نقد الادباء والادب وكشف المستور ورفع العتب

جان نصار

الحوار المتمدن-العدد: 4699 - 2015 / 1 / 24 - 17:43
المحور: كتابات ساخرة
    

قد يعتقد البعض ان مقالي هذا سيكون جادا من خلال قرائة العنوان لكني اطمئن قرائي انه وكالعاده مقال ساخر سيخيب امل المثقفين بانه سيقدم وجبه دسمه من النقد اللاذع او المازع او الطاقع والابداع وهادا الكلام انا بعيد عنه.
قبل سنتين تقريبا كتبت مقالا ساخرا عن هذا الموضوع وسأحاول ان لا اكرر نفسي وهذا هو رابطه للفاضي البال والاشغال وعنده شي 10 دقائق يضوعهم من وقته الثمين على قرائته.
http://www.ahewar.org/debat/show.art.asp?aid=348238
لا ادعي اني افهم بالنقد الادبي لا القديم ولا الحديث ولا الشكلاني ولا العقلاني لا نقد الشعر ولا النثر ولا القصه او الابداع الادبي وحتى رغم معرفتي ان النقد هو تحصيل حاصل من بعد الادب وهومحاولة تقيم الادب الى سيء او جيد يعني تشريحه وفصفصته لغويا وادبيا وجماليا.
كنت دائما اقول الله لا يوقع الادباء والشعراء تحت ايدين ناقد والا اديب متمكن ولسانه سليط وحاد زي الاستاذ الدكتور افنان القاسم اللي بيشرح الجميع دون استثناء .وهادا اللي حصل. الكل وقع في ملحمة التشريح والفرم والدهس والمعس والهريس.
كلمة حق يجب ان تقال بعيدا عن المداهنه ومسح الجوخ الدكتور افنان هو اديب من نوع اخر غير اللي تعودنا عليهم واسع المعرفه ومتمكن من اللغه وله ارث وباع طويل في الكتابه والادب والابداع والمعرفه لكن وهاي الكن كبيره ووجهة نظري الشخصيه ان شخصيته خليط بين العبقريه والجنون وبين المعقول واللامعقول لا يعترف بالحدود ولا ثقافة العيب كله عنده مباح في سبيل خدمة الادب. من وجهة نظره يكتب لنفسه او لقارئ او ثلاثه ومش هامه ولا فارقه معاه حدا نرجسي مزاجي حاد الطبع وعصبي وما في عنده كبير الاالجمل.حتى الجمل من وجهة نظره مش كبير.
اما ليش انا مهتم بنقده لانه كشف المستور وما خلى صدر مغطى ومش عاجبه العجب ولا الصيام عند العرب.وخربطلنا كل قناعتنا ومفاهيمنا عن الادباء والشعراء والادب .
بتابع كتاباته في الحوار بس مع الاسف كان فيي حبة عقل وطار.
بقولك الادب مأزوم ومجزوم ومفروم ومجروم ومخروم ومش مفهوم واكتريته ما الو لزوم ويا حبذا لو كان غير معلوم لانه بالاصل مش مفهوم.
لم ارى انه يمدح شاعر او اديب وبقولك انو ادبنا لم يصل ولن يصل الى العالميه طالما هو مكتوب بهيك عقليه كله ادب فاضي وميت وروحليس يعني بلا روح وقيمليس بلا قيمه.
ادباء المقاومه هدول ادباء مساومه او ميومه ويمكن مناومه يعني خدرونا مش اكتر ولا اقل ومعظم قصائدهم مابسواش الحبر والورق اللي نكتبوا فيها.
محمود درويش شعره كان تجيش وتحشيش وتطنيش وفريش.
سميح القاسم اذا استثنينا كتاب واحد فمعظم كتاباته لا تصلح سوى للمراحيض(.ورق تواليت)
اميل حبيبي وغسان كنفاني واحمد انساني وانطونيو ارماني ادباء دمروا الادب الفلسطيني والعالمي.
كل ادوات النقد عند الاستاذ مباحه والاهم النقد النفسي واللي كله برجع للجنس على رأي يانغ والرفيق فرويد واخونا داقق دقة اعمى بزاويه ومتربط بهدول الجوز.
سعدي يوسف عنده عقدة اوديب
وفدوى طوقان وكل الكاتبات النسوان عقدة القضيب.
نجيب محفوظ عقدة الرز بالحليب.
نزار قباني عقدة الحب والحبيب.
كاتب المقال عقدة لعب الطرنيب.
ادونيس عقدة المداهنه والترطيب.
توفيق زياد عقدة الاخصاء.
توفيق الحكيم عقدة الطالعين الى السماء.
طه حسين عقدة شرب الماء.
المتنبي عقدة الكذب والمدح والرياء
بألاختصار لم يحظى اديب او شاعر بحسن القبول والثناء.
يمكن طولنا الحديث على القراء بس يا عمي من وين هالنقاد بيجيبوا الكلام وتفسيخ النياع والفلسفي والتحليل اذا كان سيئ او جيد صدقوني ما بعرف .عندهم خيال وفنتازيا عجيبي غريبي كلمه وحده او جمله قصيره بألفولها مليون معنى وبلبسونا اياها .واحنا اشباه المثقفين منصفق ونشيد ونطرب لهاي التحليلات والنقد.
اهم شئ ان الادب والابداع والشعر كله ناتج عن الجنس ومفردات مثل قضيب وفرج وخراء هي مفردات لغويه محترمه وما في عيب وهيك هاي المفردات بتدخل الادب من اوسع ابوابه بس نفس هاي المفردات اذا كانت بالزين او الكاف او بدون الهمزه عندها بتصير مفردات سوقيه.
كل ناقد بكتب على مزاجه وبقولنا اللي لم يقال على ذوقه حتى مؤلف العمل اذا كان اديب او شاعر ما كان يقصد بس ضمير الغائب الناقد وراك وراك على طول اذا بتقول او ما بتقول.
كلمة افاعي صارت قضبان وغابه او صحرى او مدينه ممكن تصير فيلم جنسي واباحي ما حد بيعرف.
توقع الغير متوقع من النقاد وكله في سبيل اثراء الادب والنقد.
الحمامه ترمز الى السلم والسلام.
الشجره ترمز الى الوطن او الصمود او الخزاني حسب موقعها وناقدها.
الفراشه ممكن ترمز الى الحريه او الموت تصوروا هالتناقض .
اذا كلمة لو في قصيدة فدوى طوقان كانت ترمز الى القضيب والاشتياق للحبيب وساعة سكس.شو ممكن نستنى اكتر.
ختاما اعترف ان الاستاذ افنان هو اديب فريد من نوعه وممكن احنا مش فاهمين عليه وممكن يكون حداثي اكثر من الحداثه تفسها والاخ عايش بفرنسا بلد الانفتاح ولا تعرف ثقافة العيب وهادا كله بالنسبي الو طبيعي.وممكن انه مستقبلا سيكون هو الطبيعي والسباق الى هذه الجرأه والابداع واحنا متخلفين(هاي ما في عليها نقاش) بس بعض نقدك كان شويه تقيل على مستوى تفكيرنا لانك خرقت التابو.
بعجبني الناقد اللي على الزر بفصل بدله.وعلى السحاب بفصل فستان وعلى القصيده بألف مأساة وتخلف شعوبنا كلها وتختصر في 10 ابيات.
قررت قرأة قصة ساد للاستاذ افنان القاسم مش محاباه او مداهنه بس لانه بنصح بقرائتها مع كاس وسكي وهاد اللي شجعني.
طالما فيها كاس يمكن تعبي الراس قبل ما نسكر ونفقد الاحساس.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات