اماني وامال وابراج 2015

جان نصار

الحوار المتمدن-العدد: 4677 - 2014 / 12 / 30 - 16:11
المحور: كتابات ساخرة
    

اتمنى للجميع احلى الامنيات والصحه والعافيه وبس ارجوكم اكتر من هيك ما تتمنوا خصوصا الاماني اللي صعب تحقيقها وانتو عارفين ومع ذلك بضالكو كل عام تطلبوها وتتمنوها ..وانتو عارفين ومتأكدين انها ما راح تتحقق بس تناحه وقلة عقل وقلة حيله وعجز بعدكم بتتمنوها وبتطلبوها.
المشكله ان امانيكم كلها خلال السنوات القادمه جابتلنا الدور ارجوكم مشان الله ما تتمنوا بليز.
مثلا القضايا المصيريه والعالقه والمترسبه والمعشعشه انسوها.
حل القضيه الفلسطينيه ما تفكروا بهذا الموضوع بتاتا فكروا بالاول بحل خلافاتكم الله لا يوفقكم.ثورات الربيع العربي تمنتوا التخلص من شي 25 دكتاتور وحاكم عربي اجانا بدالهم 25 مليون دكتوري وارهابي وداعشي .
الفقر والجهل والتخلف والمرض شعوبنا تحتل المراكز الاولى فيه لذلك لا تتمنوا تغير الاوضاع اللي هي سبب تميزنا عن كل شعوب العالم واحنا هيك مرتاحين وما منرغب من اي شعب او مجموعه تتفوق علينا بهاي العطايا كتر خير الله.
اكيد كل واحد بعقلوا محضر ليستة مطالب من الله الها اول ما الها اخر بس نصيحه مني كلو على الفاضي ما تتعلقوا بحبال الهوا.ثم مين الكو(قال لكم)انو الله راح يرد على مطالبكم .
خلو الامور تمشي بسلاسه وبدون تعقيد على مقولة تفائلوا بالخيرتجدوه,هينا تفئلنا بالخير في الوطن العربي وشفوا كيف احوالنا و حالتنا صاروا بالويل من سوريا الى العراق ومصر ولبنان واليمن والصومال وفلسطين والمغرب العربي ....لو انسينا النزاعات والحروب والقتل والدمار وبقينا على التخلف والجهل والتغيب مش كان احسن .كل شعوب العالم بالطالع الا شعوبنا بالنازل.
خلينا بالاحلام والاماني البسيطه والشخصيه اما العامه ولا تفكروا فيها .اذا كنت اعزب تمنى الزواج اما اذا كنت متزوج فتمنى الطلاق .لا تبحثوا عن السعاده والحنان والراحه في احضان ازواجكم وزوجاتكم ابحثوا عنها في احضان عشاقكم وعشيقانكم اذا في واذا ما في اضربوا راسكم بالحيط.لا تفكروا بالغني والثراء والاموال والبليونيريه الموجودين بالعالم مثل بيل غيتس او كارلوس الحلولانكم ما راح تصيروا زيهم لان الغنى هو غنى النفس.(اكيد راح نقول هيك لانه مش طالع بايدنا اكتر من هيك.ال يعني القناعه كنز لا يفنى)

ابتعدوا عن التفكير بالهموم والمصائب والاحزان والاوطان بالهروب من الواقع كما عشتم طوال حياتكم بدفن رؤوسكم بالرمال او اللجوء الى التعاطي بالمسكرات والمخدرات وهيك ما بتعرفوا وين الله حاطتكم.
تابعوا توقعات المنجمين والمنجمات واخبار المصايب والنعم اللي راح تنزل عليكم في العام القادم مثل كل الاعوام بابتسامي عريضه وصور سلفي انتوا وكل افراد العائله وعيشوا اللحظه مش اكتر .
عام 2015 يعني ال 15 اللي بعد الالفين فيها 3 خمسات وهذا بحد ذاته سنة تفائل خمسه وخميسه وخامسه بعين الحسود .
كل الابراج راح تكون سنة خير وسعاده وفرح. ويللا غنى وثراء شو انا دافع من جيبتي.
الابراج المائيه والترابيه والناريه والهوائيه والمهلبيه سعاده ميه في الميه.
راح في النصف الاول من السنه يتعامد كوكب عطارد مع المشتري بالارض والشمس والقمر وراح تصير الهوايل وراح تنفرج الامور وتنحل كل مشاكلكم قولوا انشالله.
في النصف الثاني من السنه كوكب نبتون والمريخ راح يتقابلوا مع الشمس وسكان الارض ويغنوا سويا ما بلاش نتكلم بالماضي .
اصحاب الابراج الحيوانيه عشيتكم راح تكون هنييه.
برج الاسد خليك واحد صحيح مش كمالة عدد وصدقني راح ربنا يبعتلك المدد.
برج السرطان لا تبقى قلقان راح تفرج بعد فوات الاوان.
برج العقرب راح يجيك الحب مكهرب ومع هيك ما في الك مهرب.
برج الحمل بتفتش على العمل ولا يهمك دايما في امل خليك صابر مثل الجمل.
برج الحوت عدوك من غيظيو راح يموت وراح تجيك رحله على بيروت وتربح باليانصيب 3 بيوت.
برج الثور خليك على عطور كريستيان دور وللبنات والشباب العرسان راح يقفوا بالدور.
برج الجدي الك والها الحب والزواج والسعاده راح يهتدي فلا تردد ولا تترددي.
برج العذراء اذا اجاكم النصيب لا تقولو لاء ولأخر السنه راح تكونوا بحالة سعادة واسترخاء.
برج الميزان رحلة عمل الى اليابان وراح تفرج وتصيروا بمنطقة الامان.
برج الدلو النجاح راح يكون اليك والو واقدامكم على ابواب الثراء من اولو.
برج القوس الاستقرار والعمل زي الويات سوس حياتكم خضره ضلكو مرفوعي الروس.
برج الجوزاء البحث عن وسيم او حسناء بدو شوية اعتناء من هون لأخر السنه راح يكون قد جاء.
هاي يا جماعه الابراج راح تكون كلها خير وعلى الصعيد الشخصي راح يكون كلو تمام وراح يجيكو الوحي والالهام.على الصعيد العام المصايب لسه لقدام .
اتمنى للجميع الجميع سنه قادمه مباركه ملئوها الخير والسعاده.
المقال هو فقط خيال وفتازيا ابتسموا شوي وتمنوا.. شو في غير هيك طالع بايدكم تعملوا واصلا كل سنه بنعاد نفس السيناريوا.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات