مين هو المثقف؟؟

طلال الشريف

الحوار المتمدن-العدد: 6360 - 2019 / 9 / 24 - 15:05
المحور: القضية الفلسطينية
    

لإنو في عصرنا الثقافة صارت جاية من الشبكة العنكبوتية أكثر من المطالعة وقراءة الكتب والفلسفات والتاريخ و الجغرافيا وعلم الإجتماع ..

يعني مثلا المثقف هو اللي حافظ سياسة؟ وإلا اللي عارف أدب؟ وإلا عارف سيسيولوجي أو علم إجتماع؟ وإلا طبيب نفسي؟ وإلا القائد اللي بيسمعنا كلام مصفط؟

طيب اللي بيكتب مقال أو قصة أو رواية وفيها أخطاء لغوية حقيقية وبيعرفش قواعد اللغة، بيرفع المنصوب وينصب المرفوع "وليس أخطاء مطبعية بالمناسبة" مثقفين وإلا مش مثقفين ؟

طيب اللي بيتحدث في التلفزيون في شؤون الناس وبيشوفوه ملايين وما بيعجبهم كلامه مثقف وإلا مش مثقف؟

خلينا نفهم اللي معاه مصاري وله أتباع وبيعرفش يفك الخط وما عنده مؤهل علمي ممكن نعتبره مثقف وإلا شو وضعه؟

اللي بيصلي وبيصوم وبيحج وبيخطب في الناس وبيفتى في مصير البشر وبيطلع حرامي مثقف وإلا مش مثقف ؟

اللي بيتحدث في أمور العامة يعني بيدجل عالناس في قضاياهم بالكلام الحلو هذا مثقف وإلا لا؟

طيب اللي بيسموه الرويبضة في اللاهوت مثقف وإلا مش مثقف؟ وإللا مين المثقف أنا مش عارف ؟

أنا لإني بشوف مدير المؤسسة الأهلية بيقولوا عليه مثقف وهو حرامي وبالمناسبة المثقف ممكن يبقي حرامي وإلا مش لازم يكون حرامي؟ وإذا كان حرامي معقول نقول عليه مثقف؟

طيب اللي مع تعدد الزوجات ومش مع تعدد الأحزاب و الأفكار مثقف وإلا مش مثقف؟

كنا زمان بنعرف وراسخ في أذهانا إنو المثقف محترم وأنيق وبيفهم إشي في كل إشي، فهل مازال هو تعريف المثقف؟ وإلا أصبح التعريف اليوم المثقف اللي بيعرف كل إشي في شيء واحد

طيب اللي له موقع عالشبكة العنكبوتية وبينهب ويبتز ويقمع الرأي وبينشر وبيمنع وبيحجب مشاركات الآخرين زي ما هو عايز هو مثقف وإلا لا ؟

واللي في المنصب السياسي هادا مثقف وإلا بس سياسي وطبعا هذا إذا كان بيفهم في السياسة ... مش عارف شو يعني مثقف؟

يعني المثقف بيعرف معلومات وبيحكي قصص؟

وإلا السياسي اللي بيخطط للتنظيم والحزب لازم يكون مثقف وإلا لا؟ وإلا كيف بدو يكون فاهم الناس وإدارة هاي القوي البشرية وحركة الحزب والمجتمع ؟

وبالمناسبة هادول الشاطرين في الادارة تبعت الثقافة الامريكية والمشاريع الإحتيالية، مثقفين وإلا شو وضعهم ؟؟

أنا وصلت لحقيقة إنو المثقف هالأيام الأفضل هو اللي بيعرفش إشي في كل إشي وكفاية بس يعرف تخصصه أو حرفته لإنو هو أقل الناس ضرر، لإنو اللي بيعرف كل إشي في عصرنا يعني هو المثقف اللي بيلعب الثلاث ورقات وصار أخطر واحد في المجتمع ..

ياريت حدا يعرفلنا المثقف علشان نميز بينه وبين السياسي وبين المعلوماتي وبين الحكيم وبين تبع الأدب والفن ولعيب التلات ورقات ... لإنو كل مثقف شايفه سياسي بس متخبي عن السياسة رغم إنو بيمارسها وبيقول عن حاله مثقف مش سياسي .. عنطزيات يعني أو لإنو السياسيين واخدين دوره ومفيش حدود ولا حريات ولا قوانين ولا نظام ولا هياكل والعالم تغير ومصطلحات ومفاهيم زي مصطلح مثقف ما ليها لازم ..

وخاصة. في بلدنا من ثلاثين سنة وين بتروح في ندوة في احتفال في عزا في فرح في طوشة في مظاهرة في الكوبونات في الوزارات في المعارض بتلاقيهم هما هما نفس الوجوه هههه هادول يا عمي طلعوا مش مثقفين ولا قادة ولا سياسيين هدول طلعوا ما عندهمش شغل إلا وين في تجمع ناس يروحوا عليه .. ناس فاضية ومساكين ما بيعرفوا غير هالشغلة و مقنعين حالهم وحتى أسرهم إنهم مهمين وقادة ومثقفين .. هادول مصابين بالشيزوظراطيا.

وهكذا كثير كلام ممكن أن يقال .. فمن هو المثقف تبع اليوم؟؟؟

#طلال_الشريف (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات