رِحلة إكمال معاملة التقاعد تبدأ بخطوة..

سامر رسن الواسطي

الحوار المتمدن-العدد: 4571 - 2014 / 9 / 11 - 23:15
المحور: كتابات ساخرة
    

المفروض مِن منتسبي الجيش وباقي الأجهزة الأمنيه ما يفكرون إنهم يُضحون بأنفسهم في سبيل وطن،وإنما من أجل اي شيء اخر يرونه مقدس،لأنه بعد إستشهادهم فأن أي شخص من اقاربهم عند مراجعته لدوائر الدولة للحصول على مستحقاتهم ومخصصاتهم التقاعدية،راح يكفر بالوطن وأبو الوطن بسبب الذله والإهانة التي سيتعرض لها في هذه الدوائر....
فحتى أكَمِل مُعاملة التقاعد الخاصة بأخي الشهيد بوزارة الدفاع وبسبب الازدحامات وقطع الطرق،يومين اني أصعد وانزل جسر الجمهورية مشي،شنهي يا الهي مقاول واريد اشوف الجسر كم متر حتى أبلطه،من بعد عيني عينك....
حاير شأسولف ومنين أبدي،وعيونكم كفرت بالوطن،يعني أجي مترهي ومسيطر لموظف الحوانيت حتى اكمل براءة الذمه حسبالي صدك اني بوطن ديمقراطي متحضر يحترم الشهيد والمواطن:
*السلام عليكم،العفو أخي عندي معاملة شهيد،وصارلي يومين بايت بالدولعي واريد ارجع لأهلي بالحي التابعه لواسط،بلكي تكملي براءة الذمه هاي...
--أخويه نص ساعه وتعال الموظفين ديتريكون،والله بطران حسباله بس هو عنده شهيد....
*يلا ميخالف ما لحكَوا يتريكَون ببيوتهم،خلي اروح للموازنة...
*السلام عليكم اخيتي،العفو عندي معاملة شهيد،وصارلي يومين بايت بالدولعي واريد ارجع لأهلي بالحي التابعه لواسط،بلكي تكمليلي براءة الذمه هاي...
--دقيقه...اكَولج رؤى شفتي برج العذراء اليوم،يكَولي راح تسمعين خبر كولش حلو من الحبيب بس ما حدد يا حبيب منهم،إي ميسون حبيبتي واني برج الدلو يكَولي إنه الحبيب راح يبطل يلعب بذيله ويجر عدل....
العفو اخويه إنت شنو؟
*اني الثور يابعد أخوچ وطوايفه،اقصد برج الثور،لأن مواليدي1-5وحتى يصادف عيد العمال...
--اخويه منو سائلك على برجك؟،ليش ما تجي تاكل جبس ويانه على الواهس؟،صدك لو كَالوا محافظات مشايفين،عيد ميلاده،مو على أساس هو توم كروز،قصدي إشعندك هنا واكَف شتريد؟....
*عندي معاملة شهيد أخيتي،وصارلي يومين بايت بالدولعي واريد ارجع لاهلي بالحي التابعه لواسط،بلكي تكمليلي براءة الذمه هاي...
--يبوووووي والله ثبرتني،عدنه إجتماع هسه،ساعه وتعال...
*يلا..على ما جماعة الحوانيت يتريكَون وعلى ما موظفات الموازنة يخلصَّن إجتماعهن مع الأبراج،اروح اكمل المعاملة من شعبة الرواتب...
* السلام عليكم سيادة المُقَدم،العفو عندي معاملة شهيد،وصارلي يومين بايت بالدولعي واريد ارجع لاهلي بالحي التابعه لواسط،بلكي تكملي براءة الذمه هاي...
--اخويه انت جاي تطلب إيد بنتي لو تراجع بمعاملة؟شنو منطيني عنوانك الكامل وداكَلي فلم اليتيم؟،روح أوكَف بالباب من اكمل شغلي انادي عليك....
*يلا ميخالف،اروح لمديرية التدقيق اكمل المعاملة على ما جماعة الحوانيت يتريكَون وعلى ما موظفات الموازنة يخلصَّن إجتماعهن وعلى ما ابو الرواتب يخلص شغله...
*السلام عليكم سيادة العميد،العفو عندي معاملة شهيد،وصارلي يومين بايت بالدولعي واريد ارجع لاهلي بالحي التابعه لواسط،بلكي تكملي براءة الذمه هاي...
--اي إبني تدلل،والبقية بحياتك،وبفضل دم اخوك ودماء باقي الشهداء إحنه جالسين هنا على التبريد وبهاي المكاتب "يا ألله جنهه فرجت"،استريح ابني،جيبوله ماي وشاي،هسه دقائق ومعاملتك تكون جاهزة وترجع للحي،وأمانه تصليلي ركعتين بمرقد سعيد بن جبير.
*لا تكلف نفسك سيدي،وروح أبوك ها،اصليلك ليلة القدر كلها،بس كملي المُعامله فدوه لعينك..
--هاي شنو..،شو معاملتك بعدها فارغه،كَوم ابني كَوم،لازم تكملها بالأول من الحوانيت،وبعدين من الموازنه،وبعدين من الرواتب وبعدين تاخذها صادرة ووارده وبعدين تجيني وبيك خير وتدلل...
*تِسلم سيدي ما قصرت،بس لو مخليني على الاقل أشرب استكان الشاي..

#سامر_رسن_الواسطي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات