أزمه وعى

سلوى فاروق رمضان

الحوار المتمدن-العدد: 6523 - 2020 / 3 / 26 - 21:30
المحور: حقوق المراة ومساواتها الكاملة في كافة المجالات
    

عارفه يا صديقتى فى وقت صعب زى دا مازلت اؤمن اشد الايمان ان القضيه النسويه هى أم القضايا ، من الاحقاد الذكوريه اللى عانينا منها حقد اسمه( رمى البلى والوصم ) مثلا يوصمو النساء انها ناقصات عقل ، دا مجرد مثلا ، طبعا الاحقاد مع الوقت اخدت طابع الحقيقه يعنى مه كل حاجه من كتر ما برغى فيها بتتثبت ، بس خدى بالك من حاجه اللى بيقول لأمرأه تانيه انتى ناقصه عقل هو بيحب امه جدا وغالبا بيحترمها طب تعالى كدا اشتميه بأمه هيتجن ، طب الله هو انت ازاى يا أهطل بتشتم الستات بس امك انت بتظن انها بعيد عن كدا ؟ هنا بقى اصل الحكايه ، الوعى .
الوعى دا اللى عاوزه أوصله ، الثقافه بتاعتنا والمسؤلين عن الثقافه اللى هما للأسف أهمهم رجال الدين، ربو عقلنا على أساس الازدواجيه ،مثلا الاسلام كرم المرأه وفى نفس الوقت أضربها وتزوج عليها ،وزى مثل ناقصه عقل بس عند امى لا متتشتمش ، الثقافه كان أصلها زى ما قلتلك حقد على النساء ،أصبحت ثقافه عامه أصبحت مشكله وعى ،وعينا فى الحضيض ، طب ايه بقى مشكله الوعى دا انها استمرت فى كل شئ ، مثلا مسؤليتنا الفرديه تجاه المجتمع ، احنا اللى بنتهرب من الضرايب ونعيب عالدوله انها مش عامله مستشفيات كافيه مع ان المستشفيات اصلا بتيجى من دخل الدوله اللى من أهمها الضرايب ، أحنا منتحملش المسؤليه ونعيب عالدوله ، دلوقتى الدوله بتقلنا اترزعو فى بيوتكم وشفنا دول انهارت ، نروح احنا نعمل ايه ننزل ونزاحم ، أنا شفت ناس كتيره بتعمل كدا على الرغم انها معاها فلوس وتقدر تتحمل تقعد فى بيوتها شهرين مش بس اسبوعين ، النتيجه زى ما حضرتك شايف الناس اللى معاها فلوس زحمه الناس اللى مش معاها، فالنتيجه هنحط الدوله فى مأزق انها تمنع أى حد أصلا اأنه ينزل لأننا معندناش مسؤليه ، طب والنبى مش لو أنا معايا فلوس واترزعت فى البيت هسمح لأخويا وأختى العاملين باليوميه انه ينزل بأمان بدون زحام ، بس تيجى ازاى ، لأن أخرتها أحنا هنحط العبئ عالدوله هنشتم فيها ، هنتفزلك ، هنقول ان الدوله مش عامله اللى عليها والكل هيتحول بقدره قادر فاهم فى السياسه والصحه والاقتصاد ، طب نقول تانى ودا أيه علاقته بقضيه النساء ، برضه هقلك مشكله وعى . احفظها كويس بقلك وعى ، مش احنا بنشيل الستات مسؤليه التربيه والوا أما يطلع يشرب سجاير بنشتم فى تربيه الست ليه ، طب وانت ايها الدكر استحملت مسؤليه لا هو دائما مكان القاضى وليس المسؤل واقف للست قاضى بالتالى وقف للدوله قاضى لأن عقله أخد على كدا ، يشجب وينكر ويستنكر ، بس يعمل اللى عليه لا ، مش احنا اللى بوظنا عقل الراجل وبقى يقف بمنتهى البجاحه وهو بيخون مراته سواء بالشرع أو من غير شرع ويقلنا انا مش لاقى نفسى معاها ونفس الراجل اما مراته تخلعه يبكى ويتباكى عشان مراته هى اللى خربت البيت ، بيقف أمام الست كما يقف أمام الدوله ،الأخر هو المسؤل أما أنا فلا أثم عليا ، الأزمه اللى احنا فيها أهم ما فيها أن نتعلم الوعى بالمسؤليه .

#سلوى_فاروق_رمضان (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات