تطقيع والا قرصة دان امريكا لتركيا والسعوديه

جان نصار

الحوار المتمدن-العدد: 5119 - 2016 / 3 / 31 - 15:13
المحور: كتابات ساخرة
    

يا جماعه اكم مره الواحد بعيد وبرجع بفهم هالحمير زعماء دول الطرش يعني منطقتنا انو فش سياسات دائمه في مصالح دائمه واكم مره وفقعت مرارتي ومرارة الاف المثقفين الواعين والحريصين على مصائر شعوبهم انو امريكا دوله عظمى امبرياليه بترقص الكل على مزاجها وحسب مصالحها.
ليش مش قادرين يفهموا هالبهايم هدول الزعماء انهم مجرد بيادق وعملاء الهم دور محدد ولما ينتهي بنزتو على مزابل التاريخ وانو العملاء هم دذبوذبل يعني استعمل وكب على الزبله.
ليش مش قادرين يفهموا انو بعد انتهاء مهمتهم بكبوا على ط...مؤخرتهم مي بارده .ولكو انبح صوتي وفتئت وانا بصيح وكلام عامي وفصيح وكل اللي بحكيه صحيح وبكتب مقال وبصرح تصريح وعبس.
الرئيس التركي اردوغان رغم حردوه وزعلوه راح زي الارنب على امريكا وبتوسل مشان مقابله مع الرئيس الامريكي اوباما مشان يحسن العلاقات ويرطب الاجواء وعبس .
الاخ اليوم صاير يتودد ويتوجهن انو بدو يحارب الارهاب وهو اللي دعم الارهاب ومخلاش ارهابي ومهوس وقاتل ومريض نفسي الا ودخلهم على سوريا. واليوم تركيا بتصرح انها قبضت على اكثر من 3500 اراهابي ومنعتهم من دخول سوريا واكيد احنا صدقنا هالكلام.
اما ليش امريكا زعلانه على اردوغان فهاي بدها قعدي وشرح طويل بس راح احاول اختصر مشان اوقاتكم الثمينه اعزائي القراء.
شوفوا يا جماعه امريكا بدها زعماء تشتغل على الرموت كونترول وتكون زي الحج مطاوع تعال وروح واطلع وانزل والعب واركب واهرب وانهب على مزاجها.
فمثلا امريكا دعمت الارهاب وبيقول ساعدوه لازم يساعدوه واليوم الجموه لازم تلجموه وبكره حجموه لازم تحجموه.
الاخ اردوغان بدوش يسمع كلمة الامريكان وصار يفط ويعط وينط ويشط ويحط ويزط ويخط ويمط على كيفه.
اخونا نفش اكتر من ما لازم وصار بدنا دبوس بتبط هالبلون مشان يفقع ويرجع لحجمه الطبيعي. الزلمي صدق حاله بعد ما حضر مسلسل حريم السلطان صار حابب يقلد السلطان سليمان ويرجع ايام زمان
هدد الامريكان وقلهم يا انا يا الاكراد وعلى مايظهر الامريكان اختاروا الاكراد.مش معني يحارب داعش زي ما الولو.نازل يبتز ليل مع نهار الدول الاروبيه بموضوع اللاجئين.قامع للحريات وخصوصا الصحافه والخصوم. طبعا موضوع قمع الحريات مش كتير بهم امريكا لما بتكون الريح معها يعني لما اردوغان ماشي حسب الاوامر بس لما بلعب بديله بتنزاد على البيعه..
بالاضافه الى انو اردوغان مزعل الروس وبوتين شخصيا مشان موضوع اسقاط الطياره والملف السوري واليوم المصالح الروسيه مع الامريكيه في هالموضوع بتتماشى شو بصير بكره الله اعلم.بعدين هدول دول عظمى مقسمين العالم فيفتي فيفتي او سفينتي سيرتي مش مهم.. المهم انو مش كل واحد بقدر يلعب مع الكبار
من الاخر اردوغان في المعمعان. فهناك تحذيرللشعب الامريكي بعدم زيارة تركيا هالايام.
ضربه للسياحه والاقتصاد, من روسيا وامريكا يعني في طبخه. تركيا جاي على ايام سودا والمصايب راح تنزل وانشالله اكون انا غلطان.
بس عنا المثل بقول من حفر حفرة لاخيه وقع فيها.يعني الدور القذر اللي لعبته تركيا في الحرب السوريه عم يطرتش عليهم اليوم.وعلى نفسها جنت براقيش
امريكا والحلف الاطلسي همي الي دعموا تركيا على حساب افقار اليونان ومعاقبة اليونانين واليوم على ما يظهر انو صار لازم الفاتوره تندفع.
تركيا اليوم تعادي جيرانها سوريا والعراق.
تعادي روسيا وتعادي الاكراد وتعادي مصر وتعادي المعارضه وتعادي الاتحاد الاروبي وهاي وصلت لامريكا.. طبعا اسرائيل كمان داخلي على الخط وكرمال عيونها امريكا بتحارب الدنيا.
(Hillary Clinton: Destroy Syria for Israel: “The Best Way to Help Israel” By The New
الجاي احلى انتظروا نتائج الانتخابات الامريكيه بين المريضه النفسيه هيلاري كلينتون والمجنون دونالد ترامب اللي بقول انو راح يعترف بالقدس عاصمة اسرائيل ويدعمها على طول الخط ويحارب الاسلام وعلى رأسها السعوديه وبطالبهم بالديون عن المستحقات السابقه... هاي عينات ومقبلات من اللي جاي من السياسه الامريكيه ونتائج الانتخابات انتظرونا قريبا
منرجع للعم اردوغان لازم يهدي اللعب ويحاول ان يصلح ما افسده الدهر هاد اذا لحق لانه السلطني اللي كان مفكر يعيد بنائها راح تنزل على راسه.
هشتاغ :احنا منحبك يا اردوغان.اخر طبعه متربع البوكس اوفس في عالم التواصل الاجتماعي.
السعوديه الاخت التوائم بالتبني لتركيا حالها مش افضل من اختها. الجماعه كمان خبصوا لقالوا بس .حتى امريكا حليفتهم بتقلهم انكم داعمين للارهاب وستوب وغيروا طريقة اللعب واعرفوا امتى لازم توقفوا وامتى لازم تلعبوا .
اكيد مش راح يتوقف دعم الارهاب اللي امريكا معنيه فيه بس لازم يكون في مسار وطريق وهدف محدد ومدروس ومطابق للمواصفات العالميه مش هلا بلا. الارهاب الفوضوي مش محبوب ومطلوب ومرغوب.. الارهاب الو اصول ووقت وزمان ومكان وكمان مواعيد والا الشغله بيتصير شوربه.
السعوديه اليوم تطالب المجتمع الدولي حل معاناة الشعب السوري وحل الازمه السوريه بعد ما دمرت ما يمكن تدميره ودعمت الارهاب بما يمكن دعمه ودورها البناء في هاي المسأله بدوش تنين يحكو فيه. يا كبدي عليهم تكبدوا ودفعوا المليارات مشان تطير الاسد والاسد بعده محله.
المندوب الدائم النائم والقائم في الامم المتحده عن المملكه السعوديه السفير فيصل طراد بالامس الاربعاء طسنا كلمة
بلاده اللي عبر فيه عن قيام المملكه بواجبها على اكمل وجه تجاه الاخوه من الشعب السوري وخصوصا في موضوع ايواء ودعم اللاجئين السورين لدرجة ان دموعنا كشعوب فطت من مأقينا وبدنا حدا يهدينا.
بموت انا بالستيستيك هاي الحسابات والارقام اللي بطروقنا فيها المسؤولين السعودين طالعه نازله وكتير دقيقه وحساب الخطئ فيها يصل للصفر, كلها درر مش اكاذيب.
مزبوط المثل بقول: اكذب اكذب تتصدق حالك,, وهيك المسؤولين السعودين.
قبل اشهر صرح السعودين ان هناك 2.5 مليون لاجئ سوري.
اليوم على قول السفير السعودي مستر طراد عدد اللاجئين السورين هو مليون بالاضافه الى 100 طالب سوري في المدارس السعوديه.وبقولك انو السعوديه من اوائل الدول اللي ساهمت بدعم ورفع معاناة السورين منذ البدايه.
والاخوه السورين الموجودين بالسعوديه محمولين على كفوف الراحه كل عائله تملك فيلاوامتيازات لابو موزه اوعدنا يا رب.
وعلى المستوى الإقليمي والدولي بلغ إجمالي المساعدات التي قدمتها المملكة حتى الان للأشقاء السوريين سواء داخل سورية أو بدول الجوار ما يصل إلى حوالي 900 مليون دولار أمريكي بشكل مباشر أو عبر آليات العمل الدولي أو عبر الحملة الشعبية لنصرة الشعب السوري، كما التزمت المملكة خلال مؤتمري الكويت ولندن الأخيرين بتقديم 325 مليون دولار.(كلام السفير السعودي طراد حرفيا الله وكيلكم مش من عندي ).
مشان اللي خلقكم يا جماعه هاد مبلغ بتحدث فيه السفير عن الدعم مدخول يومين للسعوديه هالايام اكثر من 900 مليون.قبل سنتين كانوا مدخول يوم واحد من النفظ.
حرب اليمن بتكلف يوميا 200 مليون بالشهر 7.2 مليار دولار.
سوريا يتبرع لها بحرب دمرتها ولاعاده بنائها تحتاج اكثر من 250 مليار دولار ب 900 مليون دولار خلال 5 سنوات.
ولكو لدعم الارهابين في سوريا دفعتواعشرات وميات المليارات خلال 5 سنوات جاين تقولوا 900 مليون بكفوش حق سندويشات للمساكين والمسخمين من اخوتنا السورين اللاجئين لاسبوع.
فعلا اذا لم تستحي فاصنع ما شئت.
يا جماعه انا ولعت معي وارتفع ضغطي وشاش حجر نفوخي وراسي .
سؤالي الاخير الاهبل :معقول انو الاتحاد الاروبي يدفع 6مليار يورو يعني 8 مليار دولار لتركيا مشان اللاجئين السورين الموجودين على اراضيها بالسنه بس ,,وتركيا مش عاجبها والسعوديه اللي هي اصل المصايب والكوارث على الشعب السوري وما دخلنا باليمن وبقية الشعوب مسؤولها رفيع المستوي بحكي بهذا المبلغ قدام كل شعوب العالم مش بس العرب.
شخصيا انا اليوم اطالب من كل الشعوب العربيه التبرع للملكه السعوديه بالاموال لدعمها في محنتها الاقتصاديه تصوروا 900 مليييييييييييييون للسورين.
على الاقل كان وصلوهم لمليار كنا اشترينا اكم صحارة بندوره وخيار.
اكثر من 150 مليار دولار دفعت السعوديه لشراء اسلحه فقط في السنوات الخمسه الماضيه غير الهمبرغر والكوكا كولا والشيبس.
اشي بحط الاعل بالكف ...حلوا عنا ياااااااااااا

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات