القاموس

سعدي جبار مكلف

الحوار المتمدن-العدد: 4343 - 2014 / 1 / 23 - 07:48
المحور: الادب والفن
    

لقد قتلونا مرات ...انا لا اريد اكون احجار شطرنج اموت من اجل بقاء الملك، قدمنا حياتنا قرباناً على دروب النضال ولم نعلم ستكون هذه النهاية ..
المجد لأبطال الكلمة والثبات والغيرة والخزي والعار كل العار للمزيفين في ديار الغربة

..احنا أحنا..
خل اسولفلك منو احنا
احنه نجمه الطرزت غبشة صبحنا
اتغنت بلحن الاحبه
اتزامط ابدشت زلمنا
عيدنا اذار احنا
ايهل فرحنا
ضحكه ابوجه الطفوله
يوم هلهولت عرسنا
صلنا ابقصر النهايه
وتشهد اوراق المحقق
الماتت ابلحظة حلمنا
وهلهلت دشة زلم
التشچغ البيرغ تغني
للبطوله والمحبه والسلم
الموت احنا
احنا نندل الطريق ومحنا تهنا
ونشبگ اعواد المشانق
مرجوحه او دولاب عدنا
ما تخطينا المبادئ
ولا كتبنا اوراق غبره
انحطت ابوسط الجرايد للعلم
منهو باع الطوگ ماله
شلون طوگه ينثلم
طرشينه الطوگ بالدم
شذر اصلي ذهب يلمع
يلمع ابدله وقلم
اخ من چلمة الاغم
يطري چلماته ابشماته
من يسولف چلمه غبره
ويطفي اوجاغ المضيف
ويعيش دايح بالوهم
ترجف الشفه من اذكره
والگلب يصرخ اعرفه
ما اريد اعرف مذله
شايله ذل اوهضم
ونصبح احچايه ابسلف
ودور بينا الاسطوانه
احنا رايه اعله القمم
اسأل التاريخ عنا
اقره وگفات البطوله
بالمحاكم ...بالمشانق
يوسف ايشد الهمم
من توسد حبل موته
صاح غنوه وأبتسم
گال احنا اعله من هاي المشانق
ماني راگع للظلم
وتزهر اوراد الحدايق
وتعلن الدنيا ربيع
ما نضيع ما نضيع
لحظه او تموز يصرخ
هذا انا ثوره من اجل الجميع
جيت غنوه وبتسامه
نشتري الحب اونبيع
انا بستان الجميع
الناس حلوه
اتحني بدروب المحبه
لمه حلوه ما تضيع
بلحظه گتلوا ضحكة الناس الوفيه
وگتلوا الطفل الرضيع
حل علينا اشباط الاسود
گام يحصد بل اسود
مالا ماي او مالا جود
الموت يحصد بالشوارع
ابلايا حد ابلا حدود
أسألو قصر النهايه
أسألو الملعب علينا
مات عادل والعبلي
شنهو گلي
شنهو اسمك
سجله نطلب خلود
الموت ارحم من حياة الذل يخايب
ما نعود...ومانعود
كل قصدهم ما نجود
نشروا اعلان الرذيله
اقتلوهم بالدروب
لا ترحمون الشباب
لا ترحمون الشيوخ
لا ترحمون الطفوله
دم وموزر شليله
صارت الدنيا عليله
كلها خدعه كلها حيله
كشر التاريخ الاسود
ظالم ومنهو اليشيله
ودور بينا الاسطوانه
يرجع اشباط الخديعه
ايريد يگطعها الجديله
يغني الحان الرذيله
يصيح جلاد الحياة
يگوم يحصد بالاباة
وينتشر لحن الممات
عاد هولاكو التتر
عاد موت السنديان
طاح واحد ...طاح ثاني
والربع نوم ابسبات
نشف مايك يل فرات
حرگو اليابس والاخضر
ماتت اشجار ونبات
ما عرفتوا شنهو جاي
ما قريتوا شنهو فات
راح مصطاف ونعيم
وهم سعيد الطوف ابوسط القناة
رعد جبار الشهاده
ونافع ويعيوني نافع
ورقه بيضه ابلا رفاة
وعشنا بجبال اوسهول
گلها تصرخ وشتگول
يا وطن حر وسعيد
بلگي يا تينا الفرج
بلگي ياتينا الرسول
عشنا بالهور ونجول
رحنا نعزف بالطبول
انغني للحب للحياة
وننتظر دشة حمد
ننتظر فالة ضمد
تالي لا ناي اليغني
وبيتنا خالي العمد
احنا هرش ابلا وتد
ماكو گهوه او لامضيف
ريگنا يتنه الشهد
أي وين نلگاه الشهد
والعمر وچه ابمحطه
وما گدر يصبر بعد
والنهايه اخت البدايه
خرگه او حفره ولحد

ملاحظة
ـــــــــ
اذار...عيد تأسيس الحزب الشيوعي العراقي
يوسف...فهد سكرتير الحزب الشيوعي اعدم سنة
1948
عادل..سلام عادل سكرتير الحزب الشيوعي استشهد
بالتعذيب سنة 1963
العبلي..شهيد الحزب
مصطاف...الشهيد مصطفى اشنيشل البطل
نعيم...الشهيد عبد المنعم فزع
سعيد...الشهيد سعيد صبيح
رعد جبار ...الشهيد البطل استشهد في كردستان
نافع..الشهيد البطل نافع عبد الرزاق الحيدر

#سعدي_جبار_مكلف (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات