ليَللي بعتتلي صورتها

تسلملي صاحبة الصـورة
الصارت بخيالي محفورة
حبيتا، حبيت عيــــــــونا
وشعرا وخدودا ومنخورا
وشفافا... تسلملي شفافا
وشو مخبا تحت التنورة
إحساسي اني عاشـــقها
من قبل نشوء المعمورة
غمرتني بسحرا وأسرتني
بفتونا وبهرتني بنــورا
قلبي تحوّل طفل زغيّر
عاشق بنّوتة زغيّورة
خوفي عبّرلا عن حبي
وترفّ جناحا الفرفورة
وتقللي تروّى يــا قلبي
بيني وبينك سبع صفورة
يا جايي من جيل الخبز
وبدك تتحلّى بقمّورة...
وتتركني، تلوّحلي بإيدا
وما يبقالي إلا الصورة
...
يا سنين العمر الما بتشفق
وبتركض متل المسعورة
صيّرتي مشاعرنا اصدق
من صفحة بخاتم ممهورة
كل شي بيشيخ بهالدنيي
إلا مشاعرنا المــستورة
بتتغذى من نبع الحـــب
وعا حبا نفسي مفطورة
ولولا الحب العايش فينا
ولو ما شفنا إلا شرورا
لا هوينا حلوات الأرض
ولا حلمنا بالجنة وحورا
...
حوّا هيّي كل الأمـــــــر
وهيي بهالبحر الشختورة
بتبحر فينا طول العمـر
وبتضْوي ليالينا بدُورا
وهيي الشمس البتدفينا
وهيي الوردة والمنتورة
وهيي المال وراس المال
وهيي الحَلّة والحزّورة
البيحبا بيعيش بجنّــــة
والما حبّا أرضو بورة
@@@
م.ي.