الحزب الشيوعي العراقي ...صح إنت كلش حلو ...بس موش كل الزين

علي الصفار

الحوار المتمدن-العدد: 1793 - 2007 / 1 / 12 - 12:10
المحور: كتابات ساخرة
    

(( يقال إن ناقل الكفر ليس بكافر ومايرد في هذه المقال هي أمانه حملّّها لي صديق وأقتصر دوري فيها على النقل الحرفي لها وإرسالها للحوار المتمدن ، ويعتذر صاحبها لعدم قدرته على الكتابه باللغه الفصحى وهي موجهه للحزب الشيوعي العراقي واصدقائه ..ألرساله باللهجه ألعراقيه الدارجه.)).

أول شي احلف بالحسين ابو عبدالله وأجتف للعباس ابو راس الحار وأكدلكم آني احبكم وأحب كلمن يحبكم وماإلي علاقه لابتروتسكي ولاباقر إبراهيمسكي ، ذوله سامع بيهم وماأعرفهم وماأحبهم لأن إنتو ماتحبوهم ..ألمهم آني صارلي أكثر من تلاثين سنه أسمعكم شكو بيها لو تسمعوني دقايق صحيح آني مو رفيقكم بس أني طول عمري وياكم وادافع عنكم ومو بس هاي لحد الآن أدفع لكم تبرعات يعني هم حقي عليكم .. راح احجي العندي وإنتو وبختكم لو تزعلون عليّ شويه لو تخلوني بخانة (( التسكي !!)) وهَمْ مقبوله منكم مثل ماتكول الأغنيه
(( عذبني أكثر وآني أحبك أكثر ))…………….. هسه خلوني أحجي إللي بكلبي….

كبل كم يوم شفت صديقي (( ابو سلام )) ومن إسمه مبيّن شيوعي رادني شاهد على طلاك مرته ، آني إستغربت كتله صدك جذب مو هاي (( أم سلام )) إللي إنتظرتك سنوات وإنت لو بالسجن لو مهزوم ، كلي لا بويه تبدِلتْ طلعتْ خاينه ، كتله يمعود كول غيرها منين تجيها الخيانه أشو بالأصل هي علويه وبعدين طول عمرها بالرابطه إشصار إشجرى ، كلي لاتروح بالغلط آني قصدي خانت الحزب ، كتله ليش شصار رجعوا الأمن يركضون وراكم ويجبروكم عل ألأعترافات واعترفتْ عليك ، ما معقوله إنتو خوش وِلِدْ وخوش حزب ماتحرشتوا بأحد من سقط ( صدام ) لحد ألآن !! وهذا همْ مات بعد منو يركض وراكم ….
كلي خلي احجيلك الحجايه تره راسي راح ينفجر ، كبل كم يوم جنت راجع من الحزب المغرب وإنت تعرف بغداد تعزّل من الظهر بس إحنا تأخرنا بأجتماع مهم ناقشنا بيه موضوع ( الخبطه الماركسيه أللينينيه) قِسم من الرفاق كالوا هالخبطه هي اللي سوت إسهال بالشيوعيه وصلتها لهالحال ، وعِلْكت وراها قسم كالوا صوج الرفاق السوفيت غشووْ الخبطه وخلوها تلث ترباع لينينيه وربع بس ماركسيه ، قسم ثاني من الرفاق إعترض وكالوا جان لازم ستين بالميه ماركسيه ، وعلِكتْ بيناتنا واحد إيزيّدْ واللاخ ينقص وماحد خلّّصْ ألأجتماع إلا أحد الرفاق اللي جان نايم وكِعد على غفله وحسمها وكال هسه هاي مو مهمه بس كولولي ماركس جان شيعي لو سني ، وانتهى ألأجتماع وكل واحد زعل عل الثاني…… هنا صُفنْ (( أبو سلام )) وكلي إنت وين ودتني وخليتني احجيلك أسرار الحزب ..خليني أحجيلك مشكلتي ويه المره ..من وصلت البيت إتعشيت وظليت أتفرج تلفزيون كلساع أحوِلْ لقناة من الجزيره للعربيه للحره للعراقيه ، اشو على غفله صارت(( أم سلام )) عصبيه وكالتلي يمعود ديره عالشرقيه بيها حجي راضي وعبوسي إشخبصتنا بها القنوات ،كتلها خلي نشوف شكو ماكو ، أشو صارت عصبيه أكثر وكالتلي وإنت شعليك أشو إللي يطلع بالتلفزيون لو شيعي لو سني لو كردي وإنتوا محد يذكركم ماتكوللي إش داتسوون بالمقر..هنا الصدك إنقهرت و صرت عصبي وكتلها هاي إنتي رجلج شيوعي وتحجين هيجي بعد ماكو عتب عاالغريب ، اشو زادت عصبيتها وكالتلي خويه الغريب ما يفرق بينكم وبين الساده حرف الواو وإنشال ( شيعي – شيوعي ) وتاهت على الناس بعدين إنتوا إشعدكم ، همه تلاثه يطلعون بالتلفزيون وبالشهر مره مثل الهلال ، وحك الليحجون لاآني ولا وِِلدكْ نفتهم حجيهم ، إهنا الصدك ُفقدتْ وشتمتها وكبرت بيناتنا ووصلت للطلاك كلشي أقبل إلا الحجي عاالحزب والقياده ، هاي فوك تعبهم يوميه يحضرون مية إجتماع برلمان وحكومه ومصالحه تاليها نحجي عليهم ، مو حقي أطلكها ولازم إنت اللي تشهد وياي عالطلاك إنت صديقي وصديق الحزب وشاهد على زواجي……

حاولت تهدئته وقنعته وكتله راح اكتب للحزب لتروح المشاكل بين الرفاق والرفيقات تزيد وتتكرر سالفتك وبعدين إتصير (( لا حِظتْ برجيلها.. ولاخذتْ سيد علي )) إقتنع بكلامي واجل الطلاك وكاللي اشوف إشراح تكتب وبعدها أقرر…

هاي هيه قصة (( أبو سلام )) إللي خلتني أتجرأ واكتب للحزب ومثل ماجان الرفاق الفلاحين يكولوون
(( بجاهك ياابو حسين وعساها إبخت لينين )) بلكي الحزب يجاوب لخاطر العوائل الشيوعيه عاد مو لخاطر العراق…

أبدي رسالتي من إللي إنتهت منه (( أم سلام )) ، تره حجيها صحيح ، هو منواللي يطلع بالتلفزيون من الحزب لو(( ابو داوود)) لو(( أبو نيسان)) لو(( صبحي الجميلي - ماادري ابومن )) أشو (( أبو داوود )) حك اللي يطلع ، يباوع ليفوك يعني للسكف ومايباوع لاعالكاميره ولاالمقدم ولاعلينا ، المذيع يسأله عن ألأرهاب والميليشيات وهو يجاوبه جواب ما إله علاقه يعني جواب مال السبعينيات وكتْ الجبهه ، عالأقل بذاك الوكت جانت اكو جبهه ويّه البعثيين بس هسه ويامن الجبهه حتى يجاملهم(( أبو داوود )) أشو إنتو صايرين بالنسبه للأحزاب مثل (( مكروهه وجابت بنيه )) بعد عليمن هالمجاملات . ومن يطلع(( أبو نيسان )) ويسالوه عن ألأرهاب يجاوب وعبالك ده يقرا قصيده مال نزار قباني ، صحيح صوته حلو مال مذيع بس الوكت مو وكت شِعرْ..ولو طِلعْ (( الجميلي )) جيب ليل واخذ عتابه كل دقيقه يحجيله كلمه يعني بين مايكّمل الجمله مية قنبله تثورإبغداد وهو بعده يحجي عل ألأرهاب بس مايكول إلنا منو هُمه عبالك دايحجي على افغانستان…
بصراحه ينراد إلهم دوره تدريبه يم(( مثال ألألوسي )) إبوحده وبلسانه بس حصل مقعد بالبرلمان وإنتو حك إللي شاركتوا بالأنتخابات رحتوا ويه (( علاوي )) إللي جان يركض وراكم بتلاثه وستين …

خو مازعلتوا ، المهم راح اكّملْ واللي يصير يصير عُكده وانفتحت.. مرات اروح للمقر إللي بساحة ألأندلس ، الصدك من اشتاق لأيام كبل وحتى اسمع اغانيكم (( مكبعه ورحت أمشي ،وشيلي تمر بالليل ….)) يعني شنون واحد يروح للمتحف ويتذكر ايام المكبعات (( المفروض تحولوها وتسووها محجبه خاف يزعلون الساده )) ، و هاي مال شيلي تخربني من الضحك لأن حتى بينوشت مات وما خِلص منكم ، بعدين إنتوا شعليكم بيه مو موجود بالعراق الف بينوشت كلهم يروحون فدوه إله……بس عدكم أغنيه قديمه لو تعيدوها هاليام تسوه (( امريكا يامنحوسه هدي كمرنا العالي )) عالأقل نقشمر نفسنا ونكول هاي أغنيه جديده تحجي عالوضع . …بعدين آني دائما أشوف (( عريان )) بالمقر بعد شتريدون جمعوه ويه (( كوكب )) و(( فؤاد )) وخليهم يطيحون حظ ألأحتلال والأرهاب والميلشيات ،بشرفكم عدكم هالزلم وتتحججون ب(( العوامل الذاتيه ))…

فد يوم أخذت إبني ويايه للمقر كلت خلي يتثقف عالأقل همه زينين بالثقافه ، هناك سألني على غفله وكلي شنو يابسه وتمن ، ضحكت كتله وين سمعتها كال أشو كلهم يحجون باسمها كتله يابسه يعني فاصوليا بيضه ، الملعون جاوبني وكلي يعني هذا هو ألأسم الشيوعي للفاصوليا يعني شنون ((ابو داوود )) هو ألأسم الشيوعي (( لحميد مجيد )) ، َنفْس الشي ، كتله حقك بويه ماقاري الماركسيه بَعَدْ.
وفد يوم جنت بالمقر وسمعت اصوات عاليه ومناقشه حاده كلت خلي اروح اسمع هم أتعلملي جم إحجايه ، المهم ظليت تلث ساعات ومافتهمت شي بعدين شفت واحد من الرفاق طلع منهم وسالته كتله الرفاق إش دايناقشون كالي موضوع مهم عن المراحل اللي مرت بيها البشريه ، كتله وين وصلو كالي بعدهم بالمرحله اللي جان بيها النسوان هنه مسيطرات كبل عشرة آلآف سنه ، صفنت وكلت لنفسي صدك جذب عمي الناس جوعانه والكَتِل بفلس، ليش منو يكول راح يبقى بشر بالعراق حتى تدوخون نفسكم بها الموضوع عمي لحكوا على جماعتكم مال ايام زمان تره أيسووّ منكم وتلث أرباعهم مكابلين الحسينيات يكولون عالأقل نحصل الجنه إشما يصير أبو الحسنين يفيدنا أكثر من لينين.. بعدين إذا إنتوا هيجي لعد ليش تحجون عاالجماعه من يناقشون (( السقيفه )) ليش ياهو ألأجدد…المهم دخت وإطلعت من المقر وإشتريت جريده (( طريق الشعب )) ولوْ آني حالف ماأشتريها ، بس سوله مال ايام زمان ، ضميتها بالعلاكه ليروح يصعد ويايه واحد من اهل اللحي ويقرالي قوانه ،المهم جانت الناس تحجي عاالبطاله والجوع والأغتيالات والميليشيات من اهل العمايم السوده والبيضه والخضره (( هسه لو اكو عمامه حمره هم جان كلنا ربعنا موجودين )) ، وكبل ماأتغده ومثل ما متعود ايام زمان(( داتشوفون حجينا كله على ايام زمان )) فتحت الجريده وكبل ماتصب المره الغده خلصتها يعني بخمس دقايق وخلصت لأن شتقرا بيها اشو الصفحه الأولى اخبار بايته حتى افتتاحيه مابيها ليش ماأدري اصلا احداث العراق ينراد الها افتتاحيه كل ساعه…خو بقية الصفحات كلها تحجي لو على امريكا اللاتينيه لو مقالات محد يفهمها واللي يقرا الجريده يكولك هاي العراقيين عايشين بنعيم ويناقشون هيجي قضايا ، بس عن الحلال والحرام مرات اكو خوش زلمه اسمه (( رضا الظاهر )) يكتب زين ولو يطولها بس احسن من الماكو…. هسه لو تسوون الجريده مثل السبعينيات هم نقبل عالأقل جنا نطوّل ساعات نقرا بيها ومرات نضمها لغير يوم.. شجاكم…وبصراحه ولاتزعلون عليه وهذا سر أكوله اول مره ، مرات اجمع فلوس الجريده مال يومين واشتري بيها (( البينه الجديده )) -- ولو أني مااصلي -- بس الصدك يحجون عن الشيوعيين كلش زين وينشرون مقالات لكتاب شيوعيين يمكن (الطريق) ماتنشرها.. المشكله كلما اسأل ألأصدقاء- قصدي الرفاق – ليش هيجي الجريده يصيرون عصبيين عليّ ويكولون شبيها احسن جريده لَعدْ احنا مو دانشتريها يوميه ، ودائما أسكت اكول خاف آني مخْرَفْ وماداافتهم ..لويمكن اكو نسختين وحده بس للرفاق ومكيفين بيها ، والثانيه لل (( مو رفاق )) وآني منهم .

ماأطوْلها عليكم ولاتزعلون مني مثل زعلة (( ابو سلام )) على مرته لأن هي حقها واحنا حقنا..تره الناس ماحاسّه بيكم ، لاتكولولي ظروف موضوعيه وعوامل ذاتيه تره ذني ما يتوالمن سويه من كيفهن ينراد الهن سباع يجمعوهن غصبن عليهن وانتوا خوش زلم بس ماأدري شبيكم ، يجوز
( الموامنه ) مسويلكم عمل كلشي يصير ، بس هم تكدرون تره أبو الحسنين وابو ذر يحبوكم الكم اكثر ، بعدين انتو مو شعاركم الجاكوج لعد ليش متيهين العمال اللي الكل يحاربهم وعينهم عليكم، صحيح همه مكابلين الجوامع والحسينيات بس كلها منكم ، عدِلوا الميزان وشوفوا شراح يصير بالنتيحه العامل يريد يوَكِلْ جهاله ونفس الشي ويه الفَلحْ ، بعدين أشو انتو زعلانين علينا ليش هو احنا عفناكم لو انتو..وقسم من جماعتكم يكولون العراقيين تغيروا وهاي حجه غريبه لعد هو شنو شغلكم غير تغيرون الناس ولو الناس زينين مجان اكو داعي الكم ، ابشرفكم بتاريخكم صايرتلكم هيجي فرصه ، استغلوها…… بعدين انتو قارين الوضع بالمكلوب ، قصدي مسطرتكم مو شيوعيه أشو كمتوا اتشبرون شبر حالكم حال غيركم تره الناس ملوّ منهم (( تعرفوهم منو ))، و واحد كام يعض باللاخ ، بس انتو طلعوا من المقرات ، انتو طول عمركم بالمعامل وبالكهاوي والمزارع هاي المقرات لغيركم..

اتذكرت فد شي فد يوم سالت احد الأصدقاء (( اقصد الرفاق )) كتله ليش ماتحجون عالأحتلال صار عصبي وكلي انت قاري نشرتنا الداخليه (( آني عبالي الها علاقه بوزارة الداخليه )) وجان يطلعلي ورقه مطبوعه (( يمكن بالطابعه مال أيام زمان)) وراواني سطر بالورقه بيه كلمة احتلال بس مالحكت اقراها كلها كتله هاي وين منشوره كال لي لا هاي بس للرفاق … ضحكت وكتله يابه تره إحنا مو بالسبعينيات عمي الناس تشتم اميركا ب (( الحره )) وما يديرون بال ، بعدين شنو شعاركم صاير (( مركتنا على زياكنا )) ولو شيوعيي الأربعنيات والخمسينيات والسينيات مسووين هيجي مجان طلع واحد مثل النواب (( اللي لايستثني احدا وبعقر دارهم )) والألاف غيره اللي تربو عاالمنشورات (( سووها منشورات ووزعوها..)).

بالأخير ارد احجي شويه عالمؤتمر (( بس لاتغافلونا وتكولوون سويناه مثل ماسويتوها بالسبعينيات وخبلتوا لصدام )) تره هاي فرصه وماأريد اكول الأخيره ، عمي جاوبوا على اسئلة الناس وجربوا تسكتون شهر وبس تسمعون من الناس راح تشوفون المساله سهله واحجوها بالعدل المشكله بالأحتلال وألأرهاب وألأحزاب الطائفيه والقوميه ، وينرادلنا وجوه اعلاميه جديده وبلكي تغيرون الجريده وإذا انتو صدك ديمقراطيين رجعوا الحزب الشيوعي الكردستاني للحزب تره كل رفاقكم ماقابلين وإذا ماتكدرون لأسباب نعرفها كلنا ، ديروا بالكم لايروح يطلع واحد ويطالب بتقسيم الحزب الى حزبين (( شيوعي سني وشيوعي شيعي )) لنفس مبررات الكردستاني (( أقصد الفيدراليه ))…..

باختصار رجعوا شيوعيين…

ولا تخلونا نكول لكم…

عمر وتعدى السبعين…وياثلج اللي ماوجيت

لو….. عبرت النمله جزيره….. وماتحرك شبر تمثال الرصافي

لو…… صح انت كلش حلو……. بس موش كل الزين

(( وكولولي إش أكول لأبو سلام يطلك مرته لو ينتظر المؤتمر.......))

#علي_الصفار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات