ثلاثية:السولار و القمح و الأفيون

شوكت جميل

الحوار المتمدن-العدد: 4786 - 2015 / 4 / 24 - 23:03
المحور: الادب والفن
    

هذه الحوارية القصيرة مهداة إلى الفلاح المصري،كتبت في فترة حكم حشيش الدين،و ها نعيدها و حشيش إعلام القطط السمان يضرب بستار على الحالة المزرية للفلاح المصري...نعيدها لأن الحال لم يتبدل؛و ما بين ذا و ذاك،يا قلب فاحزن،و لعل "رانودا"إله الحصاد لدي المصريين القدماء حزين أيضاً على رعاياه،و لعله الملهم لهذه السطور؛لا سيما و نحن في 26 برمودة،شهر الحصاد و أعياد الحصاد في التقويم المصري القديم.
..........................
أبو بذره:ايه الأخبار؟...سبع ولا ضبع؟
ابنه:لا هذا ولا ذاك..يوم الحشر العظيم..الناس بتضرب في بعض نار..ولا نقطة سولار.
أبو بذره:لا حول الله..يا رب
ابنه:لكن ربك سترها..لقيت سولار مهرب..لكن سعر يقطم الوسط و الضهر.
أبو بذره:مش بيدنا..لازم نجمع حصيدة القمح...شقى السنه يا ابو شدوف يا ولدي.
ابنه:العملية خسرانه..هوا كل سنه هندفع من جيوبنا على الزرعه!يظهر ان جيبك مليان يا ابه!
أبو بذره:انت أدرى بالجيب وما فيه..يا حسره
ابنه:يبقى كفاياها خساره..مصاريف و تقاوى وسماد و دي يولو...أف هم ما يتلم.
أبو بذره:كفايه و اف !انبطلها يعني؟واحنا نعرف ايه غير الزرع والقلع؟!،ولو مات القرد القرداتي يشتغل ايه يا ابو قرن؟
ابنه:سيبك من القرد دولوقت..واسمعني لغاية الاخر..مواشي؟
أبو بذره:قول يا ناصح.
ابنه:احنا لا هنسيب الزرع ولا غيره..السولار غالي ..يبقى نزرع الغالي..تمام؟
أبو بذره:يعني؟!
ابنه:اسمعني للاخر ومتقطعش يا ابه،وصلت البلد شتلات افغاني على كيفك..من المجاهدين الابرار..على سبيل البركة.
أبو بذره(مقاطعا):يا وقعة سوده..يا ولدي..احنا بتوع القمح من زمان..من ايام جدك القديم قوى..بذره الكبير..اللي معرفلوش قرار، وبيقولوا عليه كان من الكفار، من ايام الفراعنه المساخيط..واحنا بنزرع قمح يقوت الناس ويعيّشهم..مش نزرع اللي يسطلهم؛ده سم يا ولدي..وبعدين ده مش حرام؟!
ابنه:الضرورات يا ابه..تبيح المحظورات..وبعدين الحرام الصح..ان احنا نموت من الجوع..بص لاحفادك العشره،المبهدلين قدامك،يعجبك تتدفنهم واحد ورا التاني؟
أبو بذره:لا يا ولدي..بس متضحكش على الشيبه دي..امسك دقني واحلف.
ابنه(يمسك بلحيه أبيه و يقسم):وحياه سيدي الطربوشي..الحقيقة ذي ما قلتلك،حلال و الذنب عليا إن كان.
أبو بذره(متفاجئا):بس استنى!
ابنه:ايه تاني؟
أبو بذره:الحكومة يا ولدي؟!
ابنه:الحكومة انهو؟حكومتنا الرشيدة ولا غيرها؟
أبو بذره(مغتاظا):هيا بعينها
ابنه:الحكومة يا ابه..عايزانا نعمل كده..بس مستحيه تقول.
أبو بذره:يا سلام!،ان كان الموضوع كده..الحيا..ميفدش...والا ما كنتش.. جبت اعيالك العشرة من بنت عمك!
ابنه(مترقبا):على البركة يعني؟
أبو بذره(مشيرا باصبعه):"فِ برموده دُقّ العموده"*،على بركة الله.
.........................................
(*)مثل مصري عن دق سنابل القمح الناضجة في شهر برمودا لتجميعها يدوياً.

كتبت في 15 /4/2013،و ما زالت محتفظة بصلاحيتها

#شوكت_جميل (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات