أخبار عامة - وكالة أنباء المرأة - اخبار الأدب والفن - وكالة أنباء اليسار - وكالة أنباء العلمانية - وكالة أنباء العمال - وكالة أنباء حقوق الإنسان - اخبار الرياضة - اخبار الاقتصاد - اخبار الطب والعلوم
إذا لديكم مشاكل تقنية في تصفح الحوار المتمدن نرجو النقر هنا لاستخدام الموقع البديل

الصفحة الرئيسية - اليسار ,الديمقراطية, العلمانية والتمدن في العراق - علي الصفار - مدرسة عبوسي المسائيه...... التي اصبح اسمها مجلس النواب العراقي















المزيد.....



مدرسة عبوسي المسائيه...... التي اصبح اسمها مجلس النواب العراقي


علي الصفار

الحوار المتمدن-العدد: 1836 - 2007 / 2 / 24 - 10:29
المحور: اليسار ,الديمقراطية, العلمانية والتمدن في العراق
    


(( قبل بضعة ايام علمت ان احد اصدقائي مريض وملازم لبيته من مده ،ذهبت لعيادته وبعد ان سلمت عليه سالته عن مرضه فاجابني ان مرضي سياسي وغريب ، لم افهم كلامه ألا انه لم يمهلني وطلب مني ان اخرج من حقيبتي اوراقا وقلما مع وعد بنشر ما يقوله في ( الحوار المتمدن) دون ان اتدخل في عباراته خاصة وانا من المدافعين عن حرية الراي ، اخرجت اوراقي وكتبت ماقاله وهائنذا انشر ماقاله دون أي تدخل)).........

كبل كم يوم خابرني ابن عمي ( خضير ) وكلي سمعت بيك عطال بطال وامورك داجه ، كتله أي والله ، كلي زين آني لكيتلك شغل بس لازم يجربوك فد يوم واحد وبعدين لو يبقوك لو يطلعوك يعني انت وشطارتك وتره راتبها كلش زين ، آني كيّفت لأن صارلي تلث تشهر مامشتغل ولا يوم ،و كلما انوي اروح للمسطر بساحة الطيران يفجروه ( المجاهدين !!! ) وهاي عايشين عالحصه وجماله الحكومه تقطرها النا تقطر ، يوم ينطونه تمن ووره شهر ينطونه دهن ، من نستلم التمن نحير ماعدنه دهن شنسوي بيه ، نبيعه ، ويوم اللي نستلم الدهن هم نحير وتاليها هم نبيعه الى ان كتلنه الجوع والقهر ، المهم كتله لأبن عمي الله وايدك وين ماتريدني اشتغل بس هيه وين الشغله ، كلي عدنا بالكفتريا مال مجلس النواب كتله يعني بالمنطقه اللي يسموها الخضراء ، كلي أي شبيك شو جفلت ، كتله يابه انت تعرفني آني ما احب الأمريكان ، ضحك وكلي اهو.. بعدك بعقل السبعينات من جنت خابصنه بالأمبرياليه عمي الأمور تغيرت بعدين انت شعليك بيهم انت تشتغل بالمجلس وماشاء الله كلهم عراقيين للكشر، آني صفنت شويه وكلت لنفسي حجي ( خضير) صحيح ، بعدين الجوع كتلني وخلي اشوف نفسي ، المهم كتله يابه مثل ماتريد شوكت اجي ، كلي تجيني يوم الخميس ثمانيه شباط ، آني سمعت التاريخ كلت هاذا موخوش فال ماأشتغل إلا بهذا اليوم وجماله هم الأمريكان بالشغله ، والله ما احس إلا على صوت ابن عمي يكلي تجيني من الصبح ومن توصل تخابرني حتى اجي آخذك بس اريدك تكشخ لأن الشغله ينرادلها مظهر مرتب ، يوم ألأربعاء رحت للمزينْ وزينت وكتله يابه عالحساب باجر يوصلك حسابي وحساب الجهال القديم ، ومن رجعت للبيت كتلها للمره حضريلي ملابسي واختاريلي فد شي حلو ، كلتلي والله راح احير شأختار البدله الخضره لو الزركه لو البيضه ، تسوي نفسك ماتدري هو شعندك غير بنطرون وبلوز مال الجيش مال ايام زمان ، كتلها دخيلج دبريني آني ماصدكت الكي شغله بلكت عاد رب العالمين يفتحها بوجهنا هالمره ، كالتلي زين خلي اروح لعباس ابو النفط يكولون عنده خوش هدوم من اشتغل ويه الساده وعاف النفط وصار كشخه .. والله راحت المره ووره ساعه جابتلي بدله حلوه وغركانه بالريحه الطيبه كتلها صدك (عباس ) عنده هيجي هدوم وكلها عطر وين ايام النفط ، كلتلي موكل الناس مثلك مجلب بحجايات السبعينات ( رِجّال اللي يعبي بالسله ركي ) ، شكو عليه (عباس) الصبح يشتغل بمكتب الشهيد وبالليل ضام بطل العرك جوه الجربايه يقبض الصبح ويصرف بالليل خو مثلك اموتْني من الجوع آني وجهالك وخابصني بالأشتراكيه اللي صارلي انتظرها من تزوجتك لهيسه .

المهم( الخميس) غبشت من الصبح ورحت لأبن عمي ( خضير ) بالخضراء ، ومن وصلت اول مافتشني جندي عراقي ، كلت والله جماعتنا ضابطيها لعد شنون يكولون الأمريكان كلشي بيدهم ، وره شويه فتشني جندي يكولون فليبيني وراه فتشني فد واحد اسود ، اشو وراه جابو جلب كام يشم بيه ، آني بكلبي اشتم بابن عمي ، وبالأخير طلعلي فد واحد مثل الخنزير يطخ السكف وهم فتشني وهو مخنزر عليه تكول كاتل ابوه ، الى ان وصلت ( خضير ) بطلعان الروح ومن شفته ماخليت مسبه ماكتلهياه ، وكتله تدري ردت ارجع ، تدري جم واحد فتشني بعدين شنو تخلون جلب يفتشني وجماله خاللي وره العراقي والفلبيني والأسود ، ابن عمي كلي داسكت الربع كلهم يتفتشون ، اول مره زعلوا بعدين صارت مثل الزلاطه الهم قابل انت احسن منهم لو انت( بوش ) ..بس( بوش) مايفتشوه، جرني من ايدي وكلي امشي اعرفك ماتحبهم وفوكاها بهيج يوم ، ومشه كدامي وآني وراه ومااشوف نفسي الا بقاعه جبيره وبيها ميوزه هواي ، كتله شنو هذا مطعم ، كلي لاتفضحنا هاي يسموها كافتريا مال مجلس النواب ، كتله وانت شتسوي هنا ، كلي اركص جوبي يعني شسوي غير اشتغل بوي ، كتله اتخسه لعد هاي مرتك خابصتنه عله رجلي بالمنطقه الخضراء تاليها بوي ، كلي اذا آني بوي انت راح اشغلك مساعد اليه ، آني هم ماكذّبت خبر، كتله ماأشتغل وراح ارجع ، كلي وين شيطلعك ممنوع الطلعه منا للعصر ولا تصير غشيم انت باقي باقي احسلك تحصِلّكْ كم فلس بعدين انت عبالك بوي بالبارات مال( باب الشرجي) مال ايام زمان من جانوا يكتبون ممنوع ضرب البوي ، لابويه الناس هنا كلهم كباريه ومثقفين وحتى جماعتك ال خابصني بيهم هم هنا بعدين هنا راح تعرف كلشي يصير بالعراق ، كل المسوؤلين هنا وآني اعرفك على فُكركْ بعدك إتدور سياسه ، الصدك آني كلت هاي مبينه شغله نازكه خلي اجربها وحالي حال الربع قابل بس آني وطني ، كتله يابه امري لألله موافق ، والله هو اخذني من ايدي وكلي انت ويايه اليوم وين مااروح تجي ويايه حتى تتعلم زين ، بلكي يرضون عنك ويثبتوك تره كوه قبلوا يشغلوك، امشي ورايه ومعليك .

رجعت للكافتريا وجانت هوسه واصوات عاليه بس جوكات ، كل جوكه لوحدها ، فد مجموعه جبيره كاعدين عاليسره ، ومجموعة اللخ عاليمنه بس اصغر من اول جوكه ، وبالنُصْ جوكة لخ بس ماتشبه الجوكتين ، وكلهم واحد داير ظهره عاللاخ ، واكو جم واحد يفترون ، كل شويه يكعدون يم جماعه ، واحد من جماعة اليمنه صاح على ابن عمي ، راحِلْهمْ ( خضير) ورحت وياه ، كله لأبن عمي جيبلنا نفرات كباب على عددنا ، ابن عمي سجل الطلب وكللهم تدللون ، وراح دايوصي ، صاحوا جماعة اليسره وهم رحت وياه ، سألْنا واحد منهم لابس عمامه سوده جبيره ، كله الجماعه اشطلبوْ ، كله مولانا كباب ، كله زين لعد جيب النا تكه لحم ، اشو واحد من جماعته صغيْرْ بالعمر ، كله لاسيد التكه هم بيها لحم غنم مثا الكباب ، السيد ماقِبلْ كله التكه اطيب ، اشو صارت هوسه بيناتهم ، وهذا الصغير وِكفْ ، وكله مولانا اذا تصْرْ عالتكه لحم راح اروح لغير ميز آني وجماعتي ، السيد صُفنْ شويه ، وكله لأبن عمي يابه جيب النا تكه دجاج هاي هم تكه يعني مو كباب وهم دجاج مو لحم ، المهم ابن عمي سجل الطلبات ورحنا نوصي الكببجي وسلمناه الطلبات ، جان يصيحونه جماعة اليمنه وجان واحد يسالنا والبقيه يضحكون ، وكله لأبن عمي بشرفك الجماعه مو طلبوا فسنجون ! لوقيمه على تمن ، ابن عمي ماجاوب اشو واحد لاخ كالنا ديروا بالكم لينطوكم حسابكم بالتومان !! ابن عمي كلهم تفضلو شتريدون ، ابو لحيه جاوبه كله جيبلنا زلاطه بس الخيار وحدْ والطماطه وحدْ لاتخبطهن بماعون واحد ، ابن عمي كله صار مولانا ،آني اتعجبتْ اول مره اسمع بهيجي زلاطه ، المهم واحنا راجعين صاحونا جماعة اليسره وجان يسالنا واحد وكالنه شرادوا منكم الجماعه ، ابن عمي جاوبه ، كله رادوا زلاطه ، جان واحد منهم يكلي ديروا بالكم لاينطوكم حسابهم بالريال لو بالليره ، فد واحد منهم كلي جيب النا جاجيك ، اشو السيد صار عصبي ، وكله لأبن عمي .. لالا اشطبه ... والتفت على صاحبه وكله ماتجوز صدك العِرِكْ نّداسْ ، إحنا همْ دِرنا وِجهنا ودا نرجع ، جان يصيحنا السيد ، وكله لـ (خضير) جِيبْ إلْنا خيار ولبن وثوم وخبطهن سويه ، ابن عمي كله تتدلل مولانا والبقيه يضحكون من جوه ليجوه ، وره شويه صاحونا جماعة اليمنه وجان كاعد يمهم واحد جديد كله ابن عمي تفضل كله جيبلي مثل الجماعه اشو واحد منهم كله لاأُخذْ راحتك معليك بينه ، كلهم زين راح اطلب مشكل ميخالف، كالوله احسن ، ومن رجعنا صاحونا جماعة اليسره وهم شْفنا واحد جديد يمهم وهمْ طِلبْ مشكلْ آني استغربتْ ، كتله اشعجب بس هذوله طلبوا مشكل ، كلي هذوله جماعة مخلط يالوز بس فقره ، المهم ابن عمي صاح عليّه ، وكلي يله بسرعه ودي الطلبات ، كتله يابه بعد وكت الساعه دعش وكت غده ، كلي ومن كلك هذا غده عمي هاي تصبيره ، الغدا غير شِكلْ ، آني اتعجبت كلت معقوله اللي يمثلونه ياكلون هيجي اكل واحنا حتى الريحه ماشاميها صار النا سنين ، المهم ركضنا وودينا الطلبات والصدك آني شديت حيلي لأن ابن عمي كلي اليوم اخر جلسه وراح يناقشون ميزانية العراق يعني شغله تفيدنا احنا الفقره ، كلت خلي اكوي كلوبهم حتى يفضوها اليوم ويوزعون فلوس النفط علينا مثل ماكال ( صولاغ )..

اول ماوديت الأكل لجماعة اليمنه ،واحد منهم كلي ( جزاك الله خير ) ، ومن وديت الأكل لجماعة اليسره واحد كلي ( احسنت ) ، وبدوا ياكلون بس واحد يخنزر عاللاخ وكلهم معبسين وعبالك صار الهم يومين ماماكلين شي ... المهم بهاي روحاتي وجياتي شفت جماعة النص ماطلبوا شي وبعدين همه يختلفون عن الجوكتين اليمنه واليسره ، طول الكعده بس يضحكون وماخالين كدامهم غير المزه ، وفد واحد منهم خال ربع ويسكي جوه الميز ، وكل شويه ياخذله مصه ، وماشاء الله عليهم متفحين وخدودهم حمر .. باوعت شفت واحد منهم اعرفه من كبل يمكن اسمه ( زنكنه ) ، اتذكرته ، وكلت هاذا... جماعتنه جانوا يحبوه ولوْ جان كلش اممي ، كلت خلي اروح اساله خاف يحتاج شي ، سلّمتْ عليه وكتله تأمر شي ( رفيق ) ، ماأدري شجابها ابالي هالكلمه ، جان يجاوبني ويكوللي ( فرمو كاكا ) ، كتله تحتاج شي تكه ، كباب ، اشو هذا مثل اللي زعل ، كلي بعربيه مكسره لا هازه الأكل مال بغداد مو زين علينا يسوي بينا مغص احنا ما صدكنا الأمريكان طيبونه منه وره سبعين سنه مرض ، تريد ترجع النا المرض ، كتله لا العفو بس آني كلت خاف تشتهي ( كباب فيدرالي ) لأن الكباب بالشمال والجنوب.. ،كلي وهو يضحك لا كاكا احنا بس نحب (برته بلاو) وهازه انتو ماتعرفون تسووه .... هناك اجاني ابن عمي وكلي شجابك هنا بعد لاتروح الا من يطلبوك بعدين ذوله يجيبون اكلهم وشربهم ولبنهم وياهم ، همْ يخافون على نفسهم وهم مايريدون ينفعونه ماتشوفهم ضحكتهم شكبرها وجماعة اليمنه واليسره معبسين وبس يتعاركون ... جرني من ايدي وكلي تعال ودي هذا الأكل لذيج الزاويه باليمنه باوعت وشفت جم مره كاعدات لوحدهن بس كلهن ملكجات ( يمكن هسه طالعات من الحمام ) اخذت ماعونين واحد بيه خيار واللاخ بيه طماطه ، وآني داأخليهن على ميز النسوان جان يكوملي واحد من جماعة اليمنه يشبه الزرقاوي ، لحيته اطول من دشداشته ، وجان ياخذ مني ماعون الخيار وهو عصبي وكلي هاي منو دزه مو جماعة اليسره ، كتله لا مولانا ، جان يكلي - شنون ذوله بالفلم مال ابو سفيان - ، ( ثكلتك امك ) تريد تفسد نسوانه ، كتله مولانا آني اشسويت قابل جايبلهم عرك ، كلي ليش انت مومسلم ماتعرف الخيار حرام عالنسوان ، الصدك ماعرفت اجاوب اشو آني اتذكر جدتي طول عمرها جدي يجيبلها خيار من يرجع من الحسينيه ، المهم كتله مولانا العفو تره هِنّه طلبن ، كلي ماتشوفني آني كاعد وعيني عليهن بابه ذني النسوان مايتأمنن ، آني هم اخذت الخيار وكلبت بس ردت اخلص نفسي ، بس الغريب النسوان لا حِجنْ ولافِتحنْ حلكهن ، وهاي مرتي كل ما اتعارك وياها تكلي دير بالك تره النا ربع بالمجلس وآني من كل عقلي جنت اخاف منها..خل تجي وتشوف عالأقل من تاكل خيار ماأزعل عليها..

رجعت لأبن عمي وجان ينطيني صينيه وكلي وديها هناك للزاويه اليسره ، باوعت كتله شكو هناك ماكو غير خيمه سوده ، مدري غراض مغطيها بجادر ، جان ابن عمي يصير عصبي ويكلي شبيك عميت ولك ذني العلويات يعني نسوان ، الصدك آني افوت من يمهن بس والله عبالي فد شي مغطى ..المهم كلي دير بالك لاتخلي ايدك تطخ المواعين تره يستحرمن ، كتله لعد شنون انزل المواعين من الصينيه تعال عمي ويايه تره هاي صعبه واخاف اسوي مشكلة لخ ، والله اجا ويايه وصدك مادري شنون نزل الصينيه بله مايلزم المواعين ، بس هنه جانن ملتهيات وسمعتهن يحجن عالأمريكان و شنون نكسر ضلع الزهره وشنون لازم ناخذ بثارها وجم وحده منهن لازمات كتاب صغير ويقرن بيه ، ومن عفناهن كتله والله النسوان احسن من الزلم عالأقل ديقرن كبل الجلسه ، وجان ابن عمي يضحك ويكلي لاتصير غشيم ذني دايحضرن نفسهن عِدهنْ قرايه وره الجلسه ووحده منهن ملايه وبعدها تقرا عالحسين ، كتله عاد لاتسويها فد مره مامعقوله نائبه وتقره عالحسين ، كلي وليش مستغرب هو رئيس الوزراء ووزير التربيه مو يقرون عالحسين ، بقت عالنائبه ، بعدين هنه يدوْرنْ ثواب شبيك وهمْ يحسنن وضعهن وراهن عوايل ، كتله زين شنو علاقة الأمريكان بضلع الزهره ، كلي شمدريني ، كتله يجوز عمر بن الخطاب جان منسق ويه الأمريكان من ذاك الوكت معقوله ، آني آخر شي سمعت من فد صديق جان من جاعتنا وهسه طوّلْ لحيته اجه يمنه وجنه سهرانين ونسه نفسه وبلش ويانه مثل ايام زمان ، وكلنه بوكتها ، تدرون معاويه شنون أخذ الخلافه من ابو حسين تره جان منسق ويه الأمريكان مثل جماعة تلاثه وستين !! احنا بوكتها اتعجبنا ، بس هسه عرفت من العلويات اثاري الأمريكان تنسيقهم من زمن عمر ... صدك ملاعين ..ابن عمي كلي ها شبيك افتر الديلكو مالتك .... د مشي....

هناك وصارت هوسه واصوات عاليه وجان يفوت فد واحد احمراني وياه كم واحد كل واحد منهم يشيلني باصبعه ، كتله لأبن عمي هاذا منو ، كلي اسكت هذا قائد امريكي ، كتله منو( بوش) ، كلي داسكت تبقى شروكي ، لك هذا يمكن الحقدجي مال( بوش ) ، المهم الربع كلهم كاموله ، تكول شيخ عشيره ، واحد يكوله تفضل مولانا واللاخ يكوله (فرمو كاكا) ، والثالث يكوله داستريح اخي الكريم ، اشو هوه راح كبل على جماعة اليسره وكعد يسولف وياهم واكل شويه تكه دجاج وياهم، وسمعت يكوللهم ديروا بالكم ليرجعوكم عالهريسه والقيمه ، اشو هناك واحد من جماعة اليمنه كام وجان يصيح عله ابن عمي ، وكله يابه حساب( المحتل ) علينه ، آني كلت علكت راح يصير عصبي عليهم وتنلاص ، اشو الأمريكي كام يضحك وجان يكوم ويروح يمهم وهم كام ياكل كباب وياهم وسمعت يكللهم ( بس اللي ياكل كباب يفتهم وعنده خبره ) ، بعدين جان يحجيلهم عالمشاريع وطلع من جيبه اوراق وانطاهه الهم ، وكام وراح يم جماعة النص اشو هناك كام يضحك بصوت عالي وكلساع ياخذله مصه ومن كام طلع واحد منهم طلع وياه وصعد وياه يالسياره ..

وره شويه دخت من الركضه ومن اللي شفته اشو اجه واحد وفات للكافتريا بس هو فاتح حلكه ويضحك ، ومن شافني كلي ( ها وِلكْ... السلام عليكم ) وغمزلي وعافني ، آني انقهرت وردت اركض وراه بس ابن عمي صاحني واضطريت اعوفه بعدين كلت هسه عفت الدنيه كلها وجلّبتْ بهذا الفقير يجوز طب بالخطأ بلكي يحصله جم فلس بس هو شكله مو غريب عليه يمكن شايفه بالترفك لايت لو بساحة خمسه وخمسين ، هناك اجه فد شاب اسمر يمكن شايفه بالثوره سألت عليه ابن عمي كلي هذا (حيدر) ، خوش ولد وبس هو الماكْلها هنا ، أشو( حيدر) كام يفتر على مجموعه مجموعه ويكللهم بدت الجلسه ، جماعة اليسره ماكاموا ، بس جماعة اليمنه كاموا وطبوا بالقاعه .. اشو السيد وكف وجان يصيح عله واحد اسمه ( ابو سجاد ) وكله اركض احسبهم كم واحد ، والله( ابو سجاد ) ، رِكضْ رِكضه مال واحد متعود على ركضة طويريج ، ثواني ويرجع ، كله مولانا تلاثين، ضحك السيد وكلهم لحماعته جمعولي اربعين بسرعه وخلي يطبون القاعه والله دقايق والتموا الأربعين ، وطبوا وهمه يهوسون ( وين يروح المطلوب النه ) والسيد يكوللهم ( عليهم )...وره شويه طلع( حيدر) يركض ويلهث وراح لجماعة النص وسمعته يكوللهم يمعودين اليوم الميزانيه ، وجان واحد منهم - يمكن مقندِل - ، كله ( كاكا حيدر قصدك ميزانيه وبلنص ) وجان يطكها بضحكه ، الثاني كله ( كاكا انت سوي ميزانيه مال هازي رئيس المجلس وبعدين مال عراق ) ، الثالث كله احنه ماعدنه شغل ، كاكا مسعود حلها ويه كاكا نوري ، بعد احنا شعلينه ، خطيه هذا( حيدر) الأسمر صار احمر، وكلهم هسه كم واحد مو شرط كلكم ،فد واحد منهم كله يابه لخاطر كاكا( حيدر) ، فد ( دو شيش ) يكومون يدخلون ، وصدك كاموا وطبوا..

آني الصدك انقهرت ، وكلت لنفسي لعد كل هاي الركضه مالتي مابيها فائده ، وآني جنت اريدهم يفضون الميزانيه بلكي ناكل لحم ولو يالشهر مره تاليها يضربون الأكل وكوه يفوتون ، كتله لأبن عمي آني تعبان واريد ارتاح وين اروح ، كلي احسن شي طب جوه بالقاعه واكعد بالسره الأخير اشو هيه هوسه وآني راح اوصيلك( حيدر) يدير باله عليك ، وآني دا أدخل شفت واحد اعرفه كلش زين من( الثوره) جان مفوض بالأمن ، وجان لازم الشارع ويركض ورايه عالجيش الشعبي بس هوه مطوّلْ لحيته ، آني استغربت وكلت هذا شعنده هنا بس لا راح يسوي مكسوره ، ورِكضت على ابن عمي كتله الحك ارهابي راح يفوت بالقاعه ، هو هم ماجذّبْ خبر إجه ويايه وكلي وينه ، اشرتله عليه ،وجان ابن عمي يكفخني على راسي ، كلي مو صوجك صوجي اللي صدكت شروكي مثلك ، ولك هذا نائب ، كتله يمعود هذا اول جم يوم وره سقوط (صديم) انهزم لأن هوايه يطلبو ثارات ، كول غيرها منو انتخبه، كلي انتو لعد منو ، ليش من انتخبتوا القوائم عرفتوا منو بيها ، د روح تطب واخذلك غفه احسلك ، آني هم ماجذبت خبر وطبيت بالقاعه...

كعدت بآخر سره وردت اغفه بس ماكدرتْ ، لأن هوسه ، تكول سوك هرج لو مدرسه مسائيه كل اثنين يحجون سوه بصوت عالي وقسم يضحكون ، انتبهت على صوت دك ، باوعت شفت هذا المسودنْ اللي سلّمْ عليه كاعد عالميز متنك ويدك بالجاكوج وماحد دايره بال ، آني هم ماجذبت خبر وصحت على( حيدر) ، ليروح يبتلي ، وكتله اركض تره هذا المسودن كاعد عالمنصه التفت (حيدر) لي وره ، وجان يكلي النوبه انت , ولك هذا الرئيس، الصدك آني جفلت ، كلت لنفسي اكول وين شايفه ، هاي تاليها الأمريكان مالكو غيره يصير رئيس يعني ( صمنا وفطرنا على جريه ..يعني لو باقين صايمين احسن ) ، المهم هو ظل يدك تكول جاهل ومشتريله لعبه جديده ، وجان يحجي ، ويكلهم اخوان اليوم عدنه موضوع مهم هو الميزانيه ، د كعدوا عاد مو تأخرنا ، قسم كعدوا ، وعادلهم الحجي وكلهم لازم نفضها اليوم ولاتخلوني علج بحلك ( صولاغ ) كل ميطلع بالتلفزيون يهيّج الناس عليه ويكللهم الميزانيه عاصي بيها المشهداني يعني ( عجمي وجلب بشباج الكاظم ) ، هو كال هيجي ، وعلكت جماعة اليمنه طكوا من الضحك ، وجماعة اليسره عبسوا وجان فد علويه ترفع ايدها وتكول نقطة نظام ومن الجهه اللخ كام فد سيد وكال عندي بيان وهذا المسكين الرئيس يتوسل بيهم ويكوللهم دانطوني مجال ( بعد اسم الله بالطبك ) والعلويه ظلت تصيح نقطة نظام ، خو السيد كام وكف يم المنصه وطلع ورقه وكام يقره وكال...
(بسم الله الرحمن الرحيم، والصلاة والسلام على خاتم النبيين وصحبه ألأخيار المنتجبين ، صلاة دائمة الى قيام يوم الدين ، واللعنه الدائمة على اعدائهم اجمعين ..) ، بعد ماكمّلْ وعلكت وجان يكوم ابو اللحيه الطويله اللي رزلني عالخيار ، وكال نقطة نظام ،الرئيس كله لك عيني د اكعد هو شحجه ، ابو لحيه مادار بال و كام يحجي من مكانه ، وكله للرئيس ... هو بداها غلط شيقصد ( صحبه الأخيار المنتجبين ) ، الصحابه كلهم زينين من سيدنا معاويه ! لسيدنا يزيد ! هذا اقصاء وتهميش للصحابه و للسنه ، بعدين شيقصد ( اعدائهم اجمعين ) هاي ضد المصالحه اللي خبصنا بيها المالكي ، ردت صاحت العلويه من مكانها وكالت نقطة نظام ، جان يصير الرئيس عصبي ويكوللها ( والله خبلتيني ..شتريدين بس انتي ستكتين ارتاح ، آني كوه خلصت من النقنقه مال العلويه بالبيت ، النوبه هنا ، منين طلعتيلي ..اُمدايه عله ها الحظ ) ، ليش العلويه سكتت ، ابد تكول ماسمعت ، وصاحت من مكانها ( هاي آني جيف مريه متخليني احجي ) ،آني استغربت كلت هاي ام البرلمان وتكول على نفسها مريه ، وآني هاي المره خابصتني بالبيت ، تكوللي بعد لاتكول مريه كول امرأه ...هناك كام ( الفلوجي ) وراد يحجي اشو هذا المسودن – العفو قصدي الرئيس - صار عصبي وجان يكول ( جانت عايزه التمت ... كام عبوسي ..شوف فلوجي انت مثل عبوسي كل هاي المشاكل منك ) ، الفلوجي ضحك كله يابه آني شعليه هم الشيعه دايحجون وآني رجال سني...هيْ حجي راضي !! هناك كام واحد من بعيد واجه يم الفلوجي وكله يابه مو وكتها ... واحد من جماعة النص كام وجان يكوله للرئيس ( كاكا أشو هازه الفستق حامز مو مالح ) ، المسودن جاوبه كله داكعد كاكا ، انتو شكو عليكم ، اشو جماعة النص كعدوا صاحبهم ..وجان يصيح الرئيس اللي شبهته بالمسودن والصحيح هو المسودن اللي يشبه الرئيس ، لك (حيدر) عيني سكتهم خل نبدي وهذا المسكين كلساع يروح لمجموعه تكول مراقب مال مدرسه مسائيه ، ظل الرئيس يدك بالجاكوج وكال راح نبدي قراية الميزانيه ..اشو وحده من العلويات اللي كدامي جفلت وكالتلهن لجماعتهه ( اتذكرت الناس دا ينتظروني عندي قرايه ) اشو لفت عباياتها التلاثه وكامت وطلعت تركض وجان يصيح عليها الرئيس ( لج هاي وين ..لك حيدر الزمها..) المهم العلويه ركضت ، تكول خضير زلاطه بزمانه لا حيدر ولاغيره يلحك بيها...

المهم بدو يالميزانيه ، والله فضوها بسرعه ، آني جنت اعتقد راح يطولون بيها، بس همه الفصل اللي يختلفون على كلمه بيه يطيرون الفصل كله شنون اللاعب مال الطوبه بس يريد يوصل للكول بس شنو هو الكول ووينه ماعرفت الى ان وصلوا لفقره اول مره اسمعها اسمها ( المنافع الأجتماعيه ) يمكن ماموجود هيجي فقره بأي بلد ... اشو علكت مرة اللخ جماعة اليمنه يكولون نزلو منافع رئيس الوزراء وجماعة اليسره مايقبلون وجماعة النص ساكتين ، اشو السيد اشر لجماعته وكامو دايطلعون وهذا الرئيس اتخبل بعد اكثر وجان يصيح ( لك حيدر رجعهم من وصلنا لأهم فقره كامو ، هاي جيف المنافع سنيه ، ليش منافع الطالباني والمالكي فضوها ، جيف ذيجه شيعيه وكرديه ) ، قسم منهم رجعهم( حيدر) ، جان يكوللهم الرئيس ( هاي لو مخصصات جان التميتو مثل الذبان ) ، آني من سمعت كلمة الذبان ، ماادري شصار بيه كلت هاي تاليها الذبان صارو نواب يعني شنو قصده ، ليش الذبان وين يتجمع يعني هسه آني بالزباله ..صاح الرئيس ( حيدر عيني احسبهم ) ، بدا( حيدر ) يحسب وجان يكله استاذ اشو قسم رافعين بس اصبع وقسم اصبعين وقسم خالين ايديهم على راسهم ، الرئيس صار عصبي وكله ( النوبه انته عليه حيدر .. لك احسبهم حتى لو رافعين رجلهم لك عيني هاي اهم فقره ) ، قسم من جماعة اليسره هم اعترضوا وجان يزعل الرئيس ويكوللهم ( بسيطه خلي واحد منكم تحترك سيارته لو يتمرض والله ماانطي فلس ...طبكم مرض )....التفتْ عله( حيدر) ، وكله ها بشرني ، جاوبه( حيدر) ، وكله اوكي ، اكثر من النص أشو هذا الرئيس كام يطك اصبعتين وهو يصيح ( عله اعناد الشيعه )... وراها الكل كامو وصارت هوسه وضِحكْ ماسامعه بحياتي ، لابزمن( صديم) ولابها الوكت وشفتهم ديطلعون ، جان يرجع يدك بالجاكوج بس هالمره يضحك ، بعد صوكر المنافع ، وكللهم ياجماعه فد خمس دقايق وزير الصحه عنده حجايه وياكم ، جماعة اليسره رجعوا وشويه من جماعة اليمنه هم رجعو وجم واحد من النص، وبدا وزير الصحه يحجيلهم شنون طبت الفرقه القذره ألأمريكيه للوزاره واخذو الوكيل ... الصدك آني انقهرت وكلت لنفسي اكيد راح تصعد الغيره عدهم ويطلعون بيان يطيحون حظ امريكا لأن مهما يكون همه يمثلونه واحنا كلنا طالعه روحنا من الأمريكان....اشو الجماعه كامو يضحكون عبالك الوزير حجالهم نكته ، مناك وحده من نسوان اليمنه اللي مايخلوهن ياكلن خيار رفعت ايدها ..آني كيّفتْ ،وكلت لنفسي بلكي يطلعن النسوان سبعات ، وجان تكله للوزير وهيه تضحك هيه وربعها ( هسه صارت الفرقه قذره...هاي عداله... لعد وين وديتو الدكتور علي المهداوي ) .... واحد لاخ كام وكال شكو بيها من حقهم يطبون أي مكان ..باوعت عليه ، كلت هذا اللي جان خابصنا بالأحتلال ...اش غيره اشو بالكافتريا يصيح وير للأمريكان وهنا يدافع عنهم ، لعد عليمن هذا القتل والذبح صار تلث سنوات كلها حتى يوصلون للمنطقه الخضراء ويقشمرون الشباب ويكوللهم راح تروحون للجنه الخضراء.... هناك كام واحد من الساده ،وكال ( هاي جيف وزارة الصحه شيعيه هيجي تحجون )، وجان يكومله واحد من جماعة اليمنه وكله ( لعد ليش مافار دمك عا اللي صار بالتعليم العالي مو جيف وزارتنا وسنيه ) ، وهم صارت هوسه ، آني دخت، وكلت لنفسي هاي شغله جديده ، احنا نعرف السني من يجتّف ، والشيعي من يسبل ، بس الوزاره شنون راح نعرفها شيعيه لو سنيه !! اكيد ألأمريكان راح يلكونه ويسوولنه تصميم لبنايه شيعيه وبنايه سنيه ، ويجوز غيرو المناهج مال كلية الهندسه ودايعلموهم على هيجي بنايات ...كلت من ارجع للبيت اسأل ابني اللي بالهندسه ...

المهم ، حسيت بنفسي تِلعبْ ولو آني ما ماكل شي من الصبح ، واول مره يصير بيه هيجي وماحسيت نفسي ألا عالمنصه اللي مجان بيها احد ، واخذت الجاكوج وبديت ادك حيل ، بس شنون دكات مبينه مال واحد عصبي ، جان ينتبهولي كلهم وصاح المسودن ( لك انت منين وسخ ) ..جماعة اليمنه كالو ( هذا مبيّن عليه شركاوي ) ... جماعة اليسره كالو هذا مو من جماعتنا لأن ما مطول لحيته ، واحد منهم هذا اللي جان يركض ورايه عالجيش الشعبي وجان مفوض بالأمن كللهم هذا اعرفه زين هذا ملحد كافر ابو العرك ..جماعة النص ماعلقوا... بس جم واحد من جماعة المشكل باعوْ عليه وانقهروا عليه بس ماحجوا شي.....

آني بعد فقدت وكتلهم سمعوني ، عالأقل آني مآاكل حرام ، صحيح مرات اسكر من تصير عندي فلوس بس آني دائما صاحي ، وماكتلت احد حتى هذا المفوض اللي جان يكتب عليه تقارير ، بعدين ماأخذت لا دولارات ولا تومانات ولا ريالات .... صحيح فقير بس عندي شرف وغيره .... واهلنا كالوها ( الغيره كطره من توكع ابنادم يصير خنزير ويمكن الخنزير احسن .. ) ، أاشو كبل مااكمل هاجو كلهم عليه ،وكاموا يفشرون عليه فشار ماسامعه بحياتي ، والغريب اشو جماعة اليسره واليمنه واحد لازم ايد اللاخ واجو عليه .. . امهات اللكج صارن يم العلويات ويصيْحين من مكانهن عليه ، اشو صارت لمه ، وماحسيت إلا ب( حيدر ) ، يلزمني من ايدي ويجرني لفد باب صاير على صفحه ، وكلي اكلب اخويه تره بس يلزموك يشربون من دمك ، والله ركضت وشافني ابن عمي وكلي لك هاي شسويت ارجع ، عالأقل اخذ حسابك ، كتله ماريده انطيهمياه خاف بعدهم ماشبعوا... ماحسيت إلا بنفسي بالشارع وبديت ازوّع.. زواع ماصاير عندي طول عمري ، يعني مابقه شي بمعدتي ، بس الصدك حسيت بنفسي ارتاحيت ولو تعبان ومشيت من المنطقه الخضراء للباب الشرجي ، وهناك اتذكرت ايام زمان شنون جنت اكعد بحديقة الأمه آني والمره واحجيلها شنون ا من يطير( صديم ) ، نعيش احسن عيشه ، ومريت عالمحلات الجانت بارات ايام زمان ، واتذكرت ربعي ، نصهم كتلهم( صديم) جيف جانو يحلمون ، ونِزلتْ دمعتي من عيني ، كتلهم وين اشوفكم واحجيلكم لو تدرون هيجي يصير جان سويتو اللي سويتو ..وياريت اروح يمهم وين ماجانو بالجنه لو بالنار بس المهم الكي ربعي السباع اللي ما جانو يعرفون الخوف ، مومثلنا صرنا فيران.. ظليت امشي الى ان وصلت لساحة الطيران ، تلكوني ربعي واحد جابلي لفة فلافل واللاخ جابلي جاي وكلهم يضحكون صحيح وجوهم صفره من الجوع ، بس والله احلى من الملائكه...ما حسيت نفسي إلا وآني بالبيت ، سالت المره كتلها اشجابني هنا ، باستني وكلتلي ربعك اللي بالمسطر ..وهاي من ذاك اليوم آني بالفراش دا انتظر بلكي اصير زين وتفرج علينه ...



#علي_الصفار (هاشتاغ)      



اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين
حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل


كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل



رأيكم مهم للجميع - شارك في الحوار والتعليق على الموضوع
للاطلاع وإضافة التعليقات من خلال الموقع نرجو النقر على - تعليقات الحوار المتمدن -
تعليقات الفيسبوك () تعليقات الحوار المتمدن (0)


| نسخة  قابلة  للطباعة | ارسل هذا الموضوع الى صديق | حفظ - ورد
| حفظ | بحث | إضافة إلى المفضلة | للاتصال بالكاتب-ة
    عدد الموضوعات  المقروءة في الموقع  الى الان : 4,294,967,295
- في العراق..مجلس النواب ..الذي أبدع في وصفه مظفر النواب
- أيها المثقفون إنتبهوا ل..الوعي (( الشيعي )) والوعي (( السني
- مذكرات بريمر - سنتي في العراق - ألأيحاء بالسذاحه
- الحزب الشيوعي العراقي ...صح إنت كلش حلو ...بس موش كل الزين
- تداعيات إعدام صدام...دليل على أزمة العقل العربي
- ألأحزاب الدينيه الأسلاميه...مصادرة الرب وإحتكار ألأسلام
- قراءه لمشروع برنامج المؤتمر الثامن للحزب الشيوعي العراقي


المزيد.....




- شاهد ما كشفه فيديو جديد التقط قبل كارثة جسر بالتيمور بلحظات ...
- هل يلزم مجلس الأمن الدولي إسرائيل وفق الفصل السابع؟
- إعلام إسرائيلي: منفذ إطلاق النار في غور الأردن هو ضابط أمن ف ...
- مصرع 45 شخصا جراء سقوط حافلة من فوق جسر في جنوب إفريقيا
- الرئيس الفلسطيني يصادق على الحكومة الجديدة برئاسة محمد مصطفى ...
- فيديو: إصابة ثلاثة إسرائيليين إثر فتح فلسطيني النار على سيار ...
- شاهد: لحظة تحطم مقاتلة روسية في البحر قبالة شبه جزيرة القرم ...
- نساء عربيات دوّت أصواتهن سعياً لتحرير بلادهن
- مسلسل -الحشاشين-: ثالوث السياسة والدين والفن!
- حريق بالقرب من نصب لنكولن التذكاري وسط واشنطن


المزيد.....

- الحزب الشيوعي العراقي.. رسائل وملاحظات / صباح كنجي
- التقرير السياسي الصادر عن اجتماع اللجنة المركزية الاعتيادي ل ... / الحزب الشيوعي العراقي
- التقرير السياسي الصادر عن اجتماع اللجنة المركزية للحزب الشيو ... / الحزب الشيوعي العراقي
- المجتمع العراقي والدولة المركزية : الخيار الصعب والضرورة الت ... / ثامر عباس
- لمحات من عراق القرن العشرين - الكتاب 11 - 11 العهد الجمهوري ... / كاظم حبيب
- لمحات من عراق القرن العشرين - الكتاب 10 - 11- العهد الجمهوري ... / كاظم حبيب
- لمحات من عراق القرن العشرين - الكتاب 9 - 11 - العهد الجمهوري ... / كاظم حبيب
- لمحات من عراق القرن العشرين - الكتاب 7 - 11 / كاظم حبيب
- لمحات من عراق القرن العشرين - الكتاب 6 - 11 العراق في العهد ... / كاظم حبيب
- لمحات من عراق القرن العشرين - الكتاب 5 - 11 العهد الملكي 3 / كاظم حبيب


المزيد.....


الصفحة الرئيسية - اليسار ,الديمقراطية, العلمانية والتمدن في العراق - علي الصفار - مدرسة عبوسي المسائيه...... التي اصبح اسمها مجلس النواب العراقي