حلاق بيروتي .. ليك يا عمي بدنا دولة وبس ..!!

بعد الترحيب على طريقة اهل بيروت المليئة بالعزة والفخار مع دماثة الاخلاق وطيب المعشر وكرم الضيافة يستقبلك أبو اسامة الذي كان مقاتلا في صفوف حركة فتح ودافع عن فلسطين على متاريس بيروت ويبادرك بمجرد الجلوس على كرسى الحلاقة وهو يلف جسمك بالفوطة الخضراء قائلا " هالشباب ما الهم حكي الا عن الانتخابات، كأنه النائب يلي رح ينجح رح يعملهم شيء، ليك يا خيي راحوا ما يدقوا ببعضهن وشوية بيقوسوا بعض لو معهم سلاح".
ويتابع ابو اسامة " ليك يا عمي احن اشو بدنا ..؟ احنا بدنا دولة وبس .. ما بدنا شيء .. بدنا دولة وحدة ما بدنا عشرين دولة .. كل عشر رجال عاملين لي دولة وحكومة واجهزة امن واستخبارات ووزارات اعلام وقناة فضائية وجميعات هاي نسائية وهاي شبيبة وهاي طلاب وهاي ما بعرف شو .. لشو كل هالحكي شو فايدته .. وكله على حساب هالوطن المسكين والمواطن الغلبان .." .
ليك استاذ ابراهيم ابو محمد جارنا هيو هوني جنبنا ساكن سالته مبارح مين بدك تنتخب ..؟ قال بدي انتخب اوباما .. سالته ليش اوباما ..؟؟ قال لانه هو اللي يمكن يوحد لبنان .. قلت له كيف يا ابو محمد .. هلأ اوباما بدو يوحد لبنان ..؟؟ قال ايه بدو يوحد لبنان .. قلت ولك والله جننتني يا زلمة اوباما بدو يدمر لبنان ويسلمها لاسرائيل .. قال له له يا زلمة اللي بدهن يسلموها لاسرائيل حلفاء ايران بدهم يضحوا بلبنان عشان يحموا ايران وصواريخهم ناطرة تدك تل ابيب اذا اسرائيل رمت صاروخ على ايران ..
مين قال هالحكي اكيد مجنون يلي بيقول هالحكي
شو انتا مش بالبلد انزل على الضاحية واسمع شو عم بيتقال .. والله زي ما بحكي لك ..
قلت يا ابو اسامة اكيد هاد كلام الناس العامة بالشوارع لانه حزب الله ما بيقول هيك في خطابات السيد
قال ابو اسامة .. انا متلك ما سمعت لكن ابو محمد ما بيكزب اكيد سامع متل هيك حكي ..
قلت ما علينا انتا شو رايك مين بينجح بالانتخابات في سبعة بالشهر ..؟؟
قال والله ا نجيت علي انا بتمنى كلهم يسقطوا .. لأنه ولا واحد منهن بيمثل لبنان .. كل واحد بيحرث على طائفته ليوصل للحكم .. كل همهن الكرسي ما حدن همه لبنان ولا حدن سائل بهالشعب الغلبان .. يا ابن الحلال في ناس والله ما بتقدر تتعشى ولا بتقدر تجيب لابنها بنطلون جديد ولا حتى بتقدر تتحكم لو مرضت .. شو بتقولي الله لا ينجح ولا واحد منهن.
بعدين بالله دخيلك هي الامور مش مبينة يعني معروف مين رح ينجح بالجبل ومين رح ينجح بالشوف ومين رح ينجح بالجنوب وبيروت .. النتائج معروفه خيي .. كل جماعة عارفة وزنها وتقلها فين .. هي المعركة بس على اربعة او خمس كراسي .. لكن لو جيت للحقيقة ليش ابن الجنوب رح ينتخب حزب الله .. لا تفكر لانه مقتنع بان حزب الله هو الاحسن .. لكن لانه ما بيقدر الا يكون مع ابن طائفته مهما كان .. انت بتعرف انه ابن الجنوب حاله اسواء مليون مرة من حال ابن بيروت لكن بيكابر وبيخبي وما بيشكي عشان ما يشمت فيه ابن الطائفة السنية او المارونية او غيرها من الطوائف وهيك الحالة مع ابن الطائفة السنية .. لكن بصراحة عفارم عليهن زعماء الاحزاب قدروا يخلوا الناس ينسوا الجوع والمرض والفقر والهوهم بالمعركة الانتخابية وخلوهم زي الجيش اللي واقف على الحدود كل واحد مستنفر الله وكيلك ضد التاني مش لشيئ انتبه بس لانه مش من طائفته ..
قلت : يعني باين انه لا تأمل اي شيء ايجابي من الانتخابات..؟
قال : يا ريت اطلع غلطان .. طيب اذا انا غلطان طيب الناس كلها غلطانة .. اسال بطريقك اي واحد .. قل له شو بتتأمل من الانتخابات .. شوف شو بيقول لك ..
قلت : لكن المفروض ان تجري انتخابات لانه من خلالها الناس بتعبر عن رايها وتختار من يمثلها ..
قال ابو اسامة : انا معك وبوافقك لو كان كل لبناني بيقدر يرشح حاله للانتحابات .. يا عمي اذا ما كان هنيك حزب ساندك او معاك مصاري اكثر من خزنة قارون ما بتقدر تنزل انتخابات .. حتى لولا حاجتهم للناس كان بيمنعوهم من التصويت .. لو كان بخاطرهن كانوا شكلوا لجنة من بينهم واختاروا نواب من بينهم .. لكن ديكور المصلحة بتطلب رنة وزفة..
قلت : يعني لن تدلي بصوتك يوم الاقتراع ..؟
قال : اكيد ما رح صوت لحدن .. انا بصوت هون بدكاني وعلى الرصيف هون قبال الدكان بقول يا عالم نحنا بدنا دولة موحدة .. ما بدنا جمهوية الدول اللبنانية .. خلصونا بقا والله بدنا دولة فيها رئيس له كلمة ورئيس وزراء مش مشغول بالصراع مع الاحزاب .. ووزير داخلية لبناني لبناني مهموم بهموم الناس يقدر يمنع الجريمة يلي صارت اكثر من ساوباولو .. (عاصمة البرازيل التجارية) وبدنا وزير مالية ما يزيد الدين على البلد .. وبدنا وزير تجارة يحرق عرضه ما يزيد كل شوية الجمارك .. وبدنا وزير تعليم يعلم اولادنا الولاء للوطن مش للحزب والجماعة والطائفة ..
خيي بدنا وزير ثقافة يثقفنا بثقافة التعايش والمحبة واحترام بعضنا البعض .. لك ثقافتنا بتقول ان كلنا جواسيس حزب الله يتهم غيره بانهم عملاء وخونة لاميركا وجماعة 14 اذار بتهموا حزب الله بانه عميل وجاسوس لايران وهيدا بتهم هيدا بانه عميل لسوريا والتاني للسعودية والتالت لاسرائيل .. كلنا جواسيس وعملاء .. معقول هيك ..؟ كل اللبنانية جواسيس.
ابو اسامة مجروح .. ابو اسامة ربما يكون ضميرا غائبا لملايين اللبنانيين .. وربما يكون يائسا .. وربما يكون متشائما .. وربما يكون ناقما .. وربما يكون غير مسيسا ولا يدري بما يطبخه السياسيين .. لكن اقسم انني اعرف ابو اسامة رجلا لبنانيا وطنيا اصيلا مذ كان في التاسعة عشر من عمره ..
لهذا نقلت مشاعره بلهجته البيروتية التي احبها ما استطعت علني اتمكن من ايصال دعوته الى كل اللبنانيين .. بدنا دولة لبنانية واحدة .. ما بدنا جمعهورية الدول اللبنانية .. فصوتوا ايها اللبنانيين للبنان الموحد لبنان الدولة لبنان الديمقراطية لبنان العلم والحرية والحضارة ..
وشكرا جزيلا يا ابو اسامة