عن قضيه مؤسسه بلادى : ضحايا الرومانسيه الثوريه .

احمد العتر

الحوار المتمدن-العدد: 4452 - 2014 / 5 / 13 - 06:56
المحور: مواضيع وابحاث سياسية
    

بخصوص قضيه مؤسسه بلادى فى شارع محمد محمود واتهامها باستغلال الاطفال فلى شهاده فى هذا الموضوع وانا ليست لى مصلحه شخصيه واعرف القائمين عليها من بعيد كرفقه ثوره بدون معرفه مباشره واشهد لهم بحسن الخلق الثورى والفكر الانسانى المتحضر ... بس هحكيلكم حكايه عن اطفال الشوارع :
انا كنت محامى فى جبهه الدفاع عن متظاهرى مصر لحد يوم 30 يونيو و بعدها تركت المحاماه الحقوقيه لكرهى الفطرى للاخوان .. اغلب الاعتصامات اللى تم فضها من 9 مارس 2011 وحتى اخر اعتصام تم فضه فى عصر الاخوان فى ابريل 2013 اشرف انى كنت فيهم ثائرا ومحاميا ,,وكان الملاحظ ان بعد كل اعتصام يتم القبض على الباقين فيه عندما يقل عددهم وكان عدد اطفال الشوارع بالنسبه للمقبوض عليهم هم نسبه 65 % تقريبا كلهم بياخدوا اخلاء سبيل و30 % باعه جائلين وحراميه ومخبرين واغلبهم كان بياخد اخلاء سبيل بعد مشوار قصير و5 % ثوار حقيقين ودول بعضهم مطلعوش لحد دلوقتى ممن السجون ...
الملاحظ لى ان اغلب او كل القضايا كان اطفال الشوارع فى الفئه العمريه من 12 سنه لما فوق هم اللى بيحكوا لوكيل النيابه كل مايحدث فى الاعتصام .. مين جاب اكل ومين جاب ميه ومين جاب اجهزه صوت ومين جاب وجبات ومين جاب بطاطين ومين مسئول عن المنصه ومين كان بيلف عالبوابات وتوزيع البوابات والحراسه فى الميدان وكان هولاء الاطفال بيسلموا القائمين على الاعتصام بكل اريحيه (تسليم اهالى ) وبدون طلب او الحاح يذكر من وكيل النيابه لدرجه ان احدهم مره اخرجنى عن شعورى من كتر الاسامى اللى قالها واغلبهم اصحابي ومكانوش فى المحضر وقلقت يقول اسمي رحت مقاطعه اما م وكيل نيابه عابدين وهو امر غير قانونى ( قال يعنى فى حاجه كانت قانونى ) : ماشفتش البرادعى كمان جه جابلكم كشري عشان تدى للباشا اكتر من اللى عايزه ونحبس البرادعى بالمره .. برغم ان كل اللى ذكرهم بالاسم هم اللى كانوا بيجيبولهم اكل وملابس وبيعلموهم القرايه والكتابه والرسم كمان ... وسمعت من كذا صديق امنى ان اغلب العيال دى شغالين مع الامن اصلا
.... الخلاصه ان فيه سن معين ماينفعش معاه غير مؤسسه اصلاحيه عقابيه تابعه للدوله طبعا مش زى الاصلاحيات الزباله اللى عندنا بس مينفعش التعامل معاهم بواسطه الجمعيات الخيريه ودول الاطفال فوق12سنه ... والتعامل مع الاطفال دول كانداد والتصديق انهم امنوا بقضيه الثوره عشان قعدوا معانا شهر بنعلمهم تحيا مصر وننزل بيهم كبالغين مظاهره لدعم احمد دومه دعت لها السيده الفاضله زوجته بفكره انهم ناضجين وثوريين هو تصرف غبي وخاطىء تماما وده كان نوع من الرومانسيه الخرقاء اللى تميزاغلبنا كثوريين وضيعت مننا كتير فى معارك جانبيه استنزفتنا ببلاهه صادقه ...
اما الاطفال الاصغر من 12 سنه فممكن التعامل معاهم بطريقه مؤسسه بلادى
.. اما طبعا شغلهم من غير ترخيص فده تقليد قديم للامن بعدم اعطاء التصريح رغم طلبه من قبل الجمعيه وتقديم كل الاوراق والتصاريح اللازمه لتظل الامور فى قبضه الامن والتهمه جاهزه وشهود الاثبات والضحايا هم الاطفال الاكبر سنا اللى بيكسبوا من الشارع والامن اكتر بكتير من مجرد ملابس حلوه وتعليم واكل نضيف ومعامله حسنه ,,, قانون الجمعيات الاهليه لازم يتغير ويجب ان يصر على مراقبه التمويل الشرفاء قبل اى احد لانهم وحدهم المضرورين من تهمه التمويل الخارجى الجاهزه فى الادراج لكل من يتجرا ويفعل مالا يرضى الساده الجدد ...
وفى النهايه يدخل السجون شرفاء الثوره الذين لا يريدون حتى الان ان يتخلوا عن رومانسيتهم الثوريه المفرطه والرغبه الجامحه لتغيير العالم فى 4 دقايق وهو مما جعل كثير منهم الان يرقدون تحت الارض او يرقدون فى غياهب السجون .

#احمد_العتر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات