سلّمولي عالوزارة (شعر زجلي شعبي لبناني)

سلمولي عالوزارة
عالمباحث، عالنظارة
فكرت عايش بدولة
طلعت الدولة السفارة

والـ"شيا"* هيي الرئاسة
وهي البتقود السياسة
وما بقي غير الكراسي
ناطقة باسم الإمارة

الصولجان بإيد عوكر*
والأوامر عالمسوكر
والنهر لما تعوكر
طلعت براس الحيارى

سلمولي عالصرامة
وعللي عم يفرض غرامة
وصاحب البنك الحرامي
وعا زعامات الدعارة

وعللي باعوا الدار مرة
ومرتين لألف شرًى
وهٖي تجارة قال حرة
متل ما ايا تجارة

سلمولي عالدولار
الصار لو منو ما صار
يا حرامي يا حمار
السلّمو زمام الإدارة

جرموا رياض السلامة**
وحملوه كل الملامة
وبرأوا اهل الزعامة
من سياسات الحقارة

سلمولي عالمازوت
وع الإنارة بالبيوت
شي بيضهر شي بيفوت
وقال تهريبو شطارة

بلادنا ام الحزينة
هلكتا ألحرب الهجينة
مفكرة والعقل زينة
ولادها عليها غيارى

بس لبنان السيادة
قال عقوني ولادي
و"لا حياة لمن تنادي"
وبالقلب غصة ومرارة

وين ارضك يا مقاوم
يللي ع سلاحك مداوم
دخل عرضك ما تساوم
عالقضية بعقر دارا

عالنتن ياهو اليانكي
متكل لتصير عركة
عا ارض لبنان بركي
بيربحوا بعد الخسارة
ك٢ ٢٠٢٣

* شيا هي السفيرة الأميركية في لبنان ومقر السفارة في منطقة عوكر في المتن الشمالي إلى الشمال من بيروت
** رياض سلامة حاكم مصرف لبنان (البنك المركزي)