نوري المالكي.. اللعبة أنتهت!

فالح العتابي

الحوار المتمدن-العدد: 4374 - 2014 / 2 / 23 - 23:57
المحور: كتابات ساخرة
    

نوري المالكي .. اللعبة أنتهت !
فالح العتابي

شلون ما دا أشوف , نهاية أبو سراوي كربت ..ولا دكولون ما نصحناه .. بس هو الله أيسلمه ,عينه قويه وما ينرد ..ولو واحد غيره .. يشلع ويخليها على خرابها , أحسن ما يزرب بيها بعد .. ويصير سحله بالشوارع .. لان بصراحه ,لا العشاير أتفيده , ولا سنداته الجربه تنفعه, خو سوات أيصير طشارها بفلس .. وشوف يا أبو سراوي , أحنه شعب أخ كحبه, ما عنده صاحب صديج .. بس يفتر الدلكو بغير أتجاه .. أتصير بالنعل ..حتى أسأل اللي كبلك .. عشره مثلك جان أيحطهم بجيبه الخرده , والداير ما يدور بس من أسمه ترعش .. وجانت نفس هاي العشاير اللي تركصلك اليوم , هي نفسها ركصت جوبيه ودك أصبعتين بذاك الوكت.. وصار اللي كبلك ,حامض حلو بحلوك العراقيين .. بس شوفه هسه وين راح .. باعوه العراقيين خرده , ونسو أيامه ..وكل ما أشوف أبو سراوي راح تلحكه .. من وره ولايتين كضيتها خمط ولغف وطيحان حظ ..ولا دكولون ما نصحناه ..
لا تصدك راح تحصل على نفس النتائج اللي حققتها كبل أربع سنين .. لو مطي يركب مطي ,حتى بالتزوير ما تكدر .. ولو تستورد مو مهندسين محترفين بالانتخابات ..هم ما راح تحصل على ذيج النسبه.. صدكني يا أبو سراوي ورقتك يبست , يعني بح .. اللعبه خلصت .. واللي جابوك ما عاد محتاجين الى خدماتك , لان أكو أحسن وأفضل منك .. ومثل ما تعرف أكو مصالح عليا .. خو بعينك شفت وين صدام وبن علي والقذافي ومبارك وصالح .. وأنت مو أحسن من ذوله .. ولا دكولون ما نصحناه ..
ولغفت مال الله ومال عباده.. وهسه روح أكعد بالفله الجديده بلندن , وخوش راتب تقاعدي خالي وهم حمايه .. ويابه هم تكدر تاخذ علي الموسوي هديه من العراقيين , وأذا تاخذه ننطيك أثنين مجانا , للجهود اللي بذلتها في شك الصف الوطني , وبث التفرقه بين الشعب .. وأذا ما عجبك , وتريد تبقى , وتشوف بعينك نهايتك .. هاي تبقى يمك .. ليش دكول محد ما كلي ..لان راح تبقى مكشوف , لا قايد عام ولا وزير داخليه .. والناس اللي أذيتها ,راح أتحاكمك على الصفقات الوهميه اللي خمطت منها وساعدت هوايه فاسدين على الهرب, ونشرت الرعب والخوف , من خلال ميليشياتك اللي تصول وجول وهي تصفي الناس البريئه , والاعتقالات العشوائيه .. يبوه هوايه جرائم أرتكبتها بحق العراقيين , ومو أخرها, جنودنه الابطال اللي زجيتهم بقتال , حتى تحصل على نصر أيفيدك بالانتخابات , بس تجري الرياح بما لا تشتهي السفن..ولا دكولون ما نصحناه!!
على نوري المالكي , أن يعي حقيقة , أن زمن الدكتاتورية قد ولى , ولا مجال لاعادتها مرة ثانية ..لان هذا الشعب الذي منحه صوته , قبل أربع سنوات , من حقه اليوم , أن يسحب تأييده من حفنة , أستغفلت وضحكت وسرقت أموال الشعب بالحرام ..

#فالح_العتابي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات