نص جديد - بين زرياب ولوركا

كان مجنون ،، يكفيك شرغضبة الجمل ،
مكنش يخاف مخلوق على وجه البسيطه ،
كان يسأل والناس تتغاظ ،
كان دمه حامى يكره الكلام البارد ،
كان يحب الفقارى مسميهم بَدَنَه ،
مكنش قريبى مليش عنده عَشَم ،
كان مولود للموت ،
جايبه الريح وهياخده معاه لما يروح ،
أول حبل العمر فى عنقُه وآخره هنااااك ،
محدش يعلم ، كان اسطورة ،
أى والله كان غريب ،
يلف الموالد يبات مع الخدمة زى لوركـا ،
يرجع يحسب عدد ليالى الحضرة مايحكيش ،
كان عايش وسطينا بيحلم بالجنة ،
كان يحب زرياب ورقص الغجر ،
كان يتباهى بالخواتم العقيق والجعران ،
كان وكان وكان ...
لما مات كان تحت مخدتَه ،
مصحف وعُقد ياسمين وعود نعناع ،
وحق قماش الكفن موفور !!
..