طلعت عالسطح مع ظب الرمس

سهيل قبلان
nice_moon_a@hotmail.com

2019 / 12 / 1

راحت عالوعر تقرط حملة حطب

ومن دعساتها عالدرب طلع العشب

والمنجل في ايدها صار يرقص طرب

وريحة عرقها اطيب من الفل والريحان

نزلت عالكرم تقطف سلة عنب

والرمان لمن شافها تآخى مع العنب

وامام حسنها الزنبق فل وهرب

وكل حجر في الكرم تحول لمرجان

طلعت عالسطح تتصفح كتاب

والقمر لمن شافها استحى وغاب

ومن انفاسها تعطر النسيم وازهر اليباب

وصار القرنفل يعانق الحبق والريحان

راحت عالبيدر تدرس سنابل

وتراقصت عاظهرها احلى جدائل

والقد مثل النخيل كان يتمايل

وكل خطوة من خطواتها نغمة كمان

اجت لعندي وقدمت لي هدية

كتاب ويراع وباقة ورد شذية

مع كلمتين حب من زهره ندية

اعمل لغيرك بوحي البر والاحسان

نزلت على العين تعبي الجره والبريق

ومن لمساتها تحولت المي لرحيق

ومن دعساتها ازهر ونور الطريق

بفل وبنفسج مع شقائق النعمان

يا حاملة كتاب في ايدك

ومعلقه قلم حبر في جيدك

شفتك وقلت ربنا يزيدك

حب وعشق لخير جليس في الزمان

يا طالعه عالدرج شوي شوي

حني على الملهوف اللي بعبدك خطي

انا ما بدي منك ولا شي

غير قبلة حب وعطف وحنان

طلعت عالسطح تنشر بليله

ومن انفاسها صارت النسمه عليله

والارض الجدبا اخضرت وصارت جميله

وسياجها من نرجس وريحان

عاشفاف نجوى شفت الشهد قراص

وعاخدودها تفاح وتوت واجاص

وقلبي حبها وقلا لا مناص

نكون مع بعض قوس وكمان

طلعت عالسطح مع ظب الرمس

تغامز النجمات مع نتفة همس

حبي للوطن احمى من الشمس

وفيه الانجيل عانق القرآن

خدود ليلى وثغرها دن مليان بالشهد

وزنودها السمرا ضمتين من احلى ورد

وسهام عيونها قالت لي نحنا عالعهد

ومنظل مَثلْ في الاخلاص لكل انسان

التقحت عاشط البحر تتشمس

حبات الرمل من لمساتها صارت ملبس

وعيونها ندهتلي قالتلي تعال عسعس

والحس من شفافي قهوة وحليب وكعكبان



http://www.ahewar.org/
الحوار المتمدن