خلاف جحا العراقي رئيس الوزراء وجحا رئيس الجمهورية

جحا العراقي

الحوار المتمدن-العدد: 1443 - 2006 / 1 / 27 - 09:13
المحور: كتابات ساخرة
    

جحا العراقي رئيس الجمهورية اختلف وياه رفيقه بالنضال جحا رئيس الوزراء (ونضال هنا تعني شارع النضال مو غير شي ) طبعا اختلف الاثنين وبدات التصريحات النارية تطلق من قبل الاثنين على بعضهم وواحد ينشر غسيل الاخر (مو الغسلات صارت بفلسين بالعراق ) وماقصروا الاخوان بيناتهم كانوا يطلعون يحجون باسلوب سياسي ويتعاركون بادب في محطات فضائية اما في القصر الرئاسي وبعيدا عن الصحافة والفضائية . فجان واحد يش......لا..... ويب......لا..... للثاني وكل واحد ماقصر كام يطلع كل عيوب الثاني . وبحكم ان بعض من اصدقائي يعملون بالمنطقة الخضراء فقد سمعوا جميع التصريحات النارية الي ماتقل عن مستوى اثنين من ولد الشوارع يابه شجاي اخربط اني بالحجي والله لساني يريد يدمرني يابه الي ماتقل عن اثنين مثقفين يتناقشون باسلوب ديمقراطي ( والديمقراطي هو ان تهدد الاخر بالطلعة وتقول له شوف شسوي بيك) طبعا اشتد الخلاف بين الاثنين ووصل الى مرحلة لايحتمل وهذا مو موضوعنا الاساسي لكن الموضوع الاساسي ليش صار الخلاف ( نقطة الخلاف ) بين جحا رئيس الجمهورية وجحا رئيس الوزراء طبعا الناس لو تعرف شنو سبب الخلاف راح تعرف ان حكومتنا صدك مزعطه وصدك بيه هوايه زعاطيط اهوووو انا شمرت على الروضة والحضانه اي مو ابني يومية اودي للحضانة تعذروني يابه حكومتنا ذات عقلية رائعة وشمعة فكر ( والشمعة من الشماعية ) .
ولحد هذه اللحظة يظن اخوانا السنة ان سبب الخلاف كان على تصرفات رئيس الوزراء وي اخوانا السنة ويظن اخوانا الاكراد ان سبب الخلاف هو على المناصب الوزارية ويظن اخوانا الشيعة ان السبب هو سيطرت الاكراد على وزارة الخارجية ويظن اخوانا التركمان ان السبب دفاع رئيس الوزراء عن حقوق التركمان الي محد معبرهم بفلس لانهم اشرف ناس هم واخوانا المسيحيين وهم وطنيين ولايمكن ان تنسى مواقفهم ولكن للاسف الشريف في بلدنا لايعيش .
طبعا وسبب الخلاف اخوان هو راح احجيلكم القصة كاملة بس لحد يضحك ترى تورطوني وي بلير.
اسمعوا . استلموا خوالنا (الامريكان) بناية قد انجز اعمارها في المنطقة الخضراء فمن كملوا اعمارها كتب على البناية بناية رئاسة الجمهورية العراقية وقام الامريكان بتسليم البناية الى جحا رئيس الجمهورية وطبعا الصبح سلموه مفاتيح البناية فذهب جحا رئيس الجمهورية الظهر مع رفاقه في النضال للسكن في البناية الجديدة وتحويل مكاتبهم هناك عندما وصلوا الى البناية فؤجوا بوجود كادر جحا رئيس الوزراء في البناية وعند استعلامهم عن الامر تيقنوا ان كادر رئيس الوزراء جحا قد احتل البناية يعني بين قوسين حوسمها بعلم جحا رئيس الوزراء وطبعا كادر رئيس الوزراء تعرفوا من المناضلين السابقيين بالحواسم فحوسم البناية وسكن بيها فصاح جحا رئيس الجمهورية على جحا رئيس الوزراء حتى ياتي ويفهم منه هذا الاشكال الذي حدث فحضر رئيس الوزراء وقال شكو شنو القصة وعمل نفسه كلشي مايعرف ( اطرش بالزفه) فصاح رئيس الجمهورية وقال له هاي البناية شمكتوب عليها اقرا لي فقرا رئيس الوزراء وقال مكتوب عليه بناية رئاسة الجمهورية فقال له رئيس الجمهورية ليش كادرك بيه اذا هي بناية رئاسة الجمهورية فقال له رئيس الوزراء مو كادري عجبته البنايه وهي عاجبتني وخليها الي وشوفلك غير مكان . طبعا جحا رئيس الجمهورية اجابه ( لك انا الموصل وكركوك انا ورفاقي حواسمناه بالسقوط. وباحداث 1991 حوسمت السليمانية وانت جاي عليه هسه . بابا ترى احنا قفاصة قبل ماتوصل كلمة قفاصة لبغداد واستلمه استلاميه رائعة) طبعا رادت تصير مشكلة بس انسحب جحا رئيس الجمهورية هو وجماعته وذهب و صاح على الامريكان الذين قاموا بطرد كادر رئيس الوزراء خارج البناية طردهم كما يطرد الذبان واستلموا البناية كادر جحا رئيس الجمهورية . وعندما اغربت الدنيا واوشكت السماء على الظلام اتى كادر رئيس الوزراء يريد ان يحتل البناية مرة اخرى بمباركة رئيس الوزراء واصبح يهدد ويصيح (لكم احنا حوسمنا العراق كلها منكدر عليكم بابا شوفولكم غير مكان احسن الكم ترى احنا خالوا عموا دادا ترى كل السوالاف نعرفها ) وماكان من كادر رئيس الجمهورية الا ان اتصل بالامريكان فاتوا في الحال وسووا فصل (فصل عشائري ) للاخوان لان الامريكان اخوالنا ومايقدرون يزعلون واحد وقالوا لرئيس الوزراء وكادره بعد من هذا الشارع ( لاتلفي ولاتوصل ) ترى بالقندرة نطلعكم طبعا احترموا نفسهم كادر رئيس الوزراء الي هما كلش محترمين ومودبين وخوش ولد (خوش يعني مو خوشيه وعراكه ) ورجعوا واذيال الهزيمة يحملونها والدمعه بعيونهم (دمعه لان تلفون الدمعه اغلى من الدب والخمط بفلس هناك ) .
وطبعا هو هذا السبب الي جعل الاخوان ( جحا رئيس الوزراء وجحا رئيس الجمهورية ) يزعلون على بعض بعد ان كانوا رفاق في الخمط والحواسم وغير شغلات مانريد نحجيها حتى لاتنعرف مصادرنا ويضوج منا الباي الكبير بوش ويسوينا ورطة وي زلماي خليل زاده الي هو ابدا مو يوميه يرزل جحا رئيس الجمهورية وجحا رئيس الوزراء بسبب اعمالهم الطفولية طبعا لا تصدقوني اخوان ترى اذا تفتهمون قصدي غلط تنلاص عليه بس قرر زلماي خليل زاده قبل يومين قرار وهو سوف يفتح روضة بعد يومين بالمنطقه الخضراء .
والله صدك فضحونا هذولاء الجهال .... بابا تعلموا حجي زين.
حكمه هذه الحلقة ( ماشافوهم هما بيسرقوا (يحوسموا ) شافوهم وهما بيتحسبوا )

#جحا_العراقي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات