محمد فرج على يكتب: خلى بالك من نفسك

ضعنا وضاعت ليالينا الجميلة
والحزن نسج خيوطه
على وشوشنا
وعلى قلوبنا
وعلى كل ملامحنا
وبقينا فى محنة
ولا حاجه بتفرحنا
مش عارف ليه
بعدتى ليه
وانتى اللى فى الأول
عاهدتى ع الوفا
وإن احنا نوصل سوا لبر الأمان
ونحارب الدنيا كلها
ونحارب الزمان
ما يهمناش من حد
لو حتى فاق الحد
كانت كلمتنا واحدة
كانت ضحكتنا واحدة
كانت لقمتنا واحدة
بس بنشبع لما نأكلها
لوحدينا
يا غرامى وحبى وأحلامى
تهتى فين ويا الأيام
ولا عدش بيجمعنا مكان
ولا حتى صدفة بنتقابل
من غيرك راحت كل المعانى
من غيرك راحت كل الأمانى
مين غيرك هيضمنى فى عينيه
ويسهر ليلة يفكر فيا
مين غيرك تانى
هيخاف عليا
مين غيرك بعد اللقا
وقبل الوداع
هيمسك إيديا
ويضمنى بعينيه
ويقولى أمانة عليك ما تنسانى
وترجع ليا من تانى
مين غيرك هيقولى
أحلى كلمه على لسانك
قولتيها بصدق من جواكى
بنبض قلبك والوريد
خلى بالك من نفسك