عماد عبد اللطيف سالم
الحوار المتمدن-العدد: 4573 - 2014 / 9 / 13 - 22:57
المحور:
كتابات ساخرة
حسيبة
فد يوم ، من جِنِتْ زغيّر .. آني وبت خالتي ( حسيبة ) رِحنَه لـ " سوك الجديد " دنشتري كعك و " مكّاويّة " من فرن (منعم الحاج نبات) كَبال شريعة " القمريّة ".
حسيبة بت خالتي جبيرة ، بعُمر أمّي ، و كرخيّة حوك ، ولسانهه مو إلهَهْ ، وشايفه نفسهه شوفة ، وهوايه رجال تشوفهم الناس " عالين جَناب " .. وهيّه متشتريهم بـفلسين .. وتسميهُمْ " بْعُورَة " .
وإحنَه راجعين لبيتنا بـ " الشيخ علي " ، جان لازم نمُرّ بـ " سوك حمادة " .
بنُص سوك حمادة ، يَمْ " جبار الكببجي " جانتْ أكو كَهوة .و كَبال هاي الكَهوة أكو نُكَرة مليانة " سْيان " .
حسيبة من وصلتْ للكَهوة ، إستِحَتْ من الزِلِمْ .. ولفّتْ عبايتهه على وجهّه حيل .
وهناكْ ، وعِثْرَتْ .. و وكَعتْ بنُصْ نُكَرَة السيان ، مثِلْ " بُقْجَة " سودة .
طبعاً الكرخيين المالين الكَهوة ، عطّالة بطّالة ، كُلهُمْ كَامَوْا يصيحون : الله أختي .. الله أختي .. الله أختي .
حسيبة بعدهه ملفلفة بعبايتها ، و كَاعدَة بنُص النُكَرة .. عتّتْني من إيدي وكَالتْ :
شوف يَوَلْ . شبيك واكَف مثل الأثوَلْ . روح على ذوله " البعورة " ، كَُلْهُمْ خلي يبطلون يصيحون الله أختي .. الله أختي . لأنْ إذا ظَلّوْا يصيحون الله .. الله .. الله .. ماراح أكَدَرْ أكَوم من هاي النُكَرة .. لو يجي ... ؟؟ .
ألَفْ رحمة تنزِلْ على روحج بت خالتي حسيبة .. شلون عرفتي من ذاك الوكت .. أكو هيج علاقة " عكسيّة " ، بين ذوله اللي دومْهُم يصيحون .. الله .. الله .. الله ، للضحكِ على الناس .. وبين النهوض بسرعة من " نُكَرِ السِيان " ، التي تتّسِعُ و " تتمدّد " ، على مرأىً و مَسْمَعٍ منهم ، وبسببهِم .. في " أسواق حمادة " الديموقراطيّة ، التعدّديّة ، الأتحاديّة .
#عماد_عبد_اللطيف_سالم (هاشتاغ)
كيف تدعم-ين الحوار المتمدن واليسار والعلمانية
على الانترنت؟