ذبان يابلادي ذبان .. فتقيات زجلية

ــــ ذبان يا بلادي ذبان ..
ـــــــــــــــــــــــــــــــــــــــــــــ فتقية زجلية 27




أنا ما حبيت قصايد
وما تمنيت نكون شاعر
غير وعد الزمان
ولحزان
وشلا حماق
فاق ف راسي وعاق
وسال ع لوراق ..
...
...
...
واه ياراسي لو عقتي مزيان
كن تبعتي طريق لولايم
ولبهايم ..
وتكجكجتي ذبان
على زبالة لوطان
وربيتي بزة وجناح
وقلتي : يانافخ لبزاز
انفخ وزيد ف شحمة المعلوف
منفوخ ومكروش وكاينة ظروف
وراه كاينة ظروف
لقصايد ماتبرد الجوف ..
...
...
لبلاد خصها قرد بقرونو
سايك الرونو
وحافظ مسنونو
وتابعو تابع
ناصب ورافع
نعجة وخروف
واحلام حلوف
وراه كاينة ظروف
كاينة ظروف ..
كاينة ظروف
....
....


ــــ محمد نور الدين بن خديجة
31 غشت 2013 مراكش المغرب