هرتلة مناسبة للأحوال

غزل لأهل القمة
(مهداة لقمة بيروت..
ولكل قمة عربية!)
وحشتني القمة العربية
وكلامها الحلو الكداب
وعيونها المايصة العسلية
وقرار الشجب الخلاب
وإيديها النونو بتتعفرت
وتدق جميع الأبواب
والصوت السيكا بيغرد
ويلقح ...لكن بحساب
وادي يا بني فرق التربية
وادي قمة ما يغلبها غلاب
حبيتها علشان رقتها
حبوها معايا يا أحباب
القمة المزة العربية
وفحولها شجر اللبلاب!

وحشتني النخوة الشربتلي
والكرافتات الممضية
والشعر المصبوغ والغنجة
واللغوة والديبلوماسية
وبيان الفتحة والقفلة
ولا الأحاديث الجانبية
يا اخواتي عليها اما تهدد
وتحدف قطن وحنية
وتخاصم ...لكن من برة
ما كفاية السحنة الملوية
أهي دي اللي تعيش يا بلدنا
شارية ومكسوفة وعشرية
ما هي بنت ذوات مصروف فيها
قوت الملايين الفقرية!

وحشتني خلاص انا مش قادر
ودوني يا عالم بيروت
أتملي من البشرة الناعمة
وأملس ع الخد التوت
وافديها بروحي من الحاقد
واديلة خمسين نبوت
قال يعني مش عاجبه صفارها
علي ايه بتلوم الكتكوت؟!
يجرحها عشان متربية
باصة في الأرض مفيش صوت؟؟
الله لا يسامحك يا جاحدها
يا مبجح فيها يا سفروت
وتعيش القمة العربية
لو حتي العربية تموت !!!!
----------------------------------

وسع وسع للننوس
وسع وسع للننوس
سيبه يعدي سيبه يدوس

الننوس ابن الننانيس
ايش جابه ليكو يا نسانيس؟
مولود علشان ياكل حظك..
وده من حظك يا موكوس!
وسع وسع للننوس
سيبه يعدي سيبه يدوس

ابن الوز أكيد عوام
مش زي عيالنا الأغنام!
ملك مدبر.. ليه تتكبر؟
ترفص مين يا بن المرفوص؟
وسع وسع للننوس
سيبه يعدي سيبه يدوس

متربي على الغالي.. حسيس
أصل وفصل وكله فلوس
وحتاخده يا غالي لو شربة..
لو مش حقنة.. يبقى لبوس!!
وسع وسع للننوس
سيبه يعدي سيبه يدوس