أصوات مكتومة فى سجن طرة تحقيق - 2

مايكل نبيل سند

الحوار المتمدن-العدد: 3625 - 2012 / 2 / 1 - 10:53
المحور: أوراق كتبت في وعن السجن
    

ملحوظة: تم كتابة المقالة أثناء حبس مايكل نبيل فى سجن طرة تحقيق

- إلى تميم البرغوثى
تعلمت من أحمد لطفى السيد أن الاختلاق فى الرأى لا تفسد للود قضية… وتعلمت من ڤولتير أن الإنسان الحر قد يختلف معك فى الرأى، لكنه مستعد دوماً لأن يموت دفاعاً عن حريتك فى التعبير عن رأيك… وتعلمت من الشعب الإسرائيلى كيف يمكن لشعب بذكاؤه أن يفعل المستحيل… وتعلمت من الشعب الفلسطينى كيف يمكن لشعب أن يخسر حقوقه بإصراره على العنف… بعيداً عن الاتهامات بالصهيوينة أو معاداة السامية، هذا هو باختصار الفرق بينى وبينك. 2012/1/18

- الإخوان وازدراء الأديان
واضح ان السنين الجاية، وفى ظل هيمنة التيار الإسلامى على البرلمان، واضح ان هيكون فيه عشران أو مئات أو آلاف سجناء الرأى بتهمة ازدراء الأديان، بالظبط زى ما فيه مئات سجناء الرأى دلوقتى بتهمة إهانة المؤسسة العسكرية… وأعتقد ان مقدمات دة بانت بعد الحكم على أيمن منصور بالسجن 3 سنوات، وبعد محاكمة ساويرس والطالب بتاع أسيوط، وبعد محاولة عمل قضية ازدراء أديان ليا… ياريت نبتدى نعمل حساب للوضع دة من دلوقتى. 2012/1/18

- مش بكتب
بقالى أكتر من شهر مكتبتش غير القصاقيص… حاسس باكتئاب ومليش نفس أكتب أى حاجة… مش قادر أتخلص من شعور ان القوى السياسية والحقوقية تخاذلت عن الوقوف جنبى لأسباب عنصرية. أصدقائى بيقولولى ان دة اتغير دلوقتى، بس أنا مش قادر أصدق أو أحس بدة. 2012/1/19

- ابتزاز ثورى
أصدقائى بينصحونى كتير منشرش أى حاجة عن الأديان أو إسرائيل علشان مخسرش التعاطف معايا من المواطنين المصريين… أنا حاسس ان دة ابتزاز، يعنى يا إما أسكت وأضحى بحريتى فى التعبير عن آرائى ومعتقداتى، يا إما أتباع وأتسلم للجيش والمستبدين أكتر… لكن للأسف، لو كان عندى استعداد انى أتنازل عن آرائى علشان مستمرش جوا السجن، كان زمانى عملت كدة مع الجيش زمان ومتسجنتش أصلاً… هفضل أكتب زى ما أنا عايز، واللى هيتضامن معايا فدة حد بيكشف عن سمو أخلاقه ونقاء معدنه، واللى مش عايز يتضامن هو عارف ان الدور جاى عليه لأن المستبد مبيشبعش من القمع… أنا معرفش أكون غير نفسى. 2012/1/19

- بطولة العالم فى السودوكو
لما جيت هنا سجن طرة تحقيق، واحد من المساجين علمنى إزاى أحل السودوكو، ومن ساعتها وأنا عمال ألعب سودوكو لدرجة انى قربت أحترف وأدخل تصفيات بطولة العالم فى السودوكو… أد ايه سخيف ان دولة بحجم مصر تقمع مثقف محترم زيى، وتخليه فاضى ومملول ومنفصل عن الحياة، لدرجة انه بدل ما يستغل وقته فى حاجة تفيد البلد والبشرية، قاعد يلعب سودوكو ‎:(‎‏ 2012/1/20

- ثوار فى سجن طرة تحقيق
فيه ثوار كتير فى سجن طرة تحقيق، للأسف أنا معرفش حد فيهم غير أحمد ابو دومة، لأن معظمهم دخل السياسة بعد ما اتسجنت فملحقتش أعرفهم… لكن إدارة السجن مظبطة الأوضاع بحيث اننا منشوفش بعض ومنحتكش ببعض خالص… حتى فى الحبس مش مسموحلنا نقرب من أى حد بيفكر زينا، كأن الهدف ان كل واحد فينا ينسى الحياة اللى كان عايشها قبل السجن… لكن تفتكروا هينجحوا؟ 2012/1/20

- الرايخ الرابع
بيقولوا ان اللى خلّف ماماتش، علشان كدة أحب أقولكم ان هتلر مامتش لأن ليه أبناء كتير بيشيلوا أفكاره… واللى خايف ان الألمان يعملوا الرايخ الرابع، أحب أقوله ان الرايخ الرابع هيكون برا أوروپا، وهيكون اسمه ”الخلافة الإسلامية“. 2012/1/21

- هل يشرق أخيراً فجر الحرية؟
سمعت من دقايق فى التليڤزيون خبر إصدار المشير محمد حسين طنطاوى قرار بالعفو عنى فى القضية العسكرية المقامة ضدى… مذهول ومش قادر أصدق. هل معاناتى هنا هتنتهى؟ ولا دى لعبة جديدة بيلعبوها؟ مش هصدق إلا لما أبقى وسط أصحابى اللى بحبهم وبثق فيهم. 2012/1/21

- عفو ايه اللى انت جاى تقول عليه؟
عفو ايه يا مشين؟ هو أنا ارتكبت جريمة أصلاً علشان تعفو عنى؟ ولا أنا كنت طلبت عفوك أصلاً؟ حقى هو إسقاط كل التهم والقضية المقامة ضدى، وتبرئتى من الاتهامات الملفقة ضدى، وتعويضى عن معاناتى ظلماً على يد المجلس العسكرى، ومعاقبة كل اللى ارتكبوا جرايم وانتهاكات فى حقى. 2012/1/22

- أحمد الطيب
قبل ما أتسجن، كنت كتبت مقال عن البابا شنودة ودعمه للحكام المستبدين، ونشرت مستندات تفضح تملقه لمبارك وللمجلس العسكرى… أعتقد ان فيه حد المطلوب منه انه يعمل نفس الشىء مع الشيخ أحمد الطيب، شيخ الأزهر، العضو سابقاً فى الحزب الوطنى، واللى حرّم المظاهرات فى بداية الثورة، واللى بيلعب دلوقتى أقذر دور فى دعم المجلس العسكرى والإخوان. 2012/1/22

- مش هدفع الغرامة
أخويا بلغنى الأسبوع اللى فات ان ظابط الجيش قاله ان اسمى موجود فى عفو 25 يناير، لكنى مش هخرج إلا لما أدفع الغرامة اللى حكم عليا بيها القاضى العسكرى بالإضافة للسجن… قلتله ان موقفى مش هيتغير وانى لازلت مصمم انى مدفعش الغرامة لأنى مش معترف أصلاً بالقضاء العسكرى ولا بالمحاكمة اللى تمت معايا، حتى لو كان دة هيأدى لعدم الإفراج عنى… كل خوفى دلوقتى ان حد من القريبين منى يضعف ويدفع الفلوس للعسكر، مينفعش نستسلم قبل الانتصار بلحظات. 2012/1/22

- حين صدقَت جماعة ”التكفير والهجرة“
جماعة ”التكفير والهجرة“ كانت صادقة جداً لما قالت ان بلادى دى ”ديار كفر“ مش ”ديار إسلام“، وان المفروض التيارات الدينية تسيب بلادنا ويروجوا يعيشوا فى أى حتة بعيد… ليه بس يا رع الإخوان والسلفيين ميعملوش كدة؟ 2012/1/23

- أنا والبرلمان والذى منه
طول الفترة اللى فاتت كنت ساخط على الوضع السياسى فى البلد وعلى الانتخابات البرلمانية، لأنى اتحرمت من حقى فى الترشح فى البرلمان… لكن بعد ما اتفرجت على أول جلسة فى البرلمان، شكرت رع والقدر واللهو الخفى والإله الافتراضى، انى مدخلتش البرلمان… أصلى أنا مش مستغنى عن بيضانى. 2012/1/23

- اليوم 301
النهاردة كملت 301 يوم فى السجن، ولسة مش عارف هخرج امتى؟ ايه يا بلد؟ هرخج امتى؟ مش كفاية بقى؟ أحا 2012/1/23

- قانون اتكتب علشان المسلمين بس
الجلسة الافتتاحية لمجلس الشعب لفتت نظرى من جديد للسخف بتاع القَسَم… القَسَم بيقول ”أقسم بالله العظيم“، طيب اللى مش مؤمن بالله مش من حقه يكون نائب فى البرلمان حتى لو كان الشعب منتخبه؟ هو اللى كتب القَسَم دة من حقه انه يصادر حرية الشعب فى اختيار نائب غير مسلم؟ 20121/1/23

- Ich liebe dich
Iche liebe dich, die freiheit ♥ 2012/1/24

#مايكل_نبيل_سند (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات