جحا العراقي وزيرا للكهرباء

جحا العراقي

الحوار المتمدن-العدد: 1433 - 2006 / 1 / 17 - 08:06
المحور: كتابات ساخرة
    

شبيكم ممصدقين اصبح جحا وزيرا للكهرباء قبل ستة اشهر حيث استلم الوزارة من صديقه واخوه ورفيقه بالحواسم اعتذر بالنضال هيام مادري هائم مجي اذكر اسم الوزير السابق بس هو اسم بي شوية خمط المهم مو مشكلة بالاسامي تعددت الاسامي والبوك واحد (والبوك هنا مصطلح لاتيني يعني السرقة بالهندي)
استلم اخونا جحا الوزارة الي جانت من ارقى وزارات الدولة بعد النفط والمالية لانها وزارة بيه عقود طاكة تقدر بالمليارات (وتعرفون الدولارات وناس مشايفه فلوس وتصير وزراء شسوي تحركها حرك للوزارة) .
طبعا اخونا جحا ما قصر لمن استلم الوزارة طلع كل خيسة الوزير السابق ونشرها على الحبل ( مو جان يغسل ملابسه بيده وينشرها فتعلم النشر على الحبل ) وهذا جهد استثنائي يشكر عليه وقال سيادة الوزير جحا انه راح ينظف الوزارة من كل الفساد (ينظف لان جانت شغلته قبل السقوط زبال بالامانه) طبعا فعلا استلم جحا مدراء الذين احضرهم الوزير السابق الموحرامي الي اسمه هياتم اهووووه هم نسيت اسمه ليش ياربي انسى اسمى دائما . مو مهم الاسم استلم كل مدراء البارعين بالتملق للوزير السابق وخاصة واحد من وكلاء الوزير السابق قام ببناء عمارتين بالاردن طبعا لااحد يعتقد انه هذه الاموال سرقت من الوزارة استغفرالله انها اموال جان ابوه هذا المدير ضامها بخزانه الوزارة قبل مئة سنة وقام المدير باخذ حق ابوه فقط وبناء عمارتين بالاردن بيه شي اخوان انا اشوف مابيه شي .
طبعا جحا بدا وقام بجلب جماعته من اقرباءه المقربين واصدقاءه في الشرب والنسوان اعتذر في الصلاة والعبادة لانه ترشح من حزب ديني واعطاهم مناصب ادارية رائعة ( رائعة لان جان خيرهم مايملك جمبر جكاير) جحا الي جان يغسل المواعيين بيده احضر له ثمانية موظفات سياحة وفندقة يقومون بخدمته اربع في المنزل واربع في الوزارة طبعا متقولون الموظفات حلوات لاوداعت جحا الموظفات ابد مايشبهن بروك شيلدز ولا مارلين مونروا يلا الدنيا حظوظ .
طبعا الوزير جحا قام بايجار منزلين ايجار المنزل السنوي يعادل شراء قصر فرساي ( وهو قصر في فرنسا كانت الاميرة ماري انطوانيت تسكن فيه بس خوما الاميره احسن من عنده لاطبعا هو احسن اقله ضبط الكهرباء وخلاها ابد متنقطع والسبب انه ابد متنكطع لان اصل متجي ولانعرف وين تروح )
طبعا جحا اوقات الشرب استغفرلله الصلاة ميفوتها بالوزارة ابد مومن من الدرجة الممتازة ( مثل منتخبات من الدرجة الممتازة والاولى والمتوسطة اي مو هي صاير كرة قدم ) .
جحا الي ريحة العرك والبيرة والكلام البذي متفارقه ليل نهار . اعتذر شلون يريد لساني يورطني وي سيادة الوزير جحا جحا الي ريحة الايمان والتقوى والكلام الوعظ متفارك لسانه صرح انه مسيطر على الوزارة بشكل قوي وديمقراطي طبعا هاي تصريحات قوية بحيث اول ماجتي قرار استقالته موقع من مجلس الطماطة والخيار اعتذر هاي شلون ورطه وي لساني من مجلس الوزراء قال ( كلا ......الي يريد يستقيل خلي يروح يستقيل انا بالنسبه الي نهائيا ماراح استقيل ابدا ) ( طبعا هاي الاقوال تذكرني باقوال القائد اي قائد الضرورة من رب ضارة نافعه الي الناس جانت متشتريها بفلسين لان جانت عملة الفلسان منقرضه قبل السقوط ) طبعا اجى تاكيد علىالاستقالة بكتاب اخر من رئاسة وزراء طبعا ضحك جحا ومزق الكتاب بيده وقال لو دفتر دازي الي جان استقاليت بس كتاب لا انا مستواي دفاتر مو كتب .
واثبت جحا انه مسيطر على الوزارة وعلى الكهرباء الي اصبح المواطن يسبح بيه ويغرق وبيناتنا الحجي قبل جم يوم غرقوا اكثر من خمسين مواطن بالكهرباء اي وداعت جحا وهذا من مصدر اكيد في وزارة التمن والمرك اعتذر وزارة الصحة طبعا الحمدلله قمنا نصدر كهرباء لامريكا والدول الاوربية.
والعراق اصبح اهم بلد في تصدير الكهرباء (حكمه الهيه منو جان يصدك الحقيقة تصبح حلم ) والي ميصدقني من الاخوان خلي يجي للعراق وشوف شلون راح ينسمط ابهاته اعتذر راح يتونس ويسبح بالكهرباء بس اهم شي يعرف يسبح حتى لايغرق .
جحا ذهب ليامر (ليتوسل ويستجدي ) محطة الناصرية ومحطة المسيب من اعطاءه كم ميغا واط الى العاصمه بغداد فرفض الموظفون تنفيذ قراره وقالوا له حبيبي انت وزير بس بالمنطقة الخضراء من تسوي المحافظات كله خضراء تعال واخذلك جم ميغا واط رجع جحا وهو يقول اي الاخوان حقهم مو اني ضغطت عليهم هوايه واعتذر صدك خطيه شنسوي نسكت حتى تبقى خبزت الجهال .
حكمه الحلقه ( لايوجد اي وزير كهرباء يهتم بالكهرباء ولكن كل موطن يعاني ويهمه موضوع الكهرباء لن يكون وزير للكهرباء في يوم من الايام ).

#جحا_العراقي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات