أخبار عامة - وكالة أنباء المرأة - اخبار الأدب والفن - وكالة أنباء اليسار - وكالة أنباء العلمانية - وكالة أنباء العمال - وكالة أنباء حقوق الإنسان - اخبار الرياضة - اخبار الاقتصاد - اخبار الطب والعلوم
إذا لديكم مشاكل تقنية في تصفح الحوار المتمدن نرجو النقر هنا لاستخدام الموقع البديل

الصفحة الرئيسية - الادب والفن - حسون رياض - ديوان الشاعر العراقي ناصر البدري















المزيد.....



ديوان الشاعر العراقي ناصر البدري


حسون رياض

الحوار المتمدن-العدد: 6348 - 2019 / 9 / 11 - 05:38
المحور: الادب والفن
    



1 /
قصيدة ( گماري )
**

كل قصايدهم ضگتها
ولا قصيدة الطفت حزني ..

أستاحشيت ..
أگعد بصفك
والزم أجفوفك وغني ..

ودي اكلك
هاك اخذني ..
وين ماتبرد ازنودك
أشعل اضلوعي كواغد

أودي ادنيك
أعله صدري ..
ولعب بشعرك وأذكرك
بــ الأيام النمنه بيـها بـغطه واحد

آخ لو تدري بوحشتك
بيش أساجيـها غربتك
انته رايح
بعد رايح
ماخذت جرحي بجنطتك

رادو يسدون
باب أسمي ولگوك ..

وسابگوني ..
وخلصت الگاع ولگوني
غاد من خصر الوفه واگف واحبك

ضمني ..
بس الليله يمك

أرجف ابابك أولايه
شارده من الضلمه وجدام السكاره

كافي ..
أكد اعله النذور الماتجيبك

كل كمر ..
تانـه قميصك
زنجر بعيني أنتضاره

شوفني شصاير بدونك
وجهي مترصع مثل ثوب الدفاتر

وحالي ..
حال الشتل عمره
ومطرت الدنيه مگابر

ارحم اضنوني يـ شراي النشد

عود ردتك عرس نجمه
تناوش المضنوك فرحه

وردتك ..
اتـنومه اعله صدرك
ذاك الينام اعله جرحه

ياحبيبي ..
الشوك مهره
ومايردها الحيله خاوي

وانه حمال اعله زغري !!

أسنين الم بحطب حلمي
وترس حلوگ الگهاوي

خلصت ريـة شبابي
أبين دخان الگهاوي

مدري ..
ياهو الباگ ليلي
وضلت أحلامي عرايـه

ومدري ..
ياحسبه الخذتني
وعفت وجهي أعله المرايه

ويـن اسافر
وانسه وجهك
وانته اسمك ..
تارس أجفوف الشوارع لافتات

بيش !
اعذرك دوهنتني ..

فراگك بدمي
مشه تنور حافي
ومايك بصف العتب مابيه الوحه

كون تدري الروح طفله
ليش كسرت المعاضد

وليش ..
لمن كبر ذنبي
هدمت كل المعابد

هيه مو حسبة شجاعة
مزاحم اشواگك كتني
وانته تدري الكلب واحد

الهاظمتني ..
كلبي جان امـزاود أمك بـ المحنه

جنت ازتـن شامتك
عن كلشي ضلمه
وشتل أدروبك نفانيف وگماري

كلشي سويته حرام ..
شوغتي
ودم المحاجر
والجكاير
والعيون الطبعن
بضهر الستاير
حسب أحسابك حرام

خاف من نتلاگه باجر
ردلي ديني
هاكثر مطلوبلي دموع وخواطر ..

ناصر البدري
( گماري )
—————————————@@

2 /
قصيدة ( ماسامحك )
**

ماسامـحك ..
معاتب الويـنك يغثني

عـودتني ..
أشتم رگبتك
لآخر ولايات ريـتي

وعلمتـني ..
كل وطن أشطب عله أسمه
بـحجة عيونك هويـتي

ليش ..
عفت العطش
يتـشلبه أعله خصرك

وأنـه گـتلك ..
يأمـه گـتلك ..
يـاكـمر حضني چـبير
لا تـبات أعله الشـواطـي

الشمـع ..
مايسترلـه شامه
آبـين سرداب العبي

تيـهتني ..
وانـه عبدك
منين أدبرلي محمد يـشتريني

طفحت الغربه أعله گلبي
ورگض مابين الصور رگضت دخيل

يافـضيحه ..
الـماتسدهـه عيون خير

شـايل أهلالي أعله متني
اوگف اتوسل سمـاك

عازتـك ..
خلت سمـاري
يسـجد الـ كلشي حضن

دير وجهك ..
وسـگي ضوياتي
يــ نـفنوف الشمس

بـغيبة عيونك ..
صدك حسيت بي هـيبه السجن

كل الولايات فرغة من مـشيت
أنته يا أول بنادم چانت عيونـه شعب !

يـاحبيبي . .
حزنك يـغرگ الـمناير
من يمر مـوسم نشد

آمنين أجيب إلها
رسول أمـة وحشتك

يـاحبيبي . .
الـغنه ياخذني أعله بابك
ووگف بهيئـة سـعف

يـاحبيبي . .
نامت الناس بعشگها
وأنه وعيوني الغريبه تايـهين بليل حزنك

يـاهو ..
يندلـني بـغربتك
ساجن شمـوسي حدر في الگصايب

شـاهد الله . .
العشك لو يقره النوايـه
چان شگگ منك أولايـة رسايل

يبست بـيه حلم يسوه الـخضار

شـما أصد لولايتك
تعتگ أرسومي

والگه عمري ..
رزق مكتوب الدكاكين الندم

مـرني ..
حنيني بسمارك

النهر ..
يتـحنه بـشبابـه
من تمر زفـة نوارس

فـاهيه أچفوفي ..
أمـنهد ذاك المگاود

أنـه و أنتـه ..
شمعه فـوگ الكمر چنـه

ومـن تطفي ضويات المدينه
نشعل الضلمـه بعـشگنـه

ماكو منـك . .
ولاكو منـك . .
وين اكو بنـادم عله زنـوده محطات الـندى

جانت رسومك
تكد عله النفس
وجان صدري
يستراح بضحكه منك ..

جيـسني ..
وشـدني بـقميصك
يـاضريح الراقصات

العمر ..
لو شـح اليگوده يموت فاهي

أخلاف وجهك ..
صبخـه صارت گاع روحي

وشبحـة عيون ..
السنابل و الـگطه

ومارسـه للحنطـه لون ..

گافي تـنذرني
متن لهل البيارغ

مـالي حيلك . .
لا أنته معبرني
من ليل المحنـه

ولأنـي ..
مستاهدلي ريل
يسافر الباجر شمس

ويـن ماصـح سچـه
تفضحني صورك

مدري ياهو ..
الشمر بيه سـر حمد

كون ماخذ ديرتك ..
چا ويـن أعيـش

المايشد ..
شوفـه بگصيـبه
أتـفـحط عيـونـه الأغاني

ويگـضي عمره
أبـلا هويـه ولا وطن

يـاغريب الگال ..
محراب القصايد مايشور

ياحريمـه ..
وتايبين ..
وحاسبينـك ..
ذني ذمـه بكل مناره
ذني تاريخ بسماوات العشگ

وأنته أول عشگ تارسني حزن ماسامـحك !
.
.
#محراب__القصايد
ناصر البدري
—————————————@@

3 /
قصيدة ( بنات )
**

مدن خنسه !!
ومحابس تارسه الگيعان
ومسابگ حلم مذعور
لهوگ شفة البيبان

ياعين التلم اليل . .
والغربه ضباب أسود

دخيلك ياشمع . .
متن العروس نباگ

بيش ؟
آعبر سراط الحيف
حزنك نهب گمريتي

طميت الگصص بالماي
من شفت النخل مگرود
وجروح الگناطر بيـض

مضيف الدمع . .
مـا يـلتفت للـمرتاح
فاتـح بابـه لليـبچون

الي بدين الگمر ميـلاد
لچن محرابي مامبخوت

كون يموت . .

وبـيش يموت
الظم عمره ولگاه مبيوگ . . بـيش يموت

ترى بعين الستر مايوگف الشباچ

لـون أدري ضريح الخوف
يكره شارة الضويات
چا شلت الضلام نـذور

ولـون أدري المطر سلعـه
ويصعد سعره وكت الگيض
چا صليت لـــ ناعور

خسارة طين هاي الناس . .

أدور لــ نـهر شـوباش
ماتدري الوطن مطـعون من مايـه

أثـاري العمه مو للشوف لــ النيه

الجرح مو فطن . .
بس يندل بياهو يطيح

ليش نسودن التواب
ونـچملـه بذنب مغبـون !

شراع بليس ماصـله . .

خلـونه نعرف حسين
حتـه أنعرف ياهو الله

أهي رگضـة عمايم . .
والنفس ممحل . .

گـضه عمره الشهيد يعيش عالحيطان
كـافي تخلف امي وتنطي للگيعان

وطن وعـره تجاعيده . .
مايغسل حزنـها الدم . .

تـيجان السفن تنهان
من يكسر خشمها الماي

نرخص . .
والخشب شراي

هذولـه أحنه بـلايه گلوب
من دور علينه الموت
لـبدنـه بسد رسايلنـه

ولوحدنه . . .
شـما يلصف
ذراع الخوف
تـتگطع معـاضدنه

ياخذنـه
ضـمه النسيان
لاخر آخ ويـردنـه

لوحدنه . . .

أبـچي أعله القصيده المشت
مرعـوبه بنوايـه الناس
لـيمت يستحي التاريخ
ويـركـد الحلم بــ الراس

لهسه افلاحة التابوت . .
تحصد بالثـكاله عيون . .

ولـيليه السجن عريس
والزفـه شليل نحور
ياهو الستر عرض الگاع
من حبـلن بـنات الهور

كـل فـزة خصر ملچـوم . .
يـثمل شارب السجان . .

وين الگالي ،،
عفـة شوك ،،
تغبش لــ تراچي زلوف
وحنيـها بشمس روحي

انـه بضعن الكمر فارس
بس هيه الگماري ألـوان
شسوي الگصـة العاهر ولا تعرگ

مادام الجفن ناطـور . .
مايـثبت جدم لــ طيف . .

النجمه الماحضت بهلال
تسجد گنطره الـباچر

نوبات الكتب عاجر . .

تـغص عين الشعر ويـموت
بكل صفنه أثـنعش شاعر

سبحانك . .
يــ المرصع ضوه وبلـور

ساكت . .
والدعاء كادود خمس أوكات

چا يمتـه تـفك الباب
يـهلبت من سماواتك عذر يسوه

چم زمزم شربنه متاع . .
من طاح العطش سجيل . .

لاصرنه ربع لــ بليس
ولا صرنه ربع جبريل
ضـعنـه وجـيل يسحگ جـيل !

ناصر البدري
( بنات )
—————————————@@

4 /
قصيدة ( حجل فصلية )


نشف شط الگصص
وأنشطب رب الهم
ولا عثرة هـوه تحرك زراگ الدم

أحس روحي . .
ضوه مصلوب . .
شما جاسته زلوف الريح
يتكسر بحضن الماي

وبهداي أحترگ بهداي
گضه عمره الشمع من يحترگ سكته

وين الگه اليهيسني
درفعني الحزن حد ماصرت كاروك

وصواني الحيف . .
تتبده بتجاعيدي . .
من تلچمني المرايات

خذتـني الحسبه لآخر نجمه بــ تاريخ

وصوتي
يكسر المحراب ،،

جا يمته الـذمم تنجاس
ساعه الكاس بيه يـدير
وساعه أنـدار فوك الكاس

وتوبن ليش ..
مهي التوبـه
عروس الكيف
مو فصليه للقران

أنه أنسان ..
شايل من زليخه هواي
لچن مامش صنم يسوه

عساها بكل وحي
ماقدس المعبد ،،

سبحانك
يفيض الغوث ،،

شنو ذنبه ويطيح الغيم
من يطوطح الدخان

وشنو ذنبي ؟
عايشلي بحلم تايه
لا لاگيلي عين تنـام
ولا لاگي اليفسرني

واضحك . .
من تگلي الناس هنيالك

هـنيالي عليمن
عـلـ حزن عـلـ غربـه هـنيالي

بنادم . .
ضال طرگ الطين

لو عندي
بخت مملوح
جا طحت بوجه موسى
روج الشيب واصل كسرة الحاجب

وكـل تابوت . .
يخـزرني خزر عاهـر
لـو مشطت عشريـني

ومدري أشـچم كمر ماشيت
ولا واحد تـرس عيني

أشوف الناس . .
تتبـده شليل أوجـوه
من يثـگل حجي الغربيل

وعفيـه أوجـوه . .
تغـفه بـنية أسليمان
وتغـني بحلم بلقـيس

چا عدمن أضم روحي
الـيضم حلمه بـحضن فانوس
ينباگ بشبر هندس

ولو أدري . .
بـعيوني أتـوب
چا ماصـلي للـقمصان

بس مجبور . .
السچـه التنـثلم تكسر ضهر لــ ريل

شـينفع حضن الـولايات
الـماعنده عرف بلــ آخ
وكت اليل ويـن يبـات

تعبت هواي . .

رسايلـهم ملح صبخـه
وأنـه بـكل مطر ساعي

وهـذا أنـه . .

من فزن نثـايـه اليل
شـلت حـرزي
نـوبات الرسالـه أتصيـر علـويـه

عزيز النخل وكت العـوز
يـحلفـون بــ تراچيـه

بـيش أنـعاك . .
ياتفاح كـل جبريل

أوين الـگاك . .
ياسلطان كل گمره

ويــ الـحضنك دفو السبعين
تعال وخـل ترد روحي
وخـل نـختمر طين بــ طين

وحـگ الـيوجعني . .
بـكل هـلا متانيـك . .

أنـه بدونـك
مضيف أذنـوب
وجـواز السفر لــ توبـه تـتن يلـهث
طاح بشفـة المنـهوب

أنـه بدونـك . .
حجل فصليـه !
زفوهـا أعله كـل داود

وتـانيتـك . .

تـانيتـك خرايب وهـگ بيـها الخوف

وأنتـه ولا ضعن منـك

شـبشرنـك . .
يخفگـني السبي شراعـين

لو مرن هـوادج شايـلات أسمك

وشهـگك شهگـة الـمروح . .
من تـگرم ضلوعـه الگاع . .

شمـالك ياعطيت الله
چم يعـگوب شگـگني
ولا مـريت
ولا چنـك بـزر حضني

ربـيتك غصن مبيـوع لــ دخان
چي شافـوك محراب الـعصافيري

ماتلـگه وطن مثـلي
تعال وسافر بروحي
أنـه وياك واحد وطن لــ ثاني . .

ناصر البدري
حجل فصلية -
——————————————@@

6 /
قصيدة ( العش امام )

بارده عيون المدن
والدرب بارد

وتايـهين أنـه ويگلبي
واحد يدور أعله واحد

هوه هذا اليل ..
من يبرد يلـم ويـن الحنين

والغريب ..
عيونـه تـتبده أعله گلبه

وتاخذه متاع المناجل
وين ما خضر هـلي

أخ مني ..
شگد بجيت
ولا عرفت عيوني عدمن !!

ولا دفو رويحة حلال اليلـتفتلي

كل دفو ..
يكره بنادم
من تصير النار عاجـر

أي يگلبي ..
الناس غشمه

الماله بشباچ گـذله
يطيح من عين الرسايل

تعبـتني ..
الشوف لو جاسه التعب
شده بقميص

ولا تزعلك نهر
تشبع فطور

ليش ..
باهلت الضفيره
وعطشت هيبة سمارك

وأنـه عازلك شريعـه
بوكت چان الماي
جف وعين سعره

چنت الوليـلك بحزني
وگتلك الكاروك لـ ثكلـه عزيز

( وانـته أعـز من الرساله )
السوفت قصة محمد ،، عد محمد

شوهدناك ..
وسافرت لدنيه طين

شحصلت منه ..
الترست عيـونه هاك

وانته ذاك ..
اليضحك بواهس عشيره
وماله بـگلوب الخلك گرصـة مچان

ولأنـي أندل ..
بـ الوجوه الماتشبهك
يغار من عدهـا الكحل

وأنـه ريحـة ضوه مهزل
عايش أعله الهلبت الله

لا خذتني الفاجده أچمل حزنـها
ولا صرت بزر التراب

وبـاب بـاب ..

أتوسل عيـون المگابر
ماتفك لـ عيوني باب

وين ماصيرن نبي
يفضحني غار
وتطلگ الدنيه قريش

هاي وآدم ..
موش وادمنه يگلبي

كل ذنب يـعبد بكيفـه
بكيفهم لليليه رب

ومدري ليش ..
خلقو التابوت والچربايه
من نفس الخشب

ومدري ليش ..
السله حطت گورهـا وگور العنب

وآخ يا ذاك التعب ..
بدو سنين الندى بحضن الگصب

رخصو دمعة حمامه
وضمو آمتون السمه

وأنه أدري ..
الـعش أمـام !
شور بكل شجره
ما فكت خصرهـا

مايشبهـونك يگلبي
ولونهم مايشتهيـنه

الخلك كلـها شراع هندس
واحنه فانوس المدينه

ناصر البدري
العش امام
—————————————@@

7 /
قصيدة ( ضحك ساعة )


نمشي ويــ الدهر دخان
محد يـعرف أشـبيـنه ،،

ضعنـه !
ولا يـصح نـادر
يدلـينه علـه أسامـينه ،،

متـوازيـن
نتوسل سـمه البـيبان
حته الغـربه ضلت ما تلفـيـنه ،،

مليـنـه !
يـذاك الفـوك مليـنـه ،،

شوف التعب
شمسوي بــملامحنه ،،

واحدنـه ،،
مسيـة أرمـاد
بخـزرة هوه يتكسر

ضاگـت ياچـبير الغـيم
هظيمه يمشط العاگول يـم مراية العنبر

ماضل للـعذر شـفه ، ،

شمسويـن
حتـه تـسد دكـاكيـنك ،،

گـنالك أخذ صوغـة خـواطـرنـه
وبـيع الـنه ولـو حسبة ضحك ساعه

عطشانيـن ،،
أجيـنه من الشمس حفـاي

مانـدري ،،
الجرف مكتـول
والمحبـس بـجيب الري

ولانـدري ،،
الصحاري اگبـور
متروسـه جثـث للـفي

لگـينه الدنيـه ، ،
سـوك حظوظ ، ،

والميت دفن گلـبه
ورجـع خطار ويـه الـحي

المن بعد نتـمنـه ،،
أشـو صارت القسمه ألـوان

نـاس أنتـرس خدها أوداع ،،
نـاس مـرافگـه النـعـناع ،،
نـاس تهـفي للـتيـجان ،،

واحنه تـگول جـف أمـراد
گضتـنه مـرادم الحيطان ،،

شفنـه أوجـوه
مايسـوالـهن ضحكه ،،
ويـوميـه بـحضنـها يبـات تـاج الحـور

تـضل الـياوكـت معـذور ،،

يـراعي (( الصـّــور ))
أنـطي الصـّــور لــ سـرافيـل
خـل يـنفـخ أنـريد نـمـوت ،،

حـزنـه ،،
شـراع مـتسـودن
يـفتر زفـه ويـه النـوك
واحـنه أعله الذنـب نيشان

المن لـبستـنه ثـيـاب
كـون أدم نـزل عــريـان !

سحـك ،،
تاريـخنـه الدفـان

شما يـلمع نحر عريس
يوگفـله الضلام أرماح

شما نـقنع هـوانـه يتـوب
تنشـگ ريـة التفاح

بعد مايـلحگ الها أهـلال ،،

سامحنـه يــ المعزب ،،
هذوله احنه بمظيـف عيونك مدنگيـن

ولا واحد حضـه بـحلمه ،،

آشـنحط لــ مرورة المغرب
عدنـه اگلـوب ما تسـتاهل اللچمه ،،

دورلنـه فجر نشـمي
يرد حـوبة لـيالـينه ،،

ومر عله الـنوارس ذيـچ
نشـها بـطرف نـفنوفك

بلكت تفـحط من الشوك
وتـحط بـشواطيـنـه ،،


ناصر البدري !
#ضحك_ساعة
————————————@@

8 /
قصيدة ( عذاب ابيض )


صبغت العمر
من لونك ،،

وگلت !
ماخظر بلياك
أضل يابس ،،

أضل يابس . .
لحد ماتمطر عيونك

عايشلك خشب عفه
ودرب الجفه واهس نوح

مابسك . .
دلم ليلك

أنه ومرايتي ،،
من الحزن ،،
مثـل الغربـه نتـلاگه

يـ ناهبني . .
أعله حجـة غار أخـذ حزنك

كونك . .
مو نبي ،،
ومبعـوث ،،
المن بايت بروحي

ساجـني . .
بسماواتك
كمر مگرود
لا معبـد يناغـيـني
ولا ذكروني يم كاهـن

تلچمني . .
وگول تهـون
السمار يلـوگ للـمتعوب

وانـه شچم دوب
أشد حيلي بتصاويرك

السهر . .
نوبات مايغفر
چم أهلال
فوك أهلال
گام يبات بضلوعي

دخيلك ،،
ياسـراط ،،
الشوف ،،

شني ولايـات غيرك دوم
وأنتـه ولايتـك صدفه

يهلبت . .
تـفگد أهـلالك
صار أسنين ماغنـه بسماواتي

لاگـيني . .
يملح الدين
أشگگ ليل اليعبـدون وسجدلك

دلاگـيني . .
بفضل منك

مهو الشلال
من يتـلاگه ويــ الـگاع
يتبـده عراضـة ماي

وأنـه . .
اليوجعني هواي

أجيك منين
بعيوني ضوه براهيم
ودروبـك حطب تاريخ

اگـول . .
شمالـني ستاحش

أثـاريـها الصور تعـويد
من تندگ علـه الحيطان

گـتلك . .
لاتـوهدني
شمس ماصير
أفضح كل غريب ستوطن بروحك

أبشرك بـيش . .
گضـه عمره الضرف كـادود

أودي أجفوفي ،،
ويـكل طيف ،،

چف بــ جرحك
وچف بــ رساله يگـود

يــ مدري . .
وعـايش المدري

لا نسيان يرضه يكسر أصنامي
ولا ميت ورد لــ الله عـذاب أبيض

ناصر البدري
عذاب ابيض
————————————@@

9 /
قصيدة ( ثلج جذاب )


طفت بيه المناير والضوه تـلثم
وشگـيت الرساله من الجرح لـدم

يـثاريني
خشب مگرود

كل ساعه بنـويه انـگاد
وكل ساعه عبد عد نوح

وسـمار الــ آخ
حيل ملـهوگ شفافي

ليش أظلم بخت تابوت

وليش يموت . .
الـمايدري أعله ياهـو يموت ،، ليش يموت

مهي الدنيه
حـلاوة كاس
لـچن تملـخ أصفاح الـريح

ياهو اليـنحنـيلي أهلال
من يطيح محرابي

چا هوه المطر لو طاح مايندل
بس الكاع تفزعلـه شليل فطور

يـهنياله
اليجيسونـه ويـصبح طين . .

وين الگالي
گرصة غيم
ماجايسهـا چف دخان

دثـيث الـگيض لهوگـني
وأنـه أحلامي ورديـه

ولا ناعـور درفع گـصته أعله الماي
من شـاف العطش مگـرود

بضنوني مهر ممحل
ضل بطرگ الـمبارك

بيـا فصليه أشد ذنبي
أذا مو جف عرس ماتـخدر الحنه

زرعت البرد
خمس أوكات
بس ما خضر أبراهيم

يـثاري الشيب مايبرد ثلج چذاب !!

وين الگـه
وحي التفاح
بعيوني حجي حديـثات
أريد بنادم يبـلل گصايـبهن

أريد أنسان . . .

حتـه يصدك أنـه أنسان
ما كاسرت عصريتي بـنفس غيري

بياض أذنوبي يشبـهني
مارگصن رگص عاهر

آثاري الدنيه ،،
نـاس و نـاس ،،

شجاني
وهدنت روحي وصرت يوسف

شليل البير
مايلـتفت للـقمصان
ياخذ رزقـه عالـطايح

يحلمي !
السكته ماتـشبه درب لـوني
العدهم مالت الله باگو عيوني

ولهسه زلـوفي تگرهـني
چي متن التراچي نـباگ

وقرآن الشمع مغبون
شگگ شارة الفانوس
لمن صعد سوگ الطيـش

شـلي بعين الولايات
الـشابع ليل يدري النجمه وين تبات

لا تلبـس گـفه الماشـين
ترى بعين السهم مايوگف الكاروك

ماكو بـكيفي و بكيفك . . .

عله صدر النهر
يتبـختر المشحوف

ومن تغـثه خورت ماي
يوگفلـه ثـنعش مجـذاف

يحلمي
الجنـه مـوش النـه
ليش نـتوب !!

عتگ شـباچ بستـاني
تعال استنگه المرطبـات

تعال اشچم كمر تاناك
وانتـه معاشر المدري

آتيـه بنص تجاعيدي
من أفـوت بسچة مرايـه

تعال عليك . .

أنته عليك . .

هوه أنتـه قسم عشاك


ناصر البدري
( ثلج جذاب )
—————————————@@

10 /
قصيدة ( ياحزن غني )


ياحزن غني وجيس الصواب
تانيـتهم حد ماغفه الباب
من ياعشيره عشك التراب
زفيـتهم شاب بظهر شاب

القمصان عندي البير جذاب •
.
.
ياحزن غني وگود الضنون
شيخيط صواب اليموتون
بكاس الرسايل دير العيون
وبراضـه گلهم وين يردون

الـوجه السهر مايـنفع نگاب •
.
.
صبح صباحي بلا زرازيـر
چم دوب أحشم بــ التصاوير
صاير مثل حال التـنانـير
محروگ كلبي بحجة الخير

وتدري الحنين يلچمه العتاب •
.
.
ياحزن بسك غمض ونام
عمر المطر ماخرمش الجام
لا ترسم اعله مرايتي الـثام
تغث اليفارگ چلمة حزام

ونـوبات تلگه بگلبه عطاب •
.
.
ياحزن ربعي التعگر الشور
لا ردو ولا الـــهم اگبـور
مستور خل الحچي مستور
بـيتي أنهب والباگـه ناطور

والهاظـمتني صار طـلاب •
.
.
ياحزن مايـك كـظ بــ الرياگ
وشفت الجناسي أمطفحه بـ الراگ
أعزاز بيـها وبيـها عشـاگ
وبيـها الوفي من السور للـساگ

وبيـها النشامـه الچنـها محراب •

راح الكلف والحلوه ذاتـه
وراح اليحلفن بي خواتـه
ذاك الرهن گلبه وعباتـه
ورد جايب اگلاده البناتـه

ذاك الچريم الينطي الثياب •
.
.
كون الكلب لو مره ينشاف
جا بسطت بــ الـگالو خفاف
ارد ستغيث شيوخ السلاف
ليش الحنين بساع ينعاف

دولاب ثاري الدنيه دولاب •
.
.
لا حمد شفتـه وَلا أگـهوته
سكته الشمع يحترگ سكته
هوه انـه شنهي الماجرعتـه
أمنـهد الجفوني الضحك عفته

ولـهوگ عيوني ضيم الغياب •
.
.
اي من عساها بـرگبة البين
باچي لحد مابين الطين
بـغربة صورهم تايـها العين

والموت حط گـوره ويـ الحباب •

ناصر البدري
ياحزن غني
——————————————@@

11 /
قصيدة ( العمايم )



بلايه شفه
الموت صاح
بشر عيونك يـ نايم

اليريد
أيعيش باجر
يركب بـ ريل العمايم

اگعد ..
اگعد ..

صار شوك التربه باهت
والجوامع فاهيه بـ عين السكاره

وخوفي ..
لا يرخص الدين
وربكم أيصبح خساره

بـ يا حلم
ضيعت عينك

بـ يا بخت
جرحك تنينك

خذو من گلبك گصيبه
وقشمروك بــ حاسبينك

وهمه ؟؟
بيمن حاسبينك

حاسبينك ..
لـ الضحك للـبيع للچلمه الرخيصه

يابساتين البنفسج عين روحك
الك ثلـثين بمطرهم ليش يابس

فنك ..
تكض الشمس
وتگودها الباب الحرامي

اگعد ..
اگعد ..

ديرم أشفاف الصريفه
وشيلها بواهس مضيف

واسگف ..
العوز بـ عباته

الـ صدك نادر
يفزع گلاده الخواته

أمس جان
الغيم خير

أيبدي روحه
وين ما عد الله حب

ومايعطله دعاء

الگاع من فكت صدرها
مطرت الدنيه عصافير وشلب

اي يـ شيال الطواري
أشتري النعشك أمتون

ولبس !
أسنين النشامه
الترست الـ عفيه هلاهل ..

كل عشگ تكبر بعينه
لو متت فوك الرسايل ..

ناصر البدري
العمايم
——————————————@@

12 /
قصيدة ( ريش التوج )


شيلوحك
يريش التوج ..
رمده اسراري يم صبحك

عينك ..
قرية زنجيـه

ورموشك ..
نحر شاهين
ترگص للهوه وتضحك

تضحك ..
والغرف يقضه

تضحك ..
والمسچ نعسان
بين النهد والفضه

اعله هونك ..
يانمش مرطوب

اعله هونك ..
يمن حدر الثوب
شايل لـذة الممنوع

عليمن ماتحاجيني !!

هذاك انته
يحتـه بنومي ماردك
تطب گبل الحلم للعين

ياهو الماسح
جفوفي من أصابيعك

أشو لميت اغانيك
ورايد تجفي عصريتي

چا وانه ..

چا وانه ..
يـ شهر التوت
يـ شغل الله
يـ المعتبر

يـ المعلمني
أخضر شوك

اخضر شوك
من برحية البصرة
لحد اشفاف المگيـر

اشوفك
تقره بسرارك
وصوتك بـالغرف مدفون

وشوف الزعل ..
سچه اتسابگ أجدامك

أمش عنه ..

أمش زفه بشرايـني ..
أصبـح شارع السعدون

أمس !
من هومـشو دينك
فزعت من الگهاوي أچفوف

أمس !
من غرگت أسنينك
غديت بكل شبر مشحوف

أنه موصي العيون عليك
حته ويـ الضباب أشوف

تذكر ؟؟
من يبس
محصول گمريتك

صرت ..
فوگ النجم فارس

أعصر صفنة المحار
وترسلك نهر ونطيك

وماخليك . .

ماخليك ..
ترجع لهلك بوحدك

أخاف عليك ..

سيفـين ..
أعله مهره
جنت اروح وياك

ذليت ..
السموم أسنين
من جاسك بـجنحه عناد

وكل ماينشف أترابك
اضملك طين بـ الميعاد

باريـتك ..
شتل نعناع
والوادم رمل مالح

تشلبه أعله حلگ الماي
خاطر لا يشاور رغوت أشفافك

أوهــستك ..
ودللـــتك ..
وگتلك لاتهم بـ الموت
الي بشعب المطر ثوار

شلتك ..
راية فضيه
بچتف مبعوث

وتعنيت الصدر زمزم
اجيبلك مهر بارد

ماهمني البراگع سـور
ولا همني ورق منحوت

مادام ..
الدرب درويش
ماهد للملامة عنان

الصوت ..
اليفلت من الخوف
يرفس سكتت الحيطان

انه بجفك ..
نذر مجنون
أهب الخاطرك حرمل
وسود وجـه چرچفهم

شكثر ..
هـفو العصريتك
وشدلك بـ الضنون حبال

شكثر ..
صلبوني عد بيتك
وفز ووگف صبر تمثال

اصعد ضحكه ..
يم شفة نـواويسك

وضم القحط بهدومي
ونزعـه بحضرتك شلال

أنه ..
الشالت
ضلوعه أشكال

جبتها أمكاون ويـ العوز
من أمناشغ الكاروك
لاخر شوغة بـ الحمال

عمر ماكدرتـلك بال
واگفلك كرم خيال

املك بس هلا
وفايض بحضنك هاك

حسبالي ..
فوانيسك مثل گلبي
تزت الگمره للـشباج

أثاريها خيم خنسه

تصعد للضوه من الجام
وتخنگه بحبل سجيل

بعد شيفيد ناطورك ..

كل سيف ..
الخطف نحري
لگيته بـ قلعة أنذورك

كل مشعل ..
دوه بصدري
طلع من صلب تنورك

ادنك لونشدني أرباي
من يادمعة اسد ديني

الفخاتي ..
الكبرن بصدرك
تبرن من بساتيني

ياخمره ..
التواسيني

ياكاس ؟؟
اليطفي الكيف
وانته بكل عتب برزخ

عذابك ..
يرفس بروحي
مثل رفست جنح مگروص

كتلك لا تخلي الناس تقراني
صحاري الصنم
تكره ضعن اليصلون

ردتـك ..
گبه للمهظوم
ماردتك رمل سلمان

شحط النيـتك يالون

توسمني ..
بدمه المكتول
وتردني بشارة للسجان

ناصر البدري ،،
عليمن ماتحاجيني
—————————————@@


13 /
قصيدة ( بالعافية )

بـ العافية !!

يـ النايمين أبلا حزن
وخدودكم ديرة گطن
تنگط نداره وصافيه . . بـ العافيه

قسمتنه نطفه ويـ الشمع
وعيونـه الشبعت دمع
للحلم تركض حافيه .. بـ العافية

شطين ياخذنه الندم
ونضل عطاشه أبابكم

جبنه الفرات بـهيبته
وماطفه حر صوابكم

جا ليش ..
خاويـتو الجفه
وگلوبنه محمله وفه
لافض جرحنه ولا شفه
ولا بخت عدنـه وجابكم

حسبالنه ..
الشايل تعب
بأجر تشيله أولايتـه

ماندري ..
ابو كلب الصدك
لو طاح تخلص عازتـه

سولتنه ..
تبدي من الكلب
واليل چتال الغرب
كل ساعه يلچمنه الدرب

ونطيح طيحة خايفه

صلفه ..
اليالي أبلا صبح
وشينومه البـجرحه ملح
وچماله لو حن الجرح

يرجع الـ الأول سالفه

بغياب عطر أچفوفكم
ماضحك سن بـيبانـه

نصرخ وأسمكم لو رجع
نشبگ صدى حيطانـه


شي سكته ..
المفارگ هلـه
تلگاه عيونـه أمبللـه
الليله المعاتب حله
ويجوي الضلوع اعتابكم

يوميـه يسبينه البرد
وأنتم شمسكم طافيـه

يـ النمتو ..
مدري بـيا حضن
نامو عسأ بـ العافيـه

ناصر البدري
بالعافية
—————————————@@

14 /
قصيدة ( جويات الشوارع )


آذكـروك
وجـدح حزني
وشـتعل بـيدر سنابل حـدر صدري

وصـرخ
بعيوني الضباب

وبـاب بـاب
تخلخلن بـيـبان عمري

وكـون تدري . .

الحچي ..
الماعـابر شفافـي
يـگودني لــ حسنك رهينـه

وكـون تدري . .
شوغة متيـهين روحي
وانته خصرك جان شطين ومدينه

ومـاهي هينه
اَي وحگ ثـنيت گـذلتك ماهي هينه

ليـلك . .
أيچمل المذلـه عـناد نـثيـه

وخـلگي طيف . .

لا عثرلـه بــ جفن يسـوه
ولاحـضه بــ جرفـين عينـه

أنـه حسبالي . .
شـكو واحد ترف گلبـه فـطير
أنـه ويـن أدريـبك أدور ضحكـتك


گتلي ماتسوه الحرب
من غير دمك
دنكت نحري وگلتلك
بيش ما تذبحني احبك

بيش ماتذبحني احبك

كله منـك . .
أنـته سودنت اليـالي
الجانت تعدي بضحكتك

وأنـته عودت الضلام
يعيل بيه ويـلبد بماشـة گذلتك

أنـته أنـته العلمتني !
اكفر بدين المسامر
واسجد الشامة رگبـتك

آخ
يافشلـة قسمتي . .

الحالها حال السفن

شحصلت من ماي البحر
طـول السفر ،،
يابس گلـبها ،،

ياوليد الندى بسك
لا تخيط جرحي بحبال الندم . .

الضمه تـناوش أيامي
ومالي بالوادم مطر

كافي أنخاك عله گطره
وشامتك فزعة نهر

كافي گلبي
يمشي بدروبك ذليل

بارده اثياب اليالي
وچنها حضنك
دوم ماضمت دخيل

من يمرني أسمك أضيـع
أبـين چـويـات الشوارع

وشـكو ولايـة ،،
اگـبل عليـها ،،
أبـلا هلا تـتـلگـه جدمي

نـجمه ،،
نـجمه ،،
أسنيـني تطفـه

وشگگ أحلامي خريـفك
يـابعد عمري أعلـه كيفك

حلف عيوني
شكثر فحطـها طيفك . .
-
ناصر البدري
جويات الشوارع
——————————————@@


15 /
قصيدة ( الأم )


( أم - تبحث عن ابنها )
••
••

نتگاود ..
انه وكلبي
ونشد بـ اليشبهونه

ماشفتولكم ؟
خمري زغير وفرگه بسنونه

ابني ..
ويـ المناره گدار
وجفوفي المربياته

يضل ..
سهران طول اليل
حارس فوك اخياته

امشي ..
ودايخه بشيبي
تعنيتك لعد زغرك

يمخاوي ..
الجفه شجندوب
ومزاعل اجفوف امك

يبني ..
وذيج المروه
وراك انخه النفس نخوه

ولك فدوه ..
ناغيني ولك فدوه

شوف شخله بيه الجور
نص صورة بجفن مكسور

اجينه ..
ثنينه مورثين
نتگاود شمع وبخور

هجرك ..
ترس كلبي فطور

يذبحنه ..
برد وشاه
ونضحكله فرح وطيور

تسع انذور ليليه
بـ العباس اشدلك

لا عندك گبر وابجيه
ولالـك ذچر واندلك

حدر ..
صدري شليل اهموم
وبفراگك كرهني النوم

گمت ..
انسه وطب للسوك
واشريلك ضحك وهدوم

ادورك بس انه وكلبي
لوحدنه وبسكته نموت

ساعه ..
اغفه ويشيعني
ويحطني بهيده بتابوت

وساعه ..
اگعد وشيعنه
وروح ويـ النعش زاتوت

مدري شلون گمنه نموت

ناصر البدري
——————————————@@


15 /
قصيدة ( الايام )


سكته عله سكته تمر الأيام
لاتنشره ولا جذب تنسام
تدفـع بـ عمرك دفـع جـدام
حته الحلم مل منك ونام


فنك تنام
وجفنك ابعيد
وحزنك كسر ضهـر المواليد
أتـريد بس ماتدري شـتريد
صافن وره ضعون الـمواعيد


صافن وگلبك
ركض مذعـور
ركضـة نفس مابين الگبـور
تشتعل بس تـنشـاف تنـور
تكتل الطيف أرسـمله ناطور


لاتحسب
ولا تشتري الصيت
ماتضحك أشفاف التـوابيـت
دللـت يامـه ويامـه ربـيت
بس أنـته واسمك تالي ضليت


ضليت شوغه
بـصدر الغروب
ودمـوعك أمنطيـح حالوب
أحبابك نسـوك وسدو البـوب
ونامـو اگلوب امشابـگه اگلوب


دير الخمر !!
فوك الصور دير
بلكت تطفيك التصاوير
ليلك أشكبره وحلمك أزغير
ماينصبغ شـيب الطباشيـر

ناصر البدري
———————————————-@@


16 /
قصيدة ( لا تعاود )



لا تعاود ..

اچفوفهم
حرگت اسنينك
والسمه مغيمة كواغد

لا تعاود ..

دنو الموت الرگبتك
وانته ذاك
اليم رگبهم
تغزل وتمطر گلايد

جرحك !!
أولاية غميجه
والندم ماكل قسمتك
واسمك بكل شفة جامد

ابالمن ؟؟
تنشاف دهله ابالمن

ابالمن ؟؟
تخطف عيونك
خطفت الريح اعله گذله ابالمن

كافي بسك
حزنك تعده گذلتك

وجفك ..
بكثر المتانه
ناسي اصابيعه بصفنتك

لاضگت !!
ضحكة احبيبه
ولا ضحك وياك وكتك ..

- ناصر البدري
———————————————@@


17 /
قصيدة ( أسنين محترگه )


خزف
وأسـنين محتـرگه

وجروحي ..
سعف مغتاض
تـجدح لـو لچمـها عـتاب

يابلـكت دوه الحزني
يابلـكت أشفاف المشو تفگدني

شنو ذنـبي . .
أسبگ لليجيني بـ طيف أفكله الباب

وشيوصل الـعمر للـباب !

شيوصل الـعمر للـباب
وجـدامي جريـده بماي

هـذاك أنـه . .
نگـش منسي
حـدر حجول الحديثات

أحـني بــ خصر ميـلادي
وغـني الكل كمر مطعـون
ماطاح بشواطي الناس

وتـخنگـني . .
الـعيون المالـها بـنادم

بـياع الـتتن مرات
ربحـه بـحزن اليحبون

شيفض شارة الراحـو
تهـزل ثوب ضويـاتي

ولهسه . .
تركـض . .
بـروحي . .
بـيارغ ماعرفـها ألـمن


مـلاچ السهر جفني . .

من يحضن حلالـه اليل
أفز گبل النوايـه أبيض

وبـات . .
بحضرة الـخمره
ضعن ملـچوم

آه . .
ياشوغـة الــ ملچـوم
تكسر رگبـة الذمـه

نستني أوجـوه . .
يابــو أوجـوه . .
وانـه بعز العشك كـادود

ليـليه . .
أعثر بــ نجمه
وطيـح من الفجر موال

منو اليدري
وره ضلـوعي
حلم نـثيه وتـعب حمال . .

ناصر البدري
———————————@@

المجموعة الشعرية
للشاعر العراقي ناصر البدري ..
( العراق / الناصرية )



#حسون_رياض (هاشتاغ)      



اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين
حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل


كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل



رأيكم مهم للجميع - شارك في الحوار والتعليق على الموضوع
للاطلاع وإضافة التعليقات من خلال الموقع نرجو النقر على - تعليقات الحوار المتمدن -
تعليقات الفيسبوك () تعليقات الحوار المتمدن (0)

الكاتب-ة لايسمح بالتعليق على هذا الموضوع


| نسخة  قابلة  للطباعة | ارسل هذا الموضوع الى صديق | حفظ - ورد
| حفظ | بحث | إضافة إلى المفضلة | للاتصال بالكاتب-ة
    عدد الموضوعات  المقروءة في الموقع  الى الان : 4,294,967,295
- قصيدة - لا تعاود - الشاعر ناصر البدري
- تمر الايام - قصيدة الشاعر ناصر البدري
- قصيدة - ماسامحك - الشاعر ناصر البدري
- حجل فصلية - للشاعر ناصر البدري


المزيد.....




- أزمة الفن والثقافة على الشاشة وتأثيرها على الوعي المواطني ال ...
- -كائناتٌ مسكينة-: فيلم نسوي أم عمل خاضع لـ-النظرة الذكورية-؟ ...
- مصر.. الفنان بيومي فؤاد يدخل في نوبة بكاء ويوجه رسالة للفنان ...
- الذكاء الاصطناعي يعيد إحياء صورة فنان راحل شهير في أحد الأفل ...
- فعالية بمشاركة أوباما وكلينتون تجمع 25 مليون دولار لصالح حمل ...
- -سينما من أجل غزة- تنظم مزادا لجمع المساعدات الطبية للشعب ال ...
- مشهور سعودي يوضح سبب رفضه التصوير مع الفنانة ياسمين صبري.. م ...
- NOW.. مسلسل قيامة عثمان الحلقة 154 مترجمة عبر فيديو لاروزا
- لماذا تجعلنا بعض أنواع الموسيقى نرغب في الرقص؟
- فنان سعودي شهير يعلق على مشهد قديم له في مسلسل باللهجة المصر ...


المزيد.....

- لا ميّةُ العراق / نزار ماضي
- تمائم الحياة-من ملكوت الطب النفسي / لمى محمد
- علي السوري -الحب بالأزرق- / لمى محمد
- صلاح عمر العلي: تراويح المراجعة وامتحانات اليقين (7 حلقات وإ ... / عبد الحسين شعبان
- غابة ـ قصص قصيرة جدا / حسين جداونه
- اسبوع الآلام "عشر روايات قصار / محمود شاهين
- أهمية مرحلة الاكتشاف في عملية الاخراج المسرحي / بدري حسون فريد
- أعلام سيريالية: بانوراما وعرض للأعمال الرئيسية للفنان والكات ... / عبدالرؤوف بطيخ
- مسرحية الكراسي وجلجامش: العبث بين الجلالة والسخرية / علي ماجد شبو
- الهجرة إلى الجحيم. رواية / محمود شاهين


المزيد.....


الصفحة الرئيسية - الادب والفن - حسون رياض - ديوان الشاعر العراقي ناصر البدري