مسرحية من فصل واحد

ماجد صفوت استمالك

الحوار المتمدن-العدد: 5195 - 2016 / 6 / 16 - 20:49
المحور: مواضيع وابحاث سياسية
    

المكان : خشبة مسرح متنقل بين قري الريف المصري

الشخصيات : المواطن عارف ، المواطن راضي ، الشاويش شداد ابو كبير

المشهد الاول وفي نفس الوقت المشهد الاخير

المواطن عارف يسير في طريقه ويمر ب كمين به الشاويش شداد ابو كبير

شداد: استني يا مواطن هنا هات اوراقك
عارف: اتفضل
شداد: انت عارف ان انا هنا روح النظام ، انا منفذ القانون
عارف: عارف واسمي عارف
شداد: انت هتهزر معايا يا مواطن ، انت المفروض تخضع لي ، انا هنا الكبير واسمي ابو كبير
عارف: انا اخضع للنظام وانت كمان تخضع للنظام حتي لو انت مسئول تنفيذه
شداد: ازاي يا جدع معناه ايه الكلام دة ؟
عارف: يعني وانت برة شغلك مش هسمع كلامك ، و كمان وانت جوة شغلك مش هسمع لو كلامك ضد النظام
شداد: يا جدع انت انا النظام ، انت ولا عارف ولا حاجة
عارف: يا شاويش النظام دة حاجة اكبر مني ومنك ، القانون موجود من قبل ما نتولد انا وانت ، و القضاء هيفضل موجود لما نتكل
شداد: يا شيخ فال الله ولا فالك ، اقعد علي جمب كدة اما نشوف المواطن اللي جاي يشهد علي الكلام الفارغ اللي بتقوله ده

يمر بالكمين المواطن راضي و يبرز اوراقه دون ان يطلبها منه الشاويش

شداد: امممم اه ، الورق سليم .. كله تمام ، قول لي يا مواطن انت عارف ان انا هنا روح النظام ومنفذ القانون
راضي: طبعا هنا انت الكل في الكل و من غيرك الدنيا تقف و ماتقعدش
شداد: يعني المفروض الناس تسمع كلامي
راضي: دا الناس تسمع كلامك من قبل ماتقوله ، بقي دا اسمه كلام
شداد: يعني انا النظام
راضي: طبعا يا كبير انت النظام
شداد: و كمان عارف اسمي ، انت المفروض يبقي اسمك المواطن صالح مش راضي
عارف: طبعا دة يخليني انا المواطن فاسد
شداد: ههي ههي ، انا ما قلتش حاجة انت اللي قلت
عارف: قل لي يا مواطن انت بتشتغل ؟
راضي: طبعا ، دا انا درجة سابعة
عارف: وطبعا بتدفع ضرايب
راضي: الصراف - الله يجحمه - بيخصمهم كل شهر
عارف: اهي الضرايب دي معمولة علشان تتصرف علي النظام و الناس اللي بتنفذ النظام
راضي: احنا في ديك الساعة ، دا حتي مش قد المقام
شداد: ههع ههع ههع
عارف: انت ما سمعتش عن المواطنة والديموقراطية ابدا
راضي: اللهم احفظنا
عارف: يا مواطن دي مباديء مش عفاريت
شداد: بزمتك يا مواطن يا شريف انت تآمن لواحد من بتوع المباديء دول
راضي: لا بتوع المباديء ولا بتوع الشرايط وشرفك
عارف: ههع ههع ههع
شداد: ايه تقصد ايه يا مواطن
راضي: ابدا ولا اقصد حاجة ، انا بقول الراجل دة مش هيجي من وراه غير المشاكل
شداد: امممممممم طيب كويس انك عارف
عارف: سؤال بس و عاوزك تجاوبني عليه ، هو المواطن لأجل الحكومة ولا الحكومة لأجل المواطن
راضي: ودي عاوزة سؤال ، احنا خدامين الحكومة ، دول سموها حكومة علشان بتحكم
عارف: يا بني ادم الحكومة دول موظفين لو ماعملوش شغلهم و نفذوا النظام يبقوا مقصرين ، ولو شافوا شغلهم يبقي لا شكر علي واجب
شداد: انت عاوز ايه يا مواطن تاعب نفسك وتاعبنا و عمال تضايق اخوك المواطن الصالح دة
عارف : انا عاوز كل واحد يعرف اللي ليه واللي عليه ، مش نبقي عايش كده وخلاص ، البلد دي هتتقدم لما .....
شداد : انت شكلك عاوز تخربها ، ما هو انت و امثالك اللي مش عاجبهم حاجة دول اللي جايبينا ورا
راضي : انت عاوز تغير الدنيا ، ما طول عمرها ماشية زي ما هي كده ، و ادينا عايشين
عارف : لا انا عاوز اقول ....
شداد : لا تقول ولا تعيد ، عيش زي الناس ما هي عايشة وبطل غلبة
راضي : يا اخويا ربك ليه حكمة في كده ، استهدي بالله وارضي بالمقسوم
عارف : اصل الحكاية ان .....
شداد : لا اصل ولا فصل ، انت مش من بتوع الديموقراطية ، ادي احنا اتنين وانت واحد ، يبقي تمشي علي كلامنا وانت ساكت
عارف : يا عالم الديموقراطية مش ....
راضي : ما تتعبش نفسك ، اللي نعرفه احسن من اللي ما نفهموش وانا مع الشاويش في كل حاجة يقولها
شداد : اظن كده الكلام خلص والموضوع منتهي

يجري عارف هربا وتلاحقه الضحكات

شداد : ههي ههي ههي
راضي : ههي ههي ههي
شداد : ههو ههو ههو
راضي : ههو ههو ههو

#ماجد_صفوت_استمالك (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات