طفله خرسه ياعراق...؟

رحيم الغالبي
raheemalghalbi@yahoo.com

2011 / 2 / 11

كتبت اواخر السبعينات حين برزت مؤامرة الجبهه اللاوطنيه.... انشرها بمناسبة الذكرى ال 48 ليوم 8 شباط 1963 عاهرة الانقلابات...وهم سموها عروس الثورات


ردّت ..الحيطا ن ...ما مأمونه..
والحزنان ، غنّه اوياك جرحه
كتلك اعتك ياعشك...لتبيعني
ذوله يردونك بيديهم...دوم سبحه
يابعد كلشي,,,وخذاك النوم
وفراشك كزاز ...اشوكت تصحه...!!؟؟
ياما كتلك غلط هاذا وكلت اصلحه
أباب بيتك نزعوا الطيبات
والذلّه امتلت بجيوبهم
والظل نظيف ايهزّه جرحه...
يكله جرحه اشلون اطيب ؟؟
وما اطيب...
يلي كل عمرك كضه وما شفت فرحه
ما شفت
فرحه

.......

أكسرني جامه...
بينه من ظنوا مقرات... وجريده
اتشيل هامه...!!
.....
يالعراق...الناس ،
يالناسك حزينه
وعلى مودك ....هلهلينه
وكلنه هلبت جاي عرسه..!!
يالعراق الناس بيع ومشترى

ياعراق الناس يالناسك ..
تغني ..طفله خرسه !!
..........
بس اكلك : ليش مسلم صدّك الكوفه تحرسه ...؟
الباعنه...ذاك القميصه أبيض... عباله الدنيه ونسه
بينه من يعثر ابموت...
وبينه من يعثر – ابورقه *–
وبينه ...من ايطيح خنسه
ياعراق ...اشتنسه ، انسه
بس اكلك :
ليش
مسلم
صدّك
ابكوفه تحرسه...!!؟؟

------------------
1978 الشطره – الناصريه



https://www.ahewar.org/
الحوار المتمدن