عايش تايه فى الملكوت

عالم هايصة
وعالم لايصة
وعالم تجرى ورا الأوهام
حلم يضيع
ورا حلم يضيع
وصراع دايم مع الأيام
اللى يقف حجر فى طريقك
واللى ف عز الأزمة يسيبك
واللى يبيعك
واللى يخونك
ويخون عيشك ويخون ملحك
واللى تملى ناكر لجميلك
واللى يقولك حافضل جنبك
ضهرك سندك مهما حصلك
ووقت الجد تلاقيه مش عارفك
واللى يكون من دمك
ويبقى تملى سبب همك
نفسى أقابل حد بجد
يبقى معايا فى كل حياتى
ع الحلوة والمرة بجد
الحلوة نعيشها ونفرح بيها
وف المرة يبقى أول إيد تتمد
بس باينى حاقضى حياتى
عايش تايه فى الملكوت
وكأنى بادور
على إبرة فى كوم قش
أو رابع المستحيلات
ويخلص عمرى
ويضيع بدرى
قبل ما أقابل هذا الحد