إعزلوا.. محمد شفيق مبارك

خرج الشعب في يناير عشان العدالة الاجتماعية والحرية.. خرج عشان لقمة العيش المغموسة بالكرامة.. وعشان تعليم مجاني وعلاج آدمي.. وعدم المهانة والذل أمام السادة الضباط.. وعشان صوته يحترم في صندوق الانتخابات.. لكن النظام القديم عايز يرجع تاني ومرشحه محمد شفيق مبارك بيستعد عشان يغتصب السلطة وعشان كده الكل لازم يقف ضد أحمد شفيق لحد ما يخرج من سباق الانتخابات لأنه:

- ابن النظام الفاسد والظالم اللي خرج قتلة الثوار براءة، وطبعا أول شي هيعمله هيطلع مبارك وولاده من السجن
- بطل موقعة الجمل ال إتقتل فيها اخوتنا.. فاكرين الشهداء يا شعب مصر؟
- لأنه ابن المجلس العسكري ال حول نهارنا لسواد بالبلطجية وغياب الأمن وأزمات السولار ومذابح ماسبيرو ومحمد محمود وبورسعيد
- لأنه حمي الفساد والمفسدين لما كان رئيساً للمطار
- لأنه بيحابي كبار رجال اعمال جمال مبارك الفاسدين اللي نهبوا أموال الشعب
- لأنه حبيب الصهاينة ال بيدافعوا عنه

ولأننا بنحب بلدنا وعاوزين أوضاعنا تتحسن ودماء الشهداء ماتروحش هدر لازم منسمحش إن العجلة ترجع للخلف لازم نقاتل عشان عزل شفيق ونعمل انتخابات جديدة.. وده طبعا محتاج ان احنا نقف كلنا مع بعض ايد واحدة.. زي زمان.

يا شعب مصر إحمي ثورتك ..وتعالي معانا نقف كلنا امام المحكمة الدستورية العليا على كورنيش المعادي يوم الخميس 14 يونيه الساعة العاشرة صباحاً...

حركة الاشتراكيين الثوريين
12 يونيو 2012