قدري جميل يختار موسكو

يعني أنا ما بعرف من وين بدو يلاقيها هالشعب السوري المسكين، كيف بدو يكمل بهالظروف الصعبة .

قدري جميل طلع كمان راح على موسكو (( انشقاقاً ))

بس هاد عاللس والهس، بدون شوشرة إعلامية .

بيقولو أنو طلع بقرشين حلوين من صفقة مازوت تعاقد عليها مع الروس لصالح الدولة السورية، مبلغ 20 مليون دولار بسيط جداً للخدمات الجليلة اللي عم يقدمها ألنا بكل لحظة ..

وشو عليه الشعب السوري اليوم ببحبوحة، وعايش على ريش نعام ..

يعني زعيم معارضة متلو و اقتصادي فذ، ومسؤول كبير .. لازم تطلعلو جائزة نهاية خدمة، صحي أنها اندفعت من عمولة صفقة مازوت، بس كلو هاد حكي فاضي، المهم قبضهن وصاروا بحسابو واطمنا عليه أنو ما رح ينذل وقت قرر يطلع عالمعاش !!

وبحب هديلكن من روعكن ... هو وعيلتو صاروا بموسكو .. هونيك هو مأسس وأخواتو شغل من زمان، ومشاركين رجال أعمال كبار من الروس (( المافويين )) وتجارتهن ماشية متل العسل، وهالـ 20 مليون دولار دوبهن يكفو مصاريفو الكتيرة، يعني ممكن بعد فترة نعملو لمة فجهزوا حالكن لعمل الخير .

فالرجال كريم وسخي، ولو حدا منكن دق بابو (( مو بالشام لأنو هون ما رح يلاقيه )) يعني بموسكو، رح يفتحلو ويساعدو، ويمكن يعطيه من حر مالو ..

الحقيقة نحنا فرحنالو كتير، قال هونيك حابب يتابع عروض الباليه وآخر نشاطات البولشوي، يستمتع بالموسيقى ويقرا أحلى الكتب .. ويلتفت لعيلتو طول فترة الشتوية اللي بلشت هونيك، يعني بتعرفوا هو ضحى كتير لأنو اختار بلد باردة وهو بيشكي من وجع المفاصل ..

وهاد كلو لمين
ألكن طبعاً يا جاحدين ..
ولتحيا المعارضة الوطنية تاعين النظام .

قادمون