عرايس
وبقينا زينة الشباب
مش نقصنا غيرك انت جنبنا
حضنك الدافئ يضمنا بابا اعز الاحباب.
ولا حد غيرنا عوضك عنا
فى الغربة خلاك تنسانا
وتبعد سنين عنا ويضيع معاك العمر
مش ناوى ترجع مالسفر كفاياك غربة عليك قلبى انفطر
انت هناك واحنا هنا عارفين ليل الغربة قاسى
بس كمان البعد ليله اطول عندنا
لمتنا مش كامله ناقصنا انت فى حضننا
غيابك طال عننا وبنحلم برجوعك هنا
رجوع يداوى جراحنا وكسرة قلبنا
مالناش غيرك فى الدنياوالعالم ربنا
خلاص زهقنا وملينا بعدك عننا
ارجع مالناش فى الدنيا دى بعدك
ملينا من الغربة ملينا سنين السفر
مش ناوى ترجع مالسفر كفاياك
سنين غربة عليك قلبي انفطر.
6مايو2025.