وعد السكرانة

-----
كان في سَكرة بالحارة
عزمتني عليها الجارة
وهيي وعم تشرب بيرة
وقعت بالبيرة فــــارة
***
صرخت: "شيلوني، يا ناس
عم بغرق، عندي إحساس:
موتة بين مخالب قـــــط
ولا أغرق بيكعب الكاس"
***
بيندَه قط من الشبـــــاك
"وينَك، يا حبّي؟ شو باك؟
ما تخافي، بشيلك! ما عليش
لو صرتِ بتمي بفتاك؟؟"
***
"محلى الموتة بين ايديك
خلصني أنت وما عليك
مُوت وعم بتنشق حبّ
مش أحسن ما أفطس هيك؟!"
***
مسكا القط بضافيرو
وقرّبها ع منـــاخيرو
لشلش من سكر البيرة
وفلتت منو ومن زيرو
***
هيي وعم تهرب، عن بُعد
قلا: "وينِك، وين الوعد
أنك رح بتكوني لي
أكلة مش شايفها بَعد؟"
***
قالت: "لا، مش قدرانـة
كَنّي وعدتك سكرانـة"
بعمرك ما تصدق حوّا
إنّــا بحبك ولهــــــانة
***
يا متيّم قلبك بالحـــــب
بيع الحب وقوّي القلب
علّي الراس وخلي الكاس
يبوس الكاس وكفّي الشرب