عندما نذهبُ أنا و أمّي .. إلى الجنّة

عماد عبد اللطيف سالم

الحوار المتمدن-العدد: 4942 - 2015 / 10 / 1 - 13:58
المحور: كتابات ساخرة
    

عندما نذهبُ أنا و أمّي .. إلى الجنّة

أمّي تقول : يابه شوَكِتْ تِطْلَعْ تقاعُد ؟ مو صار عمرك 100 سنة . شنو قابِل راح تاخُذ تقاعد مال ديناصور !!! .
أنا أقول : يُمّه مو الراتب راح يقِلّ . و ميكَفّي إيجار بيتج ، وإيجار بيتي . والعيشة صعبة .
أمّي تقول : يا إيجار يابه ؟ إنته إطلَعْ تقاعُد ، وأُخذني آني وأهلك لتركيا ، نعيش هناك بشقّة مفروشة ، وراتب التقاعُد يكفّينه ، ويزيد .
أنا أقول : و ريحة ترابنا الثابرتنه بيهه يُمّه ؟ وطعَمْ مَيْنا يُمّه ؟ و " دليميّة " مضايفنا يُمّه ؟ و قّصَبْ أهوارنا يُمّه ؟ والباجلّة بالدهن مال قدوري يُمّة ؟ و باجة إبن طوبان يُمّة ؟ و لبن اربيل يُمّة ؟ والكباب والتكّة على الرصيف يُمّة ؟ . والفلافل و العَمبة " أمّ الشريس " يُمّه ؟ .. وعزانا و سخامنا يُمّه ؟ و كَبور أهلنه يُمّه ؟ .. و الوصيّة مال دفنتج يم فلان المشتاكَه لضحكته هوايه .. يُمّه ؟ .
أمّي تقول : يابه هيّه كُلهه " كَبور " . و وين متروح أرض الله. خلّي نطلَع من العراق يابه .
آني خِلًصْ كَلبي ، وبعد ما أتحمّل هاي الخِلَق الزفرة . وأريد آخر وجه أشوفه كَبُل ما أموت ، هوّه وجه " كينان أميرزالي أوغلو " .. موهاي الوجوه الكَشره اللي ما أدري رب العالمين وين جان ضامهه إلنه .
أنا أقول : زين يُمّه . يجوز بعد كم شهر يطلَع قانون التقاعد " الموحّد " . ويكَولون بي " سُلّم " رواتب يخلّي الفرق كُلّشْ قليل ، بين راتبج التقاعدي الـ 400 الف دينار كل شهرين ، وراتب أصغر " مسؤول " بدولة العراق الديموقراطية - التعدديّة - الأتحاديّة – التوافقية – أبو الـ 40 مليون دينار كل شهر .
أمّي تقول : يابه أشو إنته صاير " قشمر " ؟ . مو عيب عليك ، وعلى شيبتك ، وعلى شهادتك ، وعلى خدمتك أم الـ 45 سنة ، وعلى قاطَك و رِباطَك .. تخلّي هاي " اللمايم " تضحك عليك ؟ .
انا أقول : شخسرانين يُمّه . ننتظر " حزمة " الأصلاح الثالثة .. و نشوف . واذا طِلعَتْ هَمْ " كلاوات " .. وراهه نْهِجْ .
أمّي تقول : يابه إنته ليش متقبَلْ الله ياخُذ أمانته منّي ، وآني أمشي على رِجْلي ؟ يعني إلاّ أنْشَلّ ، وأنْذَلّ على إيد نسوانكم حتّى يشتفونْ بيّه ؟ . يا إصلاح بي خير نترَجّى من ذوله يُمّه؟ ذوله مرّة يريدون " المارد " يطلع من القمقم ، ويهشّم الزجاجة مال الخلّفوه !!! . ومرّة يريدون " اصلاح الكوكب " !! . ومرّة يلغون وزارة المرأة أمّ العشرين نفر ، ويبقّون دواوين الوقف السنّي ، والشيعي ، والمسيحي ، والأديان الأخرى .. وهيئة الحجّ والعُمرة ، والنزاهة ، والمفتشّين ، والرقابة الماليّة ( أمّ النص مليون موظف ، وألِف مدير عام ) .. وإحنه بين مُهاجرين ، وبين مُهَجَرين ، وبين نازحين ، وبين ناس كَاعدة وساكته ، وكاتلهه القهر . لا تعليم بي خير . لا قضاء بي خير . لا مَيْ ، ولا كهرباء ، ولا حُصّة تموينية ، و لا سيارة " زِبِلْ " ، ولا سيارة نجدة ، ولا سيارة اطفاء ، ولا سيارة اسعاف ، ولا سيارة " أمّ الدخّان " .
أنا أقول : لعَدْ هاي هيّه يُمّه . حضّري غراض الدفنه مالتج . ولتنسين الصابونه مال حصة التسعينيات التموينية ، هاي الضامتهه بنُص الجِفَن من عشرين سنة .. لأن إنتي متروحين للجنّة إذا منغسلِجْ بيهه . ريحتهه مُعتّقة .. و تْخَبُلْ حتّى الملايكة . وآني من باجر راح أقدّمْ طلب التقاعد . و وراها نروح نأجّرْ شُقّة شويّة جبيرة بتركيا . و وراها عود أدفنج بأسطنبول ( لأن إنتي مشايفه البحر " شو كبير " أبد . وتكَولين لازم أشوفه كَبُل ما أموت . هسّه على الأقل شوفيه ورا متموتين ) . و لأن إنتي متحبين البَرِد .. ودومج لازمتج الباردة وتختضّين ، وهاي أنقرة كلّش باردة .
أمّي تقول : وإنته وين راح تندفن يابه ؟ إنته هم جبير بالعُمر . ويكَولون ذولة الكبار بالعُمر ، بس يطلعون تقاعد .. يموتون .
أنا أقول . آني اذا اموت راح اندفِنْ لو بـ " هاواي " . لو بـ " ميونيخ " . لو بـ " سيبريا ".
أمّي تقول : يابه لتخلّي بالي عليك ، وخلّيني أموت مرتاحة . هاي " الكَبور " وين صايرة ؟ .
أنا أقول : يُمّه هاي مو " كَبور " . هذي بيوت بـ " الجنّة " . بيت يم عمّي حسين أوباما . وبيت يم بيبيتي أنجيلا ميركل . وبيت يم خالي فلاديمير بوتين .
موتي يُمّه .. واندعيللي أروح يمهم . هذوله مينذّل يمهم أحد .. ومينظلُم يمهُم أحد .
هذوله يمهُم الواحد يموت منّاه .. و يندفِن منّاه .. لو يِنحِرِك اذا ماعنده فلوس دفنته منّاه .. والكُلّ تروح لـ " الجنّة " كَبَلْ .. بدون " جَفَنْ " .. وبدون صابونة مال حصّة مستلميهه بالتسعينيّات .
هاي الصابونة اللي ماتتْ ريحتهه .. وإحنَهْ ليهَسّه عايشين !!!! .

#عماد_عبد_اللطيف_سالم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات