شغل حكومة - سنترال المرج

روماني سمير
كاتب, باحث, شاعر, مبرمج
(Romany Samir)

الحوار المتمدن-العدد: 4892 - 2015 / 8 / 10 - 15:09
المحور: كتابات ساخرة
    

سنترال المرج .. متحف ومثال للنظام الحكومي اللي ماشية بية البلد .. عديت علية من اسبوع انا واحد صحبي .. دخلنا نسأل علي في خدمة العملاء الخاصة بالخطوط الارضي .. ويدوب لسة بندخل نسأل لقينا الموظف الموجود بيرد بعدوانية وبتعنت مش مفهوم سببه ومش مبرر " لسة محدش جة " ونفضلنا وركز في التاب اللي بيلعب فيه ..

سبنا المكتب ورحنا الاستعلامات .. وانا داخل سمعت جملة فيها كلمة سببتلي صعقة وحسيتها دخلت ودني بالبطئ زي فيلم ماتركس كدة .. خصوصا اني في مكان الكلمة دي بتعبر عن جهاز هو اساس شغلهم اصلا .. الحجة الموظفة بتقول لزميلها " شوف السلفر يا احمد " .. بيرد عليها ويقولها " السلفر باين واقع " .. بصينا لبعض انا صاحبي ومبقناش عارفين نضحك ولا نلطم .. ورحنا للراجل وقلنا نساعده .. بقوله "اعمل بنج علي ايبي السيررررفر واتأكد انه شغال ".. وكانت الطامة الكبري في رده علي " معندناش بنج " !!!!! .. سكت من المفاجأة ونزلت دمعتي .. كان نفسي اقوله انا معاي .. معاك كيس اعبيلك فيه ..

سبته ورحت لشباك "تي إي داتا" بتاع اشتركات النت بسأل علي اشتراك اللاسلكي ... وسألته اقصي سرعة نت علي اللاسلكي كام .. فبيقولي " 256 جيجا " ... رديت وقلتله " حضرتك تقصد 256 كيلو بت " .. بصلي وقلي بلغة الفاهم " لا .. 256 جيجا اللي هي ربع الميجا من 1024" .. انا برقت وظهرت علي وشي علامات الاحية .. قلتله " يا فندم مفيش كدة احنا شغالين اي اتي ودي ابسط مبادئ الكمبيوتر " .. قام رد باستفزاز " اهلا وسهلا .. 256 جيجا واتصل اسألهم " .. انا طبعا في الغباوة خلقي ضيق خصوصا مع اللي قافش اوي في رايه .. فسبته وبعدت خالص .. انما صاحبي حاول يفهمه ويبسطهاله مفيش ام فايدة .. ثابت علي انها 256 جيجا .. ياعم دا الجيجا 1024 ميجا .. والميجا 1024 كيلوبايت .. واقصي سرعة في مصر كلها 24 ميجا .. حالف ما يفهم .. هو كدة ..

السؤال هنا .. ازاي الناس دي شغالة في حاجات تكنيكال كدة وهما اصلا مش فاهمين ابسط مبادئ الشغلانة اللي هما فيها .. وازاي شباب معاهم بكاليريوس وشهادات تدريب تملا دراج بيلفوا علي شغل .. ازي دول ماسكين سنترال وشغالين في اكبر شركة نت وتكنيكال في مصر ..
الاجابة واضحة .. في دولة بتسرح شبابها المتعلم واللي طلع عينه في تعليم 16 - 17 سنة عشان شهادة البكاليريوس .. علي تكاتك و عربيات خضار .. طبيعي ان يكون نظامها مهترئ وعفن .. وعفا علية الزمن ..

#روماني_سمير (هاشتاغ)       Romany_Samir#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات