سليمان الهواري
الحوار المتمدن-العدد: 5683 - 2017 / 10 / 29 - 04:01
المحور:
الادب والفن
بغيتكْ ..
*****
بغيتكْ ..
أنا بغيتكْ
صفحة بيضة
صافيَة
والمْداد مْدادي
نرشمكْ من روحي
أرضْ
ننبت فيك غابة مْحبّة
مْنْ عِينيكْ
نرشْ جبح عسل
لقلبي تكوني ساروت
ونكون أنا الباب
بغيتكْ ..
سطرْ
يكتبْني مُورا سطرْ
يقفل بيك الحكاية
بيك يتسد الكتابْ
بغيتكْ ..
امرأة ،
كمرة مْضوّية
بِين السطر والسطر
تشرق شمس
مغطي بنورها حجابْ ..
بغيتكْ ..
امرأة ،
تكتب بين حروفي
حروفها
تعاود كتابتي
أنا كُلّي تعاودْنِي
مْصحاف ومْكْتابْ ..
بغيتكْ ..
حجّاية
حلامَة
تداوي جراحْ العمرْ
تداوي الروح
شتّتْها الترْيَابْ ..
بغيتكْ ..
امرأة ،
تخلقاتْ ف روحي
فاش ربّ الكون
قال ليها
كُوني سرّ سليمان
كُوني الخاتم
كُوني بلقيس
كوني لفرحتي السّبابْ ..
كُوني نْتي كوْني
كُوني نهاراتي
كُوني ايامي
كُوني فرحتي
كُوني لِي ظْلّي
يا لاللات العيالات
كُوني لِي وحدْك
كلّ الاحبابْ ..
*** سليمان الهواري / رضا /***
#سليمان_الهواري (هاشتاغ)
كيف تدعم-ين الحوار المتمدن واليسار والعلمانية
على الانترنت؟