قصاقيص، اتجننت فى سجن المرج - 20

مايكل نبيل سند

الحوار المتمدن-العدد: 3574 - 2011 / 12 / 12 - 12:07
المحور: حملات سياسية , حملات للدفاع عن حقوق الانسان والحرية لمعتقلي الرأي والضمير
    

- الدنيا لسه بخير:
فى الجلسة اللى فاتت كنت مبسوط جدا و أنا بسمع التقرير بتاع مصلحة الطب النفسى الشرعى عن حالتى النفسية… بجد الدنيا لسه بخير، و لسه فيه ناس كتير محترمين مابيخضعوش لأى ضغوط تمنعهم من انهم يستمروا بنفس النزاهة علطول… أرفع القبعة لأولئك الأطباء المحترمين. 2011/11/3

- ابو مازن بدأ يلمس الحقيقة:
ابو مازن فى تصريحات للقناة الثانية فى التليفزيون الإسرائيلى أواخر أكتوبر اللى فات أعترف ان العرب لما رفضوا قرار التقسيم بتاع مجلس الأمن فى نوفمبر 1947… أعتقد ان ابو مازن بدأ يلمس الحقايق، و لو مش فى الخط ده هيقول حقايق كتير تصدم القطعان العربية… بس أنا مبسوط جدا بالتصريحات دى، و هحب أقابل ابو مازن لما أزور فلسطين. 2011/11/3

- 3 إعلانات دستورية فى عين العدو:
دلوقتى بقى عندنا 3 إعلانات دستورية فيهم حوالى 100 مادة… طيب مش المجهود اللى اتبذل فى ال3 دول كنا بذلناه فى دستور أحسن من تضييع الوقت اللى المجلس عمال يعمله من 10 شهور؟ 2011/11/3

- صفقة الجيش مع القضاة:
أعتقد بقى واضح ان فيه صفقة بين المجلس العسكرى والقضاه، المجلس سلم للقضاة الانتخابات كاملة بالسبوبة بتاعتها، و فى نفس الوقت القضاه ملتزمين انهم مايطلعوش أى أحكام مش على هوى الجيش، و كمان اللجنة القضائية المشرفة على الانتخابات بيتصرفوا على انهم سكرتارية المجلس العسكرى و حتى الأحكام القضائية مش بينفذوها إلا بعد الجوع للمجلس… السؤال بقى:هل الصفقة دى فيها اتفاق على تزوير أو تلاعب فى الانتخابات؟ 2011/11/3

- أرفض ان يحمينى الجيش من الإسلاميين:
أنا ملحد و عالمانى و ليبرايلى، و ضد أى تدخل للدين و رجال الدين فى السياسة، و ماحبش ان اشوف مصر فى يوم زى السعودية أو افغانستان أو إيران… لكن فى نفس الوقت عمرى ما هستبدل الدكتاتورية الدينية بالدكتاتورية العسكرية،وعمرى ما هفرض نفسى على شعب بالعافية وهو مش عايزنى… أرفض ان يحمينى الجيش من الاسلاميين،اذا أتت الانتخابات بالإسلاميين فهذه هى قواعد اللعبة،و تكون السلطة من حقهم. 2011/11/3

- بشار الأردنى يظهر من جديد:
القضية بتاعة بشار الأردنى ابتدت تتحرك دلوقتى و يتكتب عنها فى الجرايد (المتهم فى قضية تجسس لصالح اسرائيل)… واضح ان النظام المصرى بيضغط على الاسرائيليين علشان يقايض بشار بحاجة هو عايزها… وقاحة. 2011/11/3

- الجيش بيبيعلنا بضاعة مبارك القديمة:
نظام مبارك كان دايما بيروج ان الاخوان المسلمين هم البديل الوحيد ليه، و الثورة اثبتت ان ده كذب و ان فى قوة مدنية مؤثرة فى مصر اكثر من الاخوان… دلوقتى المجلس العسكرى عايز يبيعلنا نفس كذبة مبارك، و بيقول ان الدكتاتورية العسكرية هى اللى هتحمينا من البديل الاسلامى الوحيد، ناسيين اننا لسه محطمين الكذبة دى فى 25 يناير من أقل من 10 شهور. 2011/11/3

- عفو مخادع من العسكر:
بمناسبة عيد الأضحى، طنطاوى عامل عفو عن أكتر من 300 مسجون من المحكوم عليهم عسكريا… الفخ بقى ان العفو عن المحكوم عليهم بأحكام نهائية، يعنى اللى تجاوزوا مرحلة الطعون… ده معناه ان مفيش حد من اللى اتحكم عليهم بعد الثورة داخل فى العفو ده… نصب علنى. 2011/11/3

- محاكمات نتيجتها محددة سابقا:
المحاكمات العسكرية نتيجتها بتبقى متحددة سابقا، و الدليل ان علاء عبد الفتاح و بهاء صابر أخدوا نفس الموقف و رفضوا يقولوا أى أقوال قدام النيابة العسكرية، و مع ذلك علاء اتسجن و بهاء خرج، وده لأنهم من الأول عندهم تعليمات يعملوا كده من قبل ما يعرفوا علاء و بهاء هيعملوا ايه… علشان كده أنا شايف ان مفيش لازمة من ان حد يتعب نفسه فى استجوابات المحاكم العسكرية، هتتعب نفسك ليه لما النتيجة فى الآخر هيا هيا مهما عملت؟ 2011/11/4

- محتاجين ترخيص بقنوات أرضية:
بعد تفكير أعمق فى مبادرة فضائية ”الشعب يريد“، أدركت ان مصر محتاجة حاجة أهم من قناة فضائية جديدة (عندنا فضائيات كتير)… احنا محتاجين القانون يتغير و يسمح بوجود قنوات تليفزيونية و راديو أرضية، بدل القانون الحالى اللى بيحتكر البث الأرضى على القنوات الحكومية… لو القانون ده اتغير، هنحول كل الفضائيات الحالية لقنوات أرضية وهنوصل لكل قطاعات الشعب اللى مش عارفين نوصلها.
2011/11/4

- افتقدت رع:
فى السجن بطلت أحلف برع زى زمان… وحشانى الديانة الرعاوية… عااا 2011/11/4

- سقوط النفط راحة للإنسانية:
نفسى البشرية تلاقى بديل طاقة للنفط… اعتماد البشرية على النفط مورطنا فى مشاكل كتيرة،ولو طورنا الطاقة الشمسية أو النووية هتتحل معظم مشاكل السياسة الدولية… لو بطلنا نعتمد على النفط،السعودية وإيران هينتهوا،و ده هيقضى على مصادر تمويل كل الحركات الارهابية و الأحزاب الاسلامية، وده معناه ان الفجوة بين المسلمين و الغرب هتقل، و الدول النفطيه هتضطر انها تتجه للصناعة و الزراعة بدل حالة الثراء المبالغ فيه بدون انتاج فى الدول النفطية … برضه عدم احتياج الغرب للنفط هيخلى الدول الغربية مش محتاجة تدعم أو تتحالف مع أى دكتاتور، و ده هيدى مصداقية أكتر للمبادىء و القيم الحداثية،و فى نفس الوقت هيضعف الدكتاتورية المتبقية و يعجل بسقوطها … النتايج السياسية أكبر من انها تتكتب فى كام سطر، و الموضوع كله فى إيد العلماء مش السياسيين. 2011/11/4

- أنا مخطوف مش سجين:
أنا مش معترف بإجراءات القبض عليا أو محاكمتى،أنا اجراءات محاكمتى ماتمتش من خلال قضاء محايد أو نزيه… أنا معتبر نفسى مخطوف أو أسير مش سجين. 2011/11/4

- الصحافة المستغلة:
مصر مافيهاش صحافة مستقلة،دى صحافة مستغلة… الصحف اللى بتقول على نفسها مستقلة نشرت خبر اعتذار والدى على صفحاتها الأولى,وماكتبتش حرف عن بيانى اللى رفضت فيه الاعتذار… لما القضاء العسكرى قبل الطعن بتاعى اهتموا بالخبر علشان يلمعوا فى القضاء العسكرى، ولما القضاء العسكرى بيماطل أو لما رفضت أحضر الجلسه ماحدش فيهم جاب سيرة… لما قاطعت القضاء العسكرى تجاهلوا الخبر تماما رغم ان دى أول مرة فى تاريخ مصر، ولما علاء عبد الفتاح قاطع كتبوا الخبر فى الصفحات الأولى… اذا كان هو ده الاستقلال، فماذا يكون طمس الحقائق؟ 2011/11/4

- ارفع صباعك فوق… انت مصرى:
ناس كتير بيقولولى ان الحكم بتاعى سببه الصورة بتاعتى اللى رفعت فيها صباعى للجيش … أنا مش متخيل ان فيه منطق يقول ان فيه إنسان يفقد 3 سنين من عمره بسبب صورة… بس عموما، أعتقد ان مصر محتاجة حملة على الفيسبوك يرفع فيها كل واحد صورته وهو رافع صباعه لفوق للعسكر علشان يعرفوا اننا مش خايفين منهم… يللا، ارفع صباعك فوق … انت مصرى. 2011/11/4

#مايكل_نبيل_سند (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات