اقتراح بتحويل فلسطين الى قطرستين....ساخر

جان نصار

الحوار المتمدن-العدد: 4087 - 2013 / 5 / 9 - 16:24
المحور: كتابات ساخرة
    

ايام الراحل معمر القذافي اقترح على الفلسطينين والاسرائيلين ان يتوحدو في دوله ثنائيه عجائبيه على الطريقه القذافيه وسماها اسراطين وطبعا اخونا كان نص مجنون ونص عاقل وقامت الدنيا وما قعدت على شطحاتو. وأستحلت الفكره للبعض على اساس ان الفلسطينين بعد اكم سنه ونتيجة نشاطهم الجنسي الفائق وتكاثرهم العددي بياكلوا الاسرائيلين بلا ملح ديموغرافيا وبعدين منرجعهم على اوروبا بس ما ظبط المشروع وما حد وافق عليه.
وزي ما احنا عارفين ان الفلسطينين هالايام صاروا ملطشي للرايح والجاي وللي بسوى وما بسواش ومصرين علىالانقسام بشده وغيرو ما النا بديل .وبصراحه بدونو ما منتنفس وحتى لو تيسنا واصتلحنا راح نفتش على مليون سبب عشان نختلف وبيناتنا مش بحاجه لاسباب لنختلف اصلا الخلافات معنا بالوراثي ونعشق اكل الخوازق اذا لم يكن من المجتمع الدولي واسرائيل والعرب فمن انفسنا.
المصالحه موضوع غير قابل للنقاش بين فتح وحماس لانها من مصلحة الجانبين على اساس كل واحد مسيطر بكنتونو ومفكر انه بحكم على دوله ومنها راح ينطلق ويحرر القدس ويرجع فلسطين والاجئين اذا ضلو صامدين وما راحو على كندا والبرازيل والصين .طبعا كل واحد من الطرفين بلوم الثاني وهاي تمثليه على الشعب المقهور اللي مقتنع انو هيك قيادي راح تحل القضيه.يا جماعه هاي القيادي بواد وانتو بواد وهدول جماعه مرتاحين على هالوضع كل واحد بقبض من جهه او من نفس الجهه وشعارهم قبضني واحيني اليوم وانساني بكره.بصراحه مع هيك قيادي واخوكم مقتنع بالموضوع لن نصل الى حلول لا ناشف ولا مبلول واتذكرو كلام هالمسطول وقولو انو كلامو كان معقول.
الاقتراح الجديد هو تحويل اسم دولة فلسطين الى اسم دولة قطرستين .وبهذا طالما ان دولة قطر صارت تتكلم بأسمنا وبتعطينا مصروفنا في غزه للاخوه في حماس وهيهم رايحين يبنوها احلى مما كانت وسمعنا ان القدس في الها دعم بمليار دورار نعم دورار وجماعة وين عرام الله كمان في دعم ما تخفوش.
المطلوب تفويض رسمي للقطرين عشان يتكلموا باسم الفلسطينين وبدون تفويض يعني شو راح تفرق هيهم نازلين طخطخه وجعجعه وبفصلوا واحنا لازم نلبس... .قرارات هيئة الامم ممكن تعديلها او شطبها.عندك بقاء الاستيطان وزيادته و تبادل اراضي والتنازل عن القدس او منشوفلها حل يرضي الاسرائيلين بمباركة الامريكيين . .الاجئين منحلها بالدفع قبل الرفع.وطبعا المبادره العربيه والقرارات الدوليه مش ضروريه.
اذا صار اسم الدوله قطرستين راح نعمل اتحاد كونفيدرالي بين فلسطين وقطر واسرائيل .اي نعم الاتحاد الكونفيدرالي يجب ان يكون بين دولتين متجاورتين بس احنا هالحكي مش هاممنا.وطالما ان قطر مستقبلا راح تشتري فرنسا ليش ما نبعها فلسطين ونعملها قطرستين ومستقبلا راح تكون واحة دمقراطيه وسنغافورة الشرق الاوسط.تصوروا قطرستين واسرائيل .الاموال من بابا حمد قطر والتكنولوجيا والعلم من اسرائيل والايدي العامله من الفلسطينين .
اذا رفض الفلسطينين فرصة عمرهم هاي راحت عليهم لان قطر هي الفيوتشر المستقبل المال يتكلم هذا من جهه وهيك هيك قطر عندها علاقات فوق العادى مع اسرائيل بتوجيه الامريكان وبعد اسابيع في تواقيع بين قطر واسرائيل على اساس التعاون التكنولوجي وتوابعه واحنا عارفين ان توابعه الله يستر.اذا رفض الفلسطينين هذه الفرصه الذهبيه وهم مشهورين بأضاعة الفرص على رأي ام كلثوم بتكون راحت عليهم.
اذا وافق الفلسطينين د خول هذه اللعبه عليهم استقبال القرضاوي احلى استقبال بكل فصائلهم لانه جاي بتصريح رسمي من قطر ولازم تعميق الانقسام على اساس اذا ما خربت ما بتعمر. وجماعة رام الله بلا جعجعه على الفاضي .
قيادة حماس مبسوطين وبترقبوا زيارة سندوكان عفوا اردوغان وبقولك انو الهيمني الامريكيه طارت على اساس ان الهمام اردوغان قال لوزير خارجية امريكا مستر كيري انو سيحضر الى غزه رغم عنهم وجماعتنا طاشو على شبر مي وقلك ان الامريكان صاررت هيمنتهم بخبر كان ... .معقول يا ناس في حدى بفكر هيك وبقنع شعبه بهالفكره وهو مش مقتنع فيها.
يا اخوان اخوكم اردوغان العوبان ماشي مع الامريكان وصديق اسرائيل وهادى التمثيل مش لازم تستغفلونا وتقنعونا فيه .غارات اسرائيل على سوريا كانت بغطاء جوي وموافقة اردوغان واعلنت عنه اسرائيل ومشان الاخ يكمل اللعبه بقولك بتصريح جعجعه انو معارض الضربي .
ختاما ايها الاخوه الفلسطينين لا تفكروا بتقدم العمليه التفاوضيه طلما انو كيري كيري راح جاي ومحمل سكر وشاي .والمقاومه في الثلاجه بأومر قطريه تنفيذا للرغبات الامريكيه والدول العربيه تعاني من مشاكل داخليه وخارجيه .واسرائيل مطنشاكم والمجتمع الدولي نساكم..
الحل: ان تصنعوا قدركم بأيديكم تغير القياده الحمساويه والفتحاويه ونفض الغبار عن اليسار الفلسطيني واعادة هيكلية منظمة التحرير على اساس المقاومه الشعبيه .لان القياده الحاليه اثبتت فشلها وهي غير قادره على ايجاد حلول والقياده.المطلوب طقم جديد وان تتحرك كل قطاعات الشعب الفلسطيني وعلى رأسهم الشباب وان يكون الاجماع الشبابي على القضيه بقدر الاجماع على المشترك الفلسطيني في الاراب ايدول محمد عساف.
ختاما الفقره الاخيره وهو الحل هي شطحاط وخيال واسع من الكاتب للفذلكي فقط لا يمكن تحقيقها وهي مجرد فشة خلق.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات