حوار مع إخواني

شريف صالح

الحوار المتمدن-العدد: 4020 - 2013 / 3 / 3 - 11:03
المحور: المجتمع المدني
    

كان لي صديق دراسة، متعهد فيديوهات السكس في فترة المراهقة، إلى أن منّ الله عليه بالتدين ـ بعد الزواج ـ إلى درجة أنه فرض النقاب على زوجته. صديقي الآن في سن حمادة صابر بالضبط، وله صلعة تطابق صلعته، باستثناء إنه أكثر بياضاً وامتلاء. وأصبح يسخّر صفحته على الفيس بوك، لتشيير كل ما يشيد بالإخوان، ويسيء إلى خصومهم، وفوجئت به يفتح حواراً معي على "الشات":
ـ السلام عليكم
ـ مساء الخير
ـ شوفت.. جبهة الإنقاذ طلعت هي اللي مفبركة فيديو السحل!
ـ يعني الكليب متفبرك وحمادة ما تسحلش؟!
ـ فيه عضو في جبهة الإنقاذ وصاحب قناة دفع له 3000 جنيه عشان يعمل التمثيلية دي؟
ـ معقول.. في بني آدم يرضى يتسحل بالشكل دا عشان ياخد 3000 جنيه!
ـ حمادة دا ممكن يعمل أكتر من كدا.. أنت ما تعرفش تاريخه؟
ـ يعني السحل دا كان كدا وكدا ولا كان حقيقي؟
ـ طبعاً كان تمثيلية.
ـ معنى كلامك إن الشرطة كمان متواطئة في التمثيلية دي!
ـ لأ، الشرطة بلعت الطعم.
ـ طعم إيه؟
ـ حمادة استفزهم بالشتيمة وخلع هدومه فجروه من قفاه والكاميرا كانت جاهزة للحظة دي وصورتها..
والدليل إنها نفس القناة اللي بيملكها عضو جبهة الإنقاذ اللي دفع الفلوس لحمادة؟
ـ طيب ليه النيابة ما طلبتش عضو جبهة الإنقاذ للتحقيق معه؟
ـ لأن الريس مرسي مش عاوز فتنة تولع البلد وفضل يعالج الموضوع بهدوء.
ـ لكن الريس نفسه قبل كدا اتهم أعضاء في الجبهة إنهم بيتآمروا ضده. وبرده ما فيش حد اتحقق معه.. والفتن اللي إحنا شايفينها دي كلها سببها إشاعات زي اللي أنت بتقولها.
ـ الريس عنده ملفات كتيرة وهايطلعها في الوقت المناسب.. بما فيها ملف حمادة.
ـ لكن الريس بالطريقة دي بيدير البلد كأنها منظمة سرية.. دي كدا مافيا مش دولة!
ـ دا طبيعي لأن البلد في مرحلة حساسة والثورة المضادة لسه نشيطة.
ـ وحمادة كمان جزء من الثورة المضادة!
ـ طبعاً مش شوفت الكليب اللي بيدافع فيه عن مبارك؟
ـ حتى لو كان فلول وبلطجي ومن جماعة "آسفين يا ريس".. دا مش مبرر لإهانته!
ـ يعني إهانة الرئيس في برنامج "البرنامج" هي اللي مبررة؟
ـ الشخص العام يجوز نقده بشكل ساخر. لكن المواطن العادي المفروض نحترم آدميته وخصوصيته.
ـ يعني موافق على إهانة الرئيس ومش موافق على إهانة حمادة؟ مع إن الرئيس رمز لمصر.
ـ حمادة برده رمز لمصر.. أي مواطن رمز لبلده.. وما فيش داعي لهالة القداسة دي للرئيس.
ـ بذمتك الناس أيام مبارك كانت تستجري تهوب ناحية القصر وتكتب عليه حرف واحد؟
ـ ما هو عشان كدا الناس عملت ثورة ضده.
ـ والثورة اختارت الدكتور مرسي.
ـ الناس اختارته عشان يؤسس لحكم ديمقراطي مش عشان يسحلهم زي مبارك.
ـ فيه فرق بين سحل وتعذيب ممنهج.. وبين أخطاء فردية.
