اوقفوا قانون التقاعد الجائر

ميسون نعيم الرومي
الحوار المتمدن-العدد: 5622 - 2017 / 8 / 27 - 20:43
المحور: الادب والفن
    

اوقفوا قانون التقاعد الجائر
ميسون نعيم الرومي

بالمنطقه الخضراء تسكن عصابات
الهم حياة العز .. إلنه النفايات
***
ترضه الظلم والجور.. لايا شعبنه!
اعيالك تسيب اتجوع نهبوْ وطنه
***
انباع النفط يا ناس .. والشعب هالجاع
ساكت شعبنه ليش ؟ وارجالك اسباع
***
حرّفوْ بالقانون .. قانون التقاعد
كل الشعب ينظام .. ليش انته گاعد؟
***
يشبع مـَـهـانـَـه اوضيم واليقـبـَل الذل
بيدك يشعبي اليوم للمجلس اتحل
***
يا شعب صيح اوثور .. الغي القوانين
بطـَّلنه ننخي ارجال .. نـِـنـخـَـه النساوين
***
أهـل العلم والنـور.. نـصهم تـِكـَـتـَّـل
رَدّوْ على الباقـين .. مـَحـَّـد تـِمـلمَـل!
***
اسنين اوتعب وادموع .. اخـّـذو شهادات
خـَـرّجو كومه اجيال .. ليش العداوات ؟
***
بيعوا سبح بالسوگ .. بيعوا المحابس
صار الغبي والعار.. عَ الگلب كابس
***
وين الرفض يا ناس .. وين الحـَـمـيـّـه؟
قانـون التـِـوَقـّع هاذ .. بـيه البـِليـّـه
***
هجـمـَـوْ وطنـَّه الزين صايـر خرابه
هججوْ كل الناس .. سادت عصابه
***
يا شعب اصحه .. اوثور.. لاترضه بالذل
بـيـدَك تـَـرَه القانـون .. للمجلس اتـحـِل
***
يا مجلس النوّاب .. شـنهي نـَـفـِعكم؟
بس اللغف والبوگ .. والثـَروَه الكـم !
***
يا شعب انهض صيح .. زلزلهه بيهم
اعـتـِصم بالساحات .. واگـلبهـَه بيهم
***
متگلـّي شنهي اشجاك ! ساكت على الذل
تلغي المجاس هاي .. واتحاسب الكـل
***
يا شعبي ساكت ليش ؟ شنهي اللي صابك!
طالب ابحقك صيح .. وارفض مصابك
---------------------------------------
انهي ابياتي بالهوسه أدناه

ياشـَـعـب العراق الأبـَـد ماينظام
والظلم ابـأرضنـَه الأبـَـد مادام
كلنه نعتصم وانحاسب الحكام

ها اخوتي ها........

نـتـوحـَّـد كـِلـّـنـَه او هاذ آنـَه
----------------------------------------------
مجلس الوزراء صوت على الغاء قانون التقاعد
القانون الجديد سوف يلحق الضرر بالمتقاعدين
حيث الغي القانون الجديد:-
1- غلاء المعيشه وهي 1% عن كل سنة خدمه.
2- مخصصات الشهادة.
3- حدد الراتب التقاعدي بـ 80% من الأسمي كحد أعلى

كارثة اقتصادية كبيرة سوف تلحق بالشعب اذا طبق هذا القانون الجائر
وسوف لن يتأثر كثيرا اصحاب الدخل المرتفع
ويعني هذا ان الذين سرقوا العراق لايمسهم القانون بسوء
---------------------------------------------------
27 / آب / 2017
ســــــــــــــــــتوكهولم

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات