إحسان خليل
الحوار المتمدن-العدد: 4327 - 2014 / 1 / 6 - 11:30
المحور:
الادب والفن
ذات يوم بعيد قمت من القيلولة منزعجة جدا و مندهشة لسماعى أصوات طرق على الباب عنيفة و متلاحقة و سريعة . كنت مازلت أفرك فى عينى عندما سألت من و راء الباب , بصوت واضح و مسموع " مين اللى على الباب " . تمنيت وقتها ان تكون جارتى منتبهة لما يحدث لعلنى احتاج الى مساعدتها .
_ أنا يا حبيبتى , افتحى بسرعة
_ خير ان شاء الله حصل حاجة
_لا كله خير اتطمنى
_ أنا آسفة نسيت المفتاح فى الباب و اظاهر راحت عليا نومة .
أدخل زوجى رأسه من الباب من قبل أن اكمل فتحة و همس : " لا أنا اللى جيت بدرى لظروف حتعرفيها بعدين , المهم انك تلبسى هدوم الخروج بسرعة , و تطلعى تحضرى لنا الغدا لان فيه ضيوف طالعين دلوقتى على السلم " .
_غدا ؟ غدا ايه !! دا انا النهارده بالذات ما عنديش ريحة الغدا , و كنت ناوية اعملك الاكل قبل ما ترجع بالليل . كل اللى فى البيت , شوية شوربة عدس صغيرين يا دوبك يكفوا نفرين .
( كان زوجى فى صباح نفس اليوم قد أخبرنى انه سيظل فى الجريدة الى وقت متأخر حتى ميعاد الندوة التى يقيمها الحزب الفلانى و موضوعها "عن فلسطين و المقاومة الفلسطينية " و ستكون ضيفة الشرف مناضلة حقيقية تعمل فى المقاومة , و يتحسب الحزب لحضورها فهم يخشون أن يصيبها أى مكروه , من العدو فى الطريق ) .
__ عارفه مين اللى طالعة على السلم دلوقتى , دى المناضلة اللى كلمتك عليها الصبح .
_ ايه الاحراج ده بس يا ربى
_ _ لا احراج ولا حاجة , غيرى بس انتى هدومك بسرعة , أنا حأدخل اعمل الشاى و أحمر فى نفس الوقت شوية همبرجر , و تبقى تقدميهم انتى مع شوربة العدس .
كانا سيدة و رجلا , كانت السيدة تجلس على الكنبة الرئيسية , تبدو فى الاربعيينيات من عمرها , متوسطة الحجم اقرب الى الرشاقة منها الى السمنة , متوسطة الجمال , لكنها متأنقة فزادها هذا جمالا . أما الرجل فقد عرفته فهو الاستاذ فلان الفلانى زميل زوجى فى العمل , و كان مازال واقفا امام الكرسى المقابل للسيدة ,. عندما لمحتنى السيدة ظهر عليها الضيق و عدم الراحة , ففكرت , لعلها كانت تظن ان ترانى بخلقة و هيئة أخرى فى هذا الحى المتواضع .
مددت يدى للسلام عليها و انا ارحب بها , فمدت يدها و هى جالسة . ثم جلست انا على الكرسى الأقرب لها , أبديت سعادتى بزيارتها لنا و أخبرتها ان كل المصريين يحبون فلسطين و يحبون كل من ينتمى اليها . و ان حلم الصبا كان بالنسبة لى هو انى أكون فدائية و اساعد المقاومة الفلسطينية .
لاحظت و جومها و زاغ بصرها لمدة ثوانى , كأنها تذكرت شيئا من الماضى البعيد يؤلمها و يزعجها , وكأن هذا الشئ له جذور تضرب فى روحها من أيام الجدود . و وصلنى شعور انها لا تريد أن تسمع عن محبة أحد لفلسطين , فتعجبت بشدة , ولكنى فكرت لعلها ذكرى خاصة . فأكملت حديثى : "صدقينى أنا مش بجاملك , انا فعلا بحب فلسطين جدا لدرجة انى بحس ان حبها بيجرى فى عروقى و ان ". قاطعتنى السيدة و بصوت عالى قالت : استاذ سيد انت سبتنا و رحت فين , من فضلك انا اتأخرت وعايزه امشى حالا .
_ حاضر حاضر انا خلصت الشاى خلاص ( وضع زوجى امامنا صينية الشاى و طبق الهمبرجر , و همس لى انه وضع شوربة العدس تسخن )
عندما هممت بتقديم طبق الشوربة لها أزاحت يدى ثم ازاحت الصينية من امامها .
_لا لا أنا مش حاكل من البتاع ده خالص , انا حاكل بس من الهمبرجر اللى عمله سيد .
_ دا طعمه جميل خالص , جربى حتى تدوقيه صدقينى حيعجبك .
قبل أن استدير لاعطى الضيف الطبق الخاص به , كان هو قد أتى و وقف خلفى و طلب طبقه و امسك معلقته و ذاقه و هو مازال واقفا .
_ الله الله الله دا طعمه جميل جدا , تسلم ايدك انتى عملتيه ازاى ده .
_ اشكرك , انا فعلا بعمل العدس كويس و المرة دى كمان حبيت اجرب و ضفت له ورقة سلق واحدة علشان سمعت انه بيخليه لذيذ .
نظرت السيدة الى طبق شوربة العدس و قالت : " ايه ده هو ماله أخضر كده ليه " .
_لكى حق هو مخضر شوية لانى حطيت فيه زى ما قلت لكم , ورقة سلق واحدة .
_ لا لا حرام عليكى تقولى لمدام كده , العدس لا لونه أخضر و لا حاجة و طعمه لذيذ جدا , ممكن تدينى طبق تانى يا مدام لو سمحتى , دا طبعا لو ان فيه .
_ آه طبعا حاضر , حاجيب لك حالا , من عينية
بعد ان انتهى الضيف من احتساء طبق الشوربة الثانى , اراد الذهاب الى منزله حتى يستريح قبل ميعاد الندوة فى المساء , سألها اذا كانت تريد المغادرة معه , فأجابت بالنفى و اخبرته انها تريد ان تنتظر بعض الوقت .
عندما أرادت الرحيل طلبت من زوجى ان يركب معها و يوصلها الى خارج منطقتنا السكنية حتى لا تتعب فى البحث عن الطريق .
_ ايه ده !! اذا كنت انا ركبت جوزك معايا و وصلته لحد هنا علشان ما يقفش ينتظر مواصلات فى الشمس الحر دى .
عاد زوجى بعد بضعة دقائق و قال لى : " دى صدعت لى دماغى خالص , طول السكة تحكى لى عن جوزها اللى معذبها , و بتقول لى انها رغم كده , كل يوم قبل ما تخرج الصبح , بتحرص على ان تحضر له الفطار و تقدمه له و هو قاعد فى السرير و ما بتنساش ابدا كوباية اللبن البارده اللى بيحب يشربها على الريق . مش زى مراتك اللى انت مدلعها و سايبها نايمة بالنهار , و حتى مش عامله لك غدا
_ سيبك انت من الكلام الفارغ ده كله , لانى عايزه احكى لك حاجة , و تلاقيها هى غيرانه لسبب أو لآخر .
أنا عايزه اقول لك حاجة غريبة حسيت بيها , صحيح انت قلت لى انها مناضلة و انها من المقربين من ياسر عرفات , لكن صدقنى انا حسيت انها متضايقة من انى بحب فلسطين , فى عينيها حاجة غريبة كأنها بتكرة سيرة فلسطين و اللى بيحبوا فلسطين
_ لا لا يا شيخة حرام عليكى , دول كل اللى بيعرفوها فى الحزب بيتكلموا عليها كويس جدا و بيحترموها , تلاقيها كانت بتفكر فى حاجة تانية خالص و مش سامعة انتى بتقولى لها ايه .
فى المساء بعد ان عاد زوجى من الندوة حكى لى أن الندوة كانت ممتازة و الكل كان فرحان , و منظمين الحفل أشادوا بالضيفة كثيرا لدرجة أنها تأثرت جدا من فرحتها بحفاوتهم بها , و عندما طلبوا منها أن تصعد للمنصة و تلقى كلمة , لم تستطع أن تتكلم الا جملتين او ثلاثة و اجهشت بالبكاء و بعض الحضور بكى ايضا لبكائها . _ الحمد لله ان اليوم مر على خير و ما حصلش اى شئ سئ للضيفة , و زى ما انت قلت ان الندوة كانت ممتازة . ( فكرت فى نفسى , غريبة امال ايه الاحساس اللى كان باين فى عينيها ده ؟ !!! ) .
بعد أربعة ايام أو خمسة , جاء زوجى وهو حزين أو خجلان لا أعرف و قال لى :
" تصدقى يا حبيبتى انتى كان عندك حق فى الكلام اللى قلتيه عن الست دى ".
أى ست ؟!!
_ الست اللى جت عندنا من يومين هى و فلان , كلهم كانوا النهاردة بيتكلموا عن انها عميلة , و جاسوسة , و ان ياسر عرفات نفسه عارف كده و طلب من اللى حواليه , انهم يعاملوها كويس و ما يحسسوهاش انها انكشفت و انها بقت ورقة محروقة ,و طلب منهم انها لما تعوز تقابله يسمحوا لها بمقالته زى الأول , بدل ما العدو يبعت لهم بديل جديد مش عارفيته لسة , و من خلالها برضه يقدروا يوصلوا رسايل مغلوطة للعدو .
#إحسان_خليل (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