ـ يعني كل اللي اتعذبوا واتخطفوا واتسحلوا واتقتلوا في الشهور اللي فاتت دي.. أخطاء فردية؟
ـ طبعاً.. لأن أعدادهم لا تقارن بأعداد اللي اتعذبوا في عصر مبارك.
ـ تاني مبارك! طول ما أنت شايف مبارك نموذج يبقى الثورة فشلت.
ـ طالما مرسي مسك الحكم تبقى الثورة نجحت.. ومن حقه إنه يضرب بيد من حديد كل أعداء الثورة.
ـ أفهم من كدا إنك موافق على سحل الشرطة للمواطنين؟
ـ الشرطة اتغيرت ولازم نديها فرصة.
ـ مش ملاحظ.. كل قيادات الإخوان بيدافعو اليومين دول عن الشرطة. برغم إنهم زمان كانوا
بياهجموها على أفعال أبسط من دي.. يا ترى مين اللي اتغير الشرطة ولا الإخوان؟
ـ وأنت مضخم الموضوع ليه؟ القانون هياخد مجراه. والنائب صبحي صالح نفسه قال في مجلس
الشوري إن القضية في إيد السلطة القضائية وما ينفعش السلطة التشريعية تتدخل.
ـ أمال ليه الإخوان اتدخلوا وهم في السلطة التشريعية في مجرزة استاد بورسعيد.. ما كانوا سابوها
للسلطة القضائية. طبعا لأنهم بيكيلو بمكيالين لما القضية تكون في صالحهم يهجموا بكل قوتهم ولما
تكون ضدهم ومافيش مصلحة يطنشوا ويقولك القانون ياخد مجراه!
ـ اللي بيكيل بمكيالين اللي عامل فيها ثوري وهو بيخرب البلد!
ـ وهم الإخوان صلحوا فيها إيه؟ الدستور ولا نظام الأجور! دا حتى قرض البنك الدولي اللي كان
مرسي بيعارضه أيام مبارك بقى دي الوقت إنجاز وفوايده مصاريف إدارية.
ـ الضرورات تبيح المحظورات.
ـ ما هي دي الكارثة.. لو أنت مش مستفيد من القرض تقول لي "وأحل الله البيع وحرم الربا" ولو فيه
مصلحة تقول لي الضرورات تبيح المحظورات".
ـ كل دا هايتصلح لما يكتمل مشروع الخلافة.
ـ بس الناس ما انتخبتش مرسي عشان يبقى خليفة.. انتخبته عشان يبقى رئيس أربع سنين ويمشي.
ـ ويمشي ليه طالما بيحكم شرع الله؟
ـ لأن الديمقراطية معناها تبادل السلطة.
ـ مش لازم ناخد كل حاجة عملها الغرب.. إحنا ناخد اللي يناسبنا. ولا دي كمان مختلف معايا فيها؟
ـ طبعاً مختلف معاك.. الخلطة كلها على بعضها فاسدة.. شوية إسلام على شوية ديمقراطية على
شوية شعارات إشتراكية وشوية قوانين رأسمالية.
ـ أنت مش ملاحظ إنك انتقائي جداً؟
ـ أنا اللي انتقائي؟!
ـ طبعاً.. يعني شغلك قوي سحل حمادة ومش شغلك الضابط اللي اتحرق والجنود اللي ماتوا؟
ـ انا ضد أي تجاوز. بس فيه فرق بين شخص أعزل وبين جنود معاهم السلاح والسلطة والقانون.
ـ دول ناس بيأدوا عملهم.. جبهة الخراب هي اللي تتحمل المسئولية عن سقوط كل الضحايا لأنها
هي اللي بتحرض الشباب على التظاهر.
ـ وهو التظاهر جريمة؟
ـ مش جريمة لو كان سلمي.
ـ واللي اتقتلوا قدام الاتحادية.. اتقتلوا بسبب مظاهرة الإخوان السلمية؟ ولا بسبب تعليمات خيرت
الشاطر بتأديب المعتصمين قدام القصر؟
ـ من حق الإخوان يدافعوا عن الشرعية.
ـ بقتل الناس؟
ـ لعلمك معظم اللي اتقتلوا كانوا من الإخوان.
ـ حتى لو كانوا كلهم من الإخوان، مين اللي حرض على العنف في الأول، ومين اللي حاصر
المحكمة الدستورية ومدينة الإنتاج الإعلامي.. ومين اللي هدم وحرق كنايس؟
ـ بلاش تلزق كل حاجة وحشة في الإسلاميين. وثق إن مرسي حريص على أهداف الثورة.
ـ بإماراة براءة فتحي سرور وصفوت الشريف وزكريا عزمي.. ولا بإمارة تعيين دكتور جلدية رئيس
مركز المعلومات.. ولا اعتقال الأطفال وتعذيبهم في مراكز الأمن المركزي.
ـ كل الاتهامات دي طلعت فشنك.. وللأسف بيرددها الناس اللي بيكرهوا المشروع الإسلامي.
ـ والمشروع الإسلامي بيقول إنك تقعد مع قاتل السادات.. وتتهم البرادعي بأنه عميل لأميركا؟
ـ فيه مليون دليل إن البرادعي عميل وهو سبب تدمير العراق ولو هو مش عميل ليه اخد نوبل؟
ـ لكفاءته.. وبعدين مين اللي قالك إن كل اللي بياخدوا نوبل لازم يبقوا عملاء؟
ـ دي حقيقة.. معظمهم عملاء وعلمانيين ضد المشروع الإسلامي!
ـ هو فين المشروع الإسلامي دا.. اللي كل شوية عمال تتكلم عنه؟
ـ عشان انت بس واخد موقف من الإخوان.. لو دققت شوية هاتلاقي حزب الحرية والعدالة عمل
حاجات كتيرة جميلة. قوافل طبية وقوافل لصيانة المدارس.
ـ الطريقة دي تنفع في إدارة جمعية خيرية مش إدارة دولة.
ـ دا وضع مؤقت.. لحد ما تكتمل المؤسسات الدستورية في البلد.
ـ هاتكتمل إزاي.. بالدستور اللي اتشوه.. ولا بالريس اللي واقف جنب المرشد وهو عمال يلقنه: "القصاص.. القصاص" ولا خطبه وحواراته اللي بتبدأ بعد نص الليل!
ـ سيبك من الشعارات دي كلها.. تنكر إن مرسي رئيس منتخب؟
ـ رئيس منتخب زي ما هتلر برده كان منتخب.. بس لما يطلع إعلان غير دستوري ويحرض
ضد المحكمة الدستورية ولما يطنش على قتل عشرات المصريين ولما يقسم إنه يرعى مصالح الشعب
كله وبعدين نكتشف إنه بيرعى مصالح جماعته بس.. يبقى الرئيس المنتخب دا فقد شرعيته.
ـ طيب ولما الجرايد وقنوات الفلول تنسى كل حسنات مرسي وزي ما قال الدكتور محمد البلتاجي ما
لهاش سيرة غير إنها تعمل حمادة بطل قومي ومانشيتات ضخمة لمسرحية قائمة الاغتيالات لتشويه
صورة الاسلاميين كأنهم وحوش بيحرضوا على العنف والكراهية.
ـ وهم فعلا مش بيحرضوا على العنف والكراهية؟! يعني عبود الزمر كان مسجون في قضية بلح
مغشوش؟ والشيخ شعبان ما حرضش على قتل المعارضين لمرسي والشيخ أبو إسلام ماحطش جزمته
في وش الملايين.. انت سمعت تصريحاته عن سحل حمادة؟
ـ سمعتها.
ـ ويرضيك الأسلوب دا.. رجل دين يشتم الناس بأنهم زبالة التاريخ ويقول إن حمادة مجرم ومنحط
وسافل وعنده شذوذ جنسي وكان بيتمرمغ "شو إعلامي"؟
ـ الشيخ أبو إسلام غفر الله له مش حجة على الإسلام. وبعدين هو منفعل شوية.. زي ما برده بتوع
جبهة الخراب بيقولوا عن الإخوان إنهم خرفان.
ـ أنت كل اللي همك إنك تدافع عن الإخوان!
ـ على فكرة أنا مش إخوان.. أنا بدافع عن الحق.

#شريف_صالح (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات