بناطير بفلس

مروان مازن

الحوار المتمدن-العدد: 4603 - 2014 / 10 / 14 - 21:56
المحور: كتابات ساخرة
    

الچلب وفي حتى من ينچلب و هلگد ما وفي اذا يلح وياك بعد شيخلصك يلطش بيك فد لطشة و چلاب (عجاج) احد سكان منطقة خليل ابن خال الدكتور تحسين الفلاني (تحسين ابو الليل) فحل و نثية و ينامن بالليل يم الكابينة الچبيرة الي بصف بيت عجاج و شادات ويه خليل الي يشتغل بأسواق بمنطقتهم و يرجع بالليل مشي و يركضن وراه لحد ما يشگن بنطرونه و يرجعن للكابينة و لاعبات بي طوبة و خليل راح هداد على بيت عجاج و رزله رزالة ناشفة و گاله خلي يدخلهن لبيته و لا يعوفهن بالشارع و عجاج گاله يعون (ينبحن) الليل كله و هذا الچلب عنده قدرة جنسية مو طبيعية و مطيح حظها للمسكينة و هو يخليهن بره حتى براحتهن و ما يگدر يأذيهن لأن فايداته بالحراسة و لخاطر خليل رح يحاول يشوفلهن حل.

يوم يومين تلاثة اربعة ما موجودات الچلاب و خليل فات من يم الكابينة يتمندل عود مسيطر و باليوم الخامس فات و شافهن جايات عليه بكل سرعتهن چنهن بيب بيب و هجمن عليه اقوى من قبل و نعلن والديه و الا شوية تروح قلاقيله من وره العض مالهن و خليل هم راح هداد و عصبي و بعلو صوته صاح على عجاج و طلعله الرجال خجلان و مدنگ و وره ما اترزل گعد يعتذر و يتأسف و گاله ذيچ الايام الي ما چانن يطلعن للكابينة دخلهن لبيته و ربطهن و ظل الچلب يدفع و يضرب بالمسكينة يريد تنهزم وياه للكابينة و كتل روحه الفحل عليها بس يريد ***** و ما خلنهم ينامون و وداهن لبيت اهله و ظلن يعون و چلبن بالچاملغ بسنونهن و گوه عافهن ليلة هناك و گالوله كتلن بزونتين و عگروگة و رجعهن للبيت و ظلن يلحسن بوجه ابنه الصغير و يلعبن وياه و رادن يسگطن المرة لأن اخذت الولد منهن حتى تنومه فاكتشفهن عدهن عواطف قوية و يشتاقن للاماكن و الاشخاص و عضن خليل هالمرة اقوى لأن چانن مشتاقاتله و من يبعدهن عن الكابينة رح يعضن خليل اقوى و اول و تالي رح ينهزمن للكابينة.

و بعد النقاش و التفكير وصل عجاج لإتفاق ويه خليل و گاله كلما چلابه يشگن بنطرونه هو يشتريله واحد جديد.

العبرة : سوگ البالات رح ينشط من وره عجاج.

#مروان_مازن (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات