الست

نورا فريد ميخائيل
nouraehap38@gmail.com

2019 / 1 / 19


الست يا حرام تيجي م الشغل جرى ع البيت
م المواعين للمطبخ والسمن والزيت
تغسل غسيل،تسيا بلاط وتدعك الحيط
تعمل حلويات ومحشيات
تعمل محمرات ومشمرات
كله من ايديها حاجه كده شربات
واللي تنام فيه تقوم وتبات
يا حرام عمرها مااشتكت تعمل من سكات
اكيد دا لو كان راجل كان من زمان طق ومات
وعيل صغير يفضل يصرخ يا حرام
ينادى ويقول ياماها عايز انام
أو عايز اكل أو ادخل الحمام
وواحد تانى يزعق خيطيلى الكمام
اكيد دا لوكان راجل، كان هاجر وقال ع الدنيا السلام
والله الست المصريه المفروض يعملولها تمثال
وأى تكريم ليها حلال فى حلال
طبعا ما هى طول النهار شقيانه مع العيال وأبو العيال
ومع ذلك الاقى راجل نازل فيها استغلال
تقولش ياخويا اشتراهامن سوق العبيد بنص ريال
ولالاقيها على باب الجامع بتقول حسنه ياولاد الحلال
انا منكرش ان فى رجاله كتير تمام التمام
ولكن فى رجاله محتاجه شويه كلام
خليك راجل بجد كله الا المدام
الست دى جوهره وياقوت ومرجان
لازم تخاف عليها حتي من شويه زكام
وتحسسها دايما انها غصن بان
متقولهاش تخنتي وبقيتي بطيخه أو كوز شمام
سمعها دايما كلام جميل
تلاقيها عايزه تعمل عشانك المستحيل
وترجع بيتك بس مش اخر الليل
وتعيشوا حياه من غير بكا ولا عويل
متعرفش غير الحب لآخر العمر الطويل
نورا فريد😂😂



https://www.ahewar.org/
الحوار المتمدن