المطي أمطينا بس أجلاله تبدل

ماجد العذاري

الحوار المتمدن-العدد: 3986 - 2013 / 1 / 28 - 02:18
المحور: كتابات ساخرة
    

المطي أمطينا بس أجلاله تبدل
الان الاصوات تتعالى وتنادي على عدم ترشيح المالكي لولاية ثالثة ـ ـ وبعد الموافقة ما صارت اتمالخوا الجماعة هذا ايكول اتصير وهذاايكول ما اتصير وركضوا راسا للمحكمة الاتحادية ادري هي ورث ما تنطيه لغيرك وتخلص العالم ـ ـ لكن هناك اسئلة او خلي انكول سوعال اوحيد على كولة شيابنا ايام زمان ـ ـ منو هذا الي راح يجي ابمجان المالكي عدكم واحد امجهزينة وحافظ اشراح ايسوي للعراقين يعني منطينة دروس خصوصية بالدي مو قراطية
كلتوله ناخذك وانربطك بشباج العباس ابو فاضل عليه السلام وتحلفنا انه من تخلص مدة حكمك تروح الله وياك
كلتوله خلي رجال الدين بديانتهم ولا كل ساع وناطلهم ويطردوك
كلتوله خلي السياسين بسياساتهم ولا يدخلون الدين بالوسطة
كلتوله خلي النواب بانيابهم
وخلي الورزراء بوزراتهم وليس وزاراتهم
كلتوله البرلمان من يدز على الوزير خل يجي بسرعة ولايضل يدور دفاتر عتيكة ويضل يتمارض ويدور اجازات مرضية
كلتوله خل الوزراء اشوي يبتسمون على شنو اوجوهم امكشولة وزعلانين علينا
كلتوله خل يوصي الوزراء لايكذبون على الشعب خل يحجونه على المكشوف اذا عدهم الشجاعة
كلتوله خل لايستغل قضية الحسين عليه السلام للانتخابات
كلتوله مو يجينا واحد يرشح للانتخابات وايكول اني عندي دكتوراه بحب الحسين عليه السلام
ومن سئلناه شمخلص كلية جامعة اعدادية متوسطة ابتدائية كال ساقط بالصف الخامس الابتدائي 3 سنوات نهاري و3 سنوات مسائي
كلتوله خل يدير باله على الشعب المكرود
كايليله هلة الهلة بالنفطات ضمينا اشجم برميل للشته لصوبات علاء الدين لو للجولات
كلتوله خل ايدير باله ولا يفتح رجليه اثناء الوقوف ما ايصر لانها وكفة اتخوف من تداخلات خلفية
وخصوصا من الجهة الشرقية
كلتوله خل
يوكف دائما

بحالة الاستعداد وساد رجلية
كلتلوله خل يكرم اسود الرافدين بشجم دفتر ومو مثل الي قبله انطاهم 8333 دولار
كلتلوله ينطي راتب لحكيم شاكر مدرب منتخب اسود الرافدين خو مو زيكو احكسن منه
كلتوله يمعود لا تكثر من اللجان ولا تكثر من المستشارين ولا تكثر من الحمايات والسيارت المدرعة ولاتكثر من الوكلاء الخاصين ولا تكثر من الظهور يوميا على الفضائيات بس خرطكيشن كون من تطلع تحجي كلام يريح المواطن ومن يطلع الصبح ايشوف بعينه بالشارع الكلام الي حجيته بالليل اتنفذ وموجود على ارض الواقع
كلتوله خل ايشوف حال المتقاعدين والله رواتبهم ما تكفي ليومين على هاي الاسعار الي مشتعله بنار
كلتوله خل يرجع مواد البطاقة التمونية مو جانن 18 قبل بعهد صدام هسه صدام راح واخذ وياه تسعة مواد بقن بس تسعه وينهن ليش بس اثنين لو اثلاثة
كلتوله خل يخلص شغلة الكهرباء ويجبنا وزير كهربائي من منطقة سيد سلطان علي اشهر منطقة بالعراق مختصة بالمولدات الكهربائية وكل كهربائي فحل كاعد بس يلعب دومنه جيبلك واحد مناك احسن
كلتوله يمعود شوف شغلة المجاري وخل ايجوز من الشركات التركية والايرانية التعبانه ادري شنو وقف ذري علينا ذولة الاتراك والايرانيين اطلابه هي خو مو اطلابه عمي دخل ايسويها كعدة عشاير ويفصلهم ويخل يرحون ايجفونا شرهم
كلتوله اكو بالعالم شركات رهيبة على وزن رهيب والله رهيب عمي اكو شركات تشتغل بالدين انطيهم نفط وكبريت وفوسفات وحتى الكير الي بالرمادي يقبلون ياخذونه
كلتوله يمعود لاتدفع اجور العقد الي كدام خل تجي الشركة وتنصب خيامها في ديارنا وانشوف اشعدهم من اليات ومن مهندسين وخل يشتغلون عشرة بالمية من الشغل واصرفلهم سلفة وهكذا كل ما يشتغلون قسم انطيهم على كد ما اشتغلو ـ ـ يعني شربلهم على كد افلوسهم
كلتوله خلي اشوي يكون على علم ان اغلب الدول الاشتراكية تشتري نص المدينة بمليون دولار
كلتوله خل يكون بسيط ويتنازل عن عنجهياته وخل ايكون حباب وخوش ولد واخو اخيته وينتخي لنصرة المظلوم
كلتوله خل يشوف السجون وايروح بنفسه لا يدز لجان
كلتوله خل يفتر بالليل مثل عبد الكريم قاسم الله يرحمه من كال لبو الفرن زغر صورة الزعيم وكبر شنكة الخبز
كلتوله خل يفتر على المناطق التي تسمى بحي التنك ومن امثالها كثيرة
كلتوله خل ايخلي وزراء حسب الاختصاص
مو ايجبنا حداد مال ابواب وشابيك يسويه وزير الصحة
ويجيبنا كهربائي سيارات ويسوية وزير زراعه
ويجبنا خلفة مال بناء ويسويه وزير الدفاع
ويجبنا دكتور اخصائي مجاري بولية ويخليه وزير داخلية
ويجبنا ضابط دمج ويخليه وزير الصناعة
ويجبنا لهيبي وحرامي وشلايتي ويخليه وزير عدل
ويجبنا واحد من اصحاب السوابق وخريج احبوس ويخليه رئيس محكمة التميز العراقي
ويجيبنا واحد مطرب ويخلية وزير الاوقاف
ويجبنا واحد لايفرق بين الفاعل والمفعول به ولا يعرف حروف العلة ويخليه علة على وزارة التعليم العالي
ولا يجيبنا واحد خلص الاعدادية بالدفعات وسحل وبالواسطة يالله نجح ويخليه وزير تربية
كلتوله
يمعود تدري اكو طالب بالسويد استطاع ان يحل رموز مسئلة رياضية ويطلع النتيجة والمسئلة صارلها 300 سنة محد استطاع من العلماء ان يحلها
كلتوله
يمعود ترى اكو طالب في كندا استطاع ان يكتشف خلل في نظام الكمبيوتر الخاص بالجامعة وطردوها من الجامعة لانه طلع اعيوبهم
كلتولة
لا يجيبنا شعيط ومعيط وجرار الخيط ويخليهم وكلاء وزراء
ولا يجيبنا كل من صخم وجه وكال حداد مدير عام بدرجة وزير
ولا يجيبنا واحد لابس زيتوني ويصيح بالروح بالدم نفديك يا صدام ويخلية وزير الثقافة والاعلام
ـ ـ عفية روح ودم ما خلص صار 50 سنة شنو هو دم لو تنكر مال ماي ـ
كلتوله خل يكثرنا نواب مثل الشيخ صباح الساعدي ويقللنا من لابسات العبائات الخليجية لو اشوية ايقللن من هلاهلهن الاعلامية
كلتوله خل يفهم نواب البرلمان ترى الشعب جابهم والشعب يكنسهم
كلتوله خل يفهم الوزراء الكرسي ما ايدوم ترى دودة الارضة متخاف لا من حماية ولا من سيطرات وتاكل الاخضر واليابس وما ينفع وياها الكلوردين
كلتوله من تطلع مظاهرات خل يروح يوكف ويكلهم يا شعب اني ما دبرته وما كدرت اقدملكم خدمات واني مستقيل
كلتوله ترى الفقير من يثور ما يوكفه غير الموت لانه ميت في الدنيا من الجوع والضيم
كلتوله خل ايديرباله على الاطفال وخل ايشوف الشباب ويدبرلهم شغل ويفتحلهم مجالات للعمل
كلتوله اكو شباب باعت الكلية مالتهم وضل بتك كلية على مود يشتري ايباد لو يشتري ايفون 4 لو 5
كلتوله يمعود ترى عيب على العراقي ما عد ابنه بالمدرسة حاسوب والعراق 2 بلد بتصدير النفط
كلتوله ترى دعوات الفقراء تصعد لعنان السماء وتدخل لباب الله دون استئذان
كتوله يمعود تابع امور بلدك ولا ضل امجلبلي بفلان وعلان ولا تعتمد على جيرانك بس نوع صداقتك وي كل العالم المتقدم
كلتوله امشي عليك الحسين لا تستورد سيارات السايبة ومن امثالها
كلتوله يمعود شوف دول الخليج اللهم لا حسد اشلون صارو ووين جانو
كلتوله يمعود اسهر على راحة الشعب ولا تبقى خاتل بالمنطقة الخضراء
كلتوله يمعود خل ايشيل الصبات الكونكريتية من الشوارع
كلتوله خل يفتح الشوارع ويشيل السيطرات التعبانة
كلتوله خل يختار جنود اكفاء ورجال امن مخلصين
كلتوله خل يعدم كل واحد يتعدى على اعراض الناس في نفس المكان خاطر يصير عبرة امثال قضية بنين وغيرها
كلتوله خل اتولي شغلة المخبر السرسري
كلتوله يمعود راجع الدستور وحاول ان تستفاد من خبرة الفطاحل العراقيين الي خارج العراق ناس عباقرة ومن فلتات الزمن ليش تاركيهم
كلتوله يمعود شوف سلم الرواتب وسويله شغلة امرتبة
مو علج المخبل ترس حلكه
يمعودين كلتوله فد التفاته الى الشوارع واحنى اغنى بلد بمادة القير والزفت والله عيب خلف الله على شركة موستكرادينيا اليوغسلافية الي سوت الخط السريع من اطريبيل لسفوان
كلتوله
وصلة شارع من الديوانية للسماوة يسموها طريق الموت ما خلصوها صارلها اسنين

كلتوله خل ايصدر قرار ممنوع لبس اكثر من محبس في اليدين
كلتوله يمعود ترة العراق خرابة والبشر عايش بيها بقدرة رب العالمين
كلتوله خل يلتفت للزراعة ويشوف مصيبة المزارعين
كلتوله خل ايروح لتركيا ويكلهم بوية ليش سديتوا المية علينا مو ماتت الوادم من العطش يردوغان ما اتخاف من الله
كلتوله مو كلشي ايصير بهل بلد راسا اتصيحون فلول النظام السابق وتنظيم القاعدة خل يحققون ويتاكدون
وبعدين يالله يتمنطقون
الحاشية الي بصفك يكعدون




وتاليه واخيرا وفي النهاية
خاف اطبقون المثل الي كال
المطي أمطينا بس أجلاله تبدل

#ماجد_العذاري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات