ما قدرت

وليم نصار
willie.nassar@live.com

2013 / 2 / 4

تابع لحديث مع سمير القنطار وسيلفي وفهد مدلج..
(باللغة المحكية اللبنانية – لهجة بترومين)
____________________________
سألني سمير وفهد اليوم .. ما اشتئت للبنان ..

حاولت داري الجواب ولف علين .. لكن الجواب الحقيقي "لا... أنا ما اشتئت للبنان".

لبنان المزرعة ونص عربي نص Francaise ما بيعنيني ..
أنا تركت قلبي وروحي بيوم من الايام عسنديان بترومين .. ولبستن كوفية حمرا ومناشير وجريدة كان إسما النداء ... ولما نادانا الوطن حملت قلبي وروحي وحطيتن ببيروت ..

وئت بتنزلو يا سمير وفهد عشارع الحمرا .. ميلو صوب الجامعة الامريكية .. عالدرج يل بينزل عكورنيش المنارة بعد في حيط لونو أورانج ... ما هدمو بيت الحريري لهلأ .. محفور عليه (الشهيد الشيوعي وليم نصار) و (الشهيد الشيوعي جورج السهلي) .. حفرنا أسماءنا نحنا ونازلين نرمي قنبلتين على حاجز المارينز براس بيروت.
أول زيارة إلى لبيروت بعد حصولي عالدكتوراة كان إني زرت الحيط وتطمنت إنو أسماءنا موجودة وما محيوها بيت الحريري والطوايف ...
لكن أنا بعدني هون ... بس جورج صار فوق..

لما نزلت عبيروت يا سمير قبل تلات سنين كان مفترض الرفاق يبعتولي سيارة تاخدني من المطار عالاوتيل ... نطرت بالمطار ساعتين وما إجا حدا .. اتصلت بمسؤولي الحزبي فطلب مني إني آخد تاكسي واتوجه فورا من المطار عالاونيسكو للمشاركة بمهرجان رح يكون في كلمة لحزبنا الشيوعي ..
نفذت الطلب وما ناقشت .. وهونيك لقيت الرفاق .. تجمعو حواليي رفاق ورفيقات بعمر الورد ... قالولي رفيق مبسوطين إنو شفناك شخصي نحنا ربينا عأغانيك ... حسيت بفرح وأمل غمرني غمر ...

فوتوني الرفاق عقاعة المهرجان ..كان حبيب الروح أنور - أبو وليم ... وائف مع الشيوعيين بآخر القاعة ... أدمولي كرسي فطلبت منن إني كون وائف مع الرفاق بآخر القاعة ...

كان كل خطيب جايب معو جماعتو ليهتفو للحزب أو الحركة أو التنظيم تبعو ... وحتى هتيفة للطايفة كان في الله وكيلكن ... وكانت القاعة مليانة هتافات فارغة .. ما لها طعم ولا ريحا ...
طلع رفيقنا سعد الله مزرعاني تا يحكي كلمة الحزب ... ما حدا زئفلو .. حتى رفاقنا زئفولو بخجل ... حسيت حالي غريب عن جونا .. اتطلعت بأنور وفهم عليي أو حس فيي ما بعرف ... وفجأة أنا وأنور علي صريخنا بهتاف كل الشيوعيين بحبوه وغير الشيوعيين بخافو منو ..."شيوعي شيوعي شيوعي شيوعي" .. وضلينا نردد الهتاف وسط دهشة الرفاق والحاضرين وأجبرنا الرفاق الخجلانين وأجبرنا الحضور إنو يرحبو بحرارة بالرفيق يل رح بيحكي كلمة الحزب الشيوعي.

ليش بدكن ياني إجي علبنان؟
معاش في على طريق عيتات .. ومعاش في يا عهد الأممية ..
صحيح مشتاء لأبو وليم ومايا ... ولوليم الزغير وراشيل، ولراغدة ولشيفان وبولص ... ولرضوان حمزة وفاتن وكاترين وأحمد .. وصحيح إني مشتئلكن كتير .. لكن بآخر زيارة لبيروت ضيعت روحي بزواريبا .. ما لقيت الزواريب يل بحبا ..
معاش في دفا بزواريب بيروت ..
في شيوعيين كتار بتدفي شوفتن ..
بس معاش في حزب شيوعي ..



http://www.ahewar.org/
الحوار المتمدن