أخبار عامة - وكالة أنباء المرأة - اخبار الأدب والفن - وكالة أنباء اليسار - وكالة أنباء العلمانية - وكالة أنباء العمال - وكالة أنباء حقوق الإنسان - اخبار الرياضة - اخبار الاقتصاد - اخبار الطب والعلوم

الصفحة الرئيسية - اليسار ,الديمقراطية, العلمانية والتمدن في العراق - نوري جاسم المياحي - احنا وين رايحين ؟؟؟














المزيد.....

احنا وين رايحين ؟؟؟


نوري جاسم المياحي

الحوار المتمدن-العدد: 4751 - 2015 / 3 / 17 - 10:33
المحور: اليسار ,الديمقراطية, العلمانية والتمدن في العراق
    


اليوم والايام الجاية اني راح اسولف عن اخلاق ايام زمان اللي راحت واصبحت ذكريات واخلاق كثير من ناسنا هاي الايام السود ... الناس اليوم كلهه تحجي من ضيمها بالسياسة ... واني اشوف السياسة الناجحة هي الاخلاق ..واذا فسدت الاخلاق فسدت السياسة وفسد السياسي وحتى الاحزاب نفسها تفسد ومثل ما يكول المثل العراقي ( اذا كان رب الدار بالدف ناقرا ...فالرقص شيمة اهل الدار ) وكذلك قالوا ( ان الناس على دين ملوكها ) وقيل ( هي الاخلاق تنبت كالنبات .... اذا سقيت بماء المكرمات ) ... فكيف باخلاقنا التي تسقى بمياه دجلة والفرات الملوثة بقاذورات المجاري ؟؟؟وهذا سبب مصيبتنا وبلوتنا اليوم ..
اكو مثل عراقي يكول (اكعد اعوج واحجي عدل ).. ولكني اليوم راح اكعد عدل واصيح ياناس ... عليكم بالاخلاق الاخلاق والا راح نروح بتسعين داهية ..
اني شخصيا من فتحت عيوني قبل اكثر من 76 سنة على هاي الدنيا والناس دومهه تستغيث من الحكومة وحكامها وما راضية على الوضع وتسب وتشتم وكل حسب هواه وغايته ...وشفنا يروح نظام ويجي نظام ...ويطلع الواحد انكس من اللي قبله ..وشفت الناس تترحم على النظام الراح والمباد كما يعجبهم يسموه ..
واما بالنسبة لي شخصيا اني عشت ولحكت على العهد الملكي والقاسمي والعارفي والبكري والصدامي واخرها واتعسها النظام الحالي ...ساسة تعكزوا على الدين والطائفية وللاسف زربوا بالقيم والاخلاق وخلوا الما يسوة يضحك علينا ...وهو نظام ازلام امريكا وبريطانيا من اللكامة والنهامة ...
والغريب انا لاحظت ملاحظة ويشاركني هواية ناس من مثلي ( كبار السن ) ...ما اجه نظام الا وطلع العن من اخيه ...اليوم كلنا نعرف ان الحقراء ممن لايخافون الله ...سلموا ثلث العراق للدواعش ( والدواعش بدل ما يرحمون الشعب المظلوم .. يذبحون بالكطنة باسم الاسلام مما جند ووحد صفوف كل الخيرين في العراق ضدهم ) ... والله واعلم ربما يمكن يجي يوم يترحم عليهم العراقيون كما فعلوا مع الانظمة السابقة
الساسة هم انفسهم من سلم الموصل وبقية المحافظات و27 مليار دولار قيمة الاسلحة للدواعش .بالرضا وبالتراضي ...والغريب هم انفسهم يتباكون اليوم ونشوفهم يصولون ويجولون بحجة محاربة الدواعش وهم لايقلون شرا عن الدواعش ...
كلنا نتذكر شلون جانت الاصوات تتعالى بانصاف المهمشين ...والنتيجة كلكم تعرفوها الملايين من اهالي تلك المحافظات الابرياء الطيبين المسالمين انتقلوا من العز الى الذل والهوان والتشرد والكداية ...كل العوائل الاصيلة انسبت كسبية اهل الحسين ...واحدهم لو انكتل لو انهجم بيته ..لو تشرد وسكن الخيم بعد ان جان معزز مكرم في دارة وارضه وبين ربعه وعشيرته ...لو وكع تحت رحمة داعش التي راوته نجوم الضحى ...لو ذبحته ...وبتفس الوقت نشوف المسؤول الحكومي والحزبي لسانه بطول القندرة ...يصيح ويعربد ويكذب بحجة هو يدافع عن النازحين ..وبالحقيقة هو متونس على معاناتهم وعذابهم ...وينهب اموال مساعدتهم ..والسبب بسيط لان الرحمة انشالت من القلوب ...والاخلاق ضاعت ..
بربكم ...سؤال بسيط لكل من عنده ذرة عقل ... هو اكو داعي لكل هذه اللعبة الاجرامية بحق شعبنا العراقي المظلوم ...؟؟؟ بحجة رفع المظلومية والتهميش واذا بالظلم يتضاعف والتهميش يشمل الجميع ماعدا الاقرباء والحزبيين المقربين والعملاء ...
والاغرب من هذا نشوف هواية عراقيين وطنين وشرفاء يسالون ... وين راح نصير بعد داعش ؟؟؟ووين احنا رايحين ؟؟ فداعش راح يكرضوها بالعراق ويطردوها خارج الحدود ولد الملحة ...ولاسيما من خلق داعش لان الرادوه سووه وتدمير العراق نفذوه ... بربكم هاي صايرة دايرة ...راحت دم الشهداء هدر وبلاش ..
اليوم العراقي من حقه يتخوف من ما راح يجي ورة داعش ...وربما راح يجي الامر والادهى ...والسبب الرحمة انشالت من قلوب الناس حتى البسطاء منهم ...الكل تريد تنهب وبلا رحمة او انصاف ...اما شلون فليس مهم ..المهم انهب ..بضاعة غالية وفاسدة او طبيب لايفكر بالمريض او دواء لايداوي او سماد يسرطن النبات او طحين حصة لايصلح للاكل او مسؤول حمايته عددهم بالالاف او شرطي مرتشي ..او المودة الجديدة والمغرضة فتجد كل حرامي وفاسد ومجرم يطب تحت خيمة الحشد الشعبي او الحرس الوطني اولا ليؤمن راتب ومظلة لجرائمه تحت غطاء شرعي ..او انسان لاعلم عنده ولافهم وزايعته الكع يشد رتبة قائد في الحشد الشعبي والله هذه جريمة ترتكب بحق الشعب وتسيء لرسالة الحشد الحقيقية والشريفة ...
من الامثلة العديدة والتي لاتعد ولاتحصى على فقدان الاخلاق ... ان تشتري سبيناغ يطلع بنصه فجل ..او تشتري بصل او بطاطة من العلوة وتجد نصفها مغشوش او بنصفها طابوقة ( كثقل ) او لعد بربكم صايرة تروح تشتري صندوق طماطة من العلوة باريعة الاف دينار تدفع عليه بس للوزان 1000 دينار كثمن حتى يوزنه ؟؟ لو تدفع 2000 دينار كراجية ..ومثل مايكول المثل العراقي (تطلع البطانة اغلى من الوجه ) ...
الله على ايام زمان ...جان الغني يرحم الفقير ...والقوي يحمي الضعيف ...والناس تحترم العادات والتقاليد ..وماكو واحد يعتدي على احد ...والكبير يعطف على الصغير ...والرجل يحترم المرأة .. والابناء يطيعون الاباء ..وجانت اكو صلة رحم بين الاقرباء ...واكو وفاء بين الاصدقاء ...ورحمة وحنية ومحبة بين الناس ...وجانوا يعلمونا ( النبي وصى بسابع جار ) وان ( جارك ثم جارك ثم اخاك ) وهسة اول من يعتدي عليك جارك ...للاسف كل هاي الامور والاخلاق والقيم ... راحت وتبخرت ...الفلوس والجشع والحقد والكراهية والخسة والدناءة ...حلت محل اخلاق ايام زمان ...وبس ربكم يعرف شراح نشوف ورة داعش ؟؟؟ وكل هالمصيبة التي حلت بينا وباهلنا ...بسبب الطائفية والطائفيين والمحاصصة والمحاصصين وبركات مشعول الصفحة ابو حيدر السفير بريمر ومن سبقه وفراخه من العراقيين ..
اللهم احفظ العراق واهله اينما حلو او ارتحلوا





كيف تدعم-ين الحوار المتمدن واليسار والعلمانية على الانترنت؟



رأيكم مهم للجميع - شارك في الحوار والتعليق على الموضوع
للاطلاع وإضافة التعليقات من خلال الموقع نرجو النقر على - تعليقات الحوار المتمدن -
تعليقات الفيسبوك () تعليقات الحوار المتمدن (0)


| نسخة  قابلة  للطباعة | ارسل هذا الموضوع الى صديق | حفظ - ورد
| حفظ | بحث | إضافة إلى المفضلة | للاتصال بالكاتب-ة
    عدد الموضوعات  المقروءة في الموقع  الى الان : 3,517,084,690
- الالام الاوطان اشد ايلاما من الالام الابدان
- استثمار الفوز اهم صفحة في المعركة
- شتكول عمي ..الرشوة حلال لو حرام ؟؟؟
- معاناة الطفولة والام الموظفة في العراق
- المثلث المؤذي للعراقيين
- السياسة هي السبب
- غلطة القائد السياسي بالف
- ظاهرة الاستقواء بالاجنبي
- لماذا لانتعلم ونقتدي بالروس ونحب وطننا ؟؟؟
- من اين لك هذا يا ابو اسماعيل ؟؟
- التعصب القومي واستفزازاته سينسف التعايش والسلم الاهلي
- رسالة الملايين المحتشدة في كربلاء كما اقرأها
- مالذي اصاب احساسنا الوطني والقومي والانساني ؟؟
- ياريت يكرمنا المسؤول الفاشل بسكوته
- هل تعلمون من الوزير الذي سيورط رئيسه ؟؟
- هل صحيح ان العرق دساس؟؟
- يا حسفة الحسفة على ايام زمان
- الفاسدون والفاشلون لن يرموا سلاحهم
- اتدرون سبب أكل اللحم والاكباد نية ؟؟
- الاستراتيجية الامريكية الجديدة ..كما افهمها ؟؟


المزيد.....




- الانتخابات الإسرائيلية: نتانياهو لا يريد -الأحزاب المعادية ل ...
- فرنسا ترسل خبراء للتحقيق في هجوم -أرامكو-
- برلمان فنزويلا يصادق على خوان غوايدو كرئيس انتقالي للبلاد
- برلمان فنزويلا يصادق على خوان غوايدو كرئيس انتقالي للبلاد
- السعودية تنضم للتحالف الدولي لأمن وحماية الملاحة البحرية
- -جزار الخيام-.. مذكرة توقيف بحق عميل إسرائيلي في بيروت
- الهند تصعّد وتتوقع السيطرة على كشمير الباكستانية
- صحيفة: هجوم -أرامكو- يفتح عهد حرب الطائرات المسيرة في الشرق ...
- -لوحات كهربائية-... كيف حددت السعودية وأمريكا موقع انطلاق هج ...
- الشرطة الإسرائيلية تقتل سيدة فلسطينية شمالي القدس


المزيد.....

- شؤون كردية بعيون عراقية / محمد يعقوب الهنداوي
- ممنوعون من التطور أم عاجزون؟ / محمد يعقوب الهنداوي
- 14 تموز والتشكيلة الاجتماعية العراقية / لطفي حاتم
- المعوقات الاقتصادية لبناء الدولة المدنية الديمقراطية / بسمة كاظم
- الدين، الدولة المدنية، والديمقراطية / ثامر الصفار
- قراءات في ذاكرة عزيز محمد السكرتير السابق للحزب الشيوعي العر ... / عزيز محمد
- رؤية الحزب لمشروع التغيير .. نحو دولة مدنية ديمقراطية اتحادي ... / الحزب الشيوعي العراقي
- نقاش مفتوح حول اللبرالية واللبرالية الجديدة وواقع العراق؟ ال ... / كاظم حبيب
- مبادرة «التغيير نحو الإصلاح الشامل» في العراق / اللجنة التحضيرية للمبادرة
- القبائل العربية وتطور العراق / عصمت موجد الشعلان


المزيد.....
الصفحة الرئيسية - اليسار ,الديمقراطية, العلمانية والتمدن في العراق - نوري جاسم المياحي - احنا وين رايحين ؟؟؟