وأولئك هم الفائزون...صدگوني

حبيب العربنجي

الحوار المتمدن-العدد: 4450 - 2014 / 5 / 11 - 19:07
المحور: كتابات ساخرة
    

أكو برنامج مال طبخ وطبيخ، يشارك بيها الطباخون والشيفية من كل مكان وأذواق، وأربعة حكام ، بكل حلقة أربعة طباخين، ويختارون طباخ واحد ويفوز بعشرة ألاف دولار ويصعد للنهائي إللي جائزة الفوز خمسين الف دولار. هذا البرنامج على قناة ديسكفري .
والشغلة الصعبة في شروط هاي المسابقة أن المتسابق ما يعرف شكو بالصندوق إللي گدامه، يفتح الصندوق وتطلع له مخضر ولحم وبهارات أشكال وألوان، ولازم يسوي أكلة طيبة ومنظر حلو من مكونات هذا الصندوق، وبنص الطبخة يجي أحد الحكام ويجيب كيس زغير بيه مفاجأة، شغلات عجيبة إذا المتسابق ما ضابط شغله ما يعرف يتصرف ويلوص الطبخة، مثلاً كيس كيوي وشلغم وجبن أبيض وداتطلي وراس سمچ وتعال حطهن بالأكلة إللي سويتها وبشرط ما تترك ولا شي والأكلة تظل طيبة ومنظر حلو ! كل هذا لازم خلال عشرين دقيقة من وقت فتح الصندوق حتى إعداد الأكلة والطبخة للحكام حتى يضوگونه وينطون قرارهم ورأيهم.
دا تشوفون شلون مسابقة قتالية !! إلى درجة الحلقة مال قبل أسبوع چان المشاركين هم الشيفية ورئيس طباخين أقسام الأطفاء في أميركا يعني رجال FIRE FIGHTING وهذولة معروفين بقوة تحملهم وصلابتهم لأن شغلهم يتطلب هيچ ، مع هذا، من صعوبة الحلقة ثنين رادوا ينسحبون وما تحملوا صعوبة المسابقة وگالوا البقاء تحت النار لست ساعات أفضل من هاي المسابقة ! بس بعدين بعيني وآغاتي رجعوا عن قرار الإنسحاب تماما مثل ما عدنا الجماعة يگولون ننسحب وهناك يطلع نفسه ويگول : تظلون كمش وتصدگون الإشاعات ؟؟؟
بهيچ نوع من المسابقات إللي يفوز يستاهل كل فلس ياخذه جائزة لو مكافئة لأن هاي الجائزة تجي بعد ما ينسمط سمط وفلوس تعبان بيها مو مثل الفلوس عد فصيل خاص من الكائنات الطفيلية المؤذية تجيها فلوس بكل دلال، فلوس مدللة، لا شايفة تعب ولا ضيم، وداعتكم حتى فلوسهم غير شكل، دولارات ما شايفة لا جيب ولا محفظة، مو مثل الفلوس إللي تجي بتعب، كلها عرگ لو دهن لو بيها ريحة لفة فلافل لو ملزوگة بتيپ لو شريط أكثر من قيمة العملة. وبهاي الحلقة إللي قبل أسبوع فاز بالمسابقة رئيس طباخين ما أعرف يا مقاطعة باميركا، واحد چحنتي بمنتصف الخمسينات من العمر، عضلات وقلافة وشوارب بس واحد يشتهيها من يريد تهتز عنده الشوارب لأغراض بهلوانية وحتى يصيح ويگول : هو هيچ الحچي !! مو هيچ الحچي يابة...ويا بط يا بط إسبح بالشط .
المهم، قام رئيس الحكام وبيده صك بمبلغ عشرة ألاف دولار حتى يسلمه للفائز، وهنا النقطة إللي أريدكم تركزون وياي لأن شغلة ما تحصل إلا بدول الكفر جعلنا الله من مواطني دول الكفر بلكن نسوي مثلهم! لو نصير مثلهم .
الفائز بالمسابقة رفض الجائزة !! وما رفضها لأن مبلغ قليل وما يتناسب وي التعب وصعوبة المسابقة ! بس گال كلمتين مو بالعظم لا عبالك جاك همر وعالراس ، گال : شلون تريدوني أستلم فلوس مو مالتي، هاي فلوس المجتمع وجاية من ناس دافعين ضرايب للدولة، إذا آني أقبل وغيري يقبل وذاك يقبل، لعد فلوس دافعي الضرائب كلها تروح هيچ، لا للخدمات ولا للتطوير، تروح لهيچ برامج !!
ولأن هناك دول ديكتاتورية واحد يگدر يتصرف مثل ما يريد مو مثل حال دولنا الديمقراطية إذا واحد هيچ يتصرف يسحبون من عنده الدم وبعدين الجنسية ، فرئيس الحكام ما تفاجأ بالتصرف ولا گال شي، ولا المخرج صاح كت cutحتى يقطعون المشهد في حال بث مباشر ولا أبو المونتاج شايل اللقطة في حال الحلقة تسجيل. وكمّل الفائز الملحد الكافر جاحد نعمة الفوز ومثواه جهنم إن شاء الله وگال : آني ما راح أخذ الجائزة بس راح أتبرع بالصك لمركز تأهيل أطفال يعانون من مرض التوحد وتأخر التعلم والنمو العقلي !!
وهسة أنقل الكاميرا إلى بغداد !
خلينا نتصور مسابقة رمضانية بمجلس الوزراء، مسابقة " منو يعيّد بالعيد ؟" ! يا وزير يگدر ياكل نص لشة خروف محشي على الإفطار ويحلي بأكثر من عشرين قطعة من زنود الست بعشر دقائق، والفائز جائزته بطاقة سفر له ولعائلته وعائلة أخته وعائلة بنت أخت نسيب أبن عمته لقضاء العيد في النمسا وبعدين من تعب الإجازة بالنمسا يروحون يرتاحون أشوية بألماينا وبدربهم همين يسلمون على الرئيس المحنط هناك، مع خرجية جيب لأولاد الفائز دفترين وخمس دفاتر للزوجة لزوم شفط الدهن وتضييق المهبل وتبييض الفخاذ ونفخ الصدر البنچر بسبب سوء الإستخدام وعشرة دفاتر للفائز لزوم وضع مساند للقضيب اإللي يعاني من الذل وراسه مطاطى وتضييق الشرج البواسيري ! وطبعا يأخذ الجائزة مع طلب بإعادة النظر في تقييم الجائزة لأن ما حاسبين بطاقات الموبايل !! گبرررررر إللي ما شايف وشاف كوكو ماما الجايف عباله نستله سايحة وراد يلطعه !! ومن يومه عنده عقدة النستلة !
هذا الفرق بين ناس وناس، وآني ما أحچي على جماعتنا لأن ما بيهم شي حتى واحد يدگ طبل، بس أحچي على هذا إللي فاز ببرنامج الطبخ، أكيد هذا تصرف هيچ گدام التلفزيون لأن عنده إنتخابات مال رئاسة مجلس الإطفائيين في أميركا ويريد جماعته يصوتوا له حتى يفوز بهذا المنصب الشرفي، وأكيد هو مليان شعارات ونفخ، لأن قابل الأطفال راح يتعالجون بعشرة ألاف دولار ؟؟؟ صدگ هذا كمش أبو الدقلة، خطية يريد يصير شريف براسنا.
إحنا جماعتنا ما يحتاجون يسوون هيچ، لأن همّ يعرفون نتيحة الإنتخابات وماكو داعي لهيچ عنتريات ولا مزايدات ولا فنطازيات !!!
صدگ هاي فنطازية لو حامض حلو !!
يا رب...دولة كافرة تطلع لي بسحبة يانصيب معرض بغداد الدولي..مع گرين كارد لدولة الكفر
يا رب والله استاهل
والله الموفج....

#حبيب_العربنجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات