طالب الجليلي
(Talib Al Jalely)
الحوار المتمدن-العدد: 4726 - 2015 / 2 / 20 - 18:22
المحور:
الادب والفن
سبايكر ..
مرن اسنينك يا وطن
يوميه تزلك اوتتعثر !!
مثل اللي مر بينه
السنه.. ما صاير
اولا مَرْ...
الندري بيه
انته تدري!!
بس ماعرفنا
اللي جرى
للساعه بيج اسبايكر
ننشد ؟!
ياشريف اللي
ينطي النشد!!؟
والشرف هذا الوكت..
وي غيرتهم اتبخر!!
جا هوه سلعه الوطن
والشعب خلّاه الوكت
للخنوع ايصير
ابكل وكت
مسطر؟!
اخ يا رخص الوطن
من دم الركاب
ايصير تالي الوكت
للدولار
معبر ..!!
وسفه الطائفيه اتصير
هيّه الدين..
والحكّام واوية طحم
علخرفان تتبختر...
والجوامع تِكعر كل وكت
حيّا على
ذبح البشر ..
حيا على العبوات
والتفخيخ
والمصكوك بالكاتم
والباقي على الله
امحضر الغلمان
والحور امكحلات
اهناك
للأًوباش تتنطر...!!
كِلّي ابيا زمان ايصير
حتى الله ( اتصادر) اويا الدين
عشر اسنين... وشويه أكثر...
جا بس ابرهه
اتوديله حجر من سجّيل!!؟؟
مو ألف ابرهه اوأكثر
لفونا..!!
هلغربان والعربان
متحزمه علينا احزام
ماظل بيت من ابيوتك
إِلَّا انهدم
واتفجَّر ..
منك نطلب الرحمه
وبكل خطوه نحمد
على المكروه .. نستغفر
اشكيلك الهي
صار الرعب ما له احدود
من نسمع ( مجاهد)
ينتخي ..
ألله وكبر..
أبشرنَّك..
حتى المؤذن بالفجر
صارت صرخته رعب!!
لمن بصيح
الله اكبر ....
الله أكبر ...
20 ك2 2015
#طالب_الجليلي (هاشتاغ)
Talib_Al_Jalely#
كيف تدعم-ين الحوار المتمدن واليسار والعلمانية
على الانترنت؟