الحزن علامة صلاه ف القلب

امينة عبد الله

الحوار المتمدن-العدد: 3964 - 2013 / 1 / 6 - 22:35
المحور: الادب والفن
    

روحى
حوامه ف المكان كما ميت
و لحظة خروجها
ما كنتش صعبة
و كنت مرقباها بدقة
لحساب الوقت اللازم
لاتمام رحلتها
و الرجوع بهدوء
روحى كانت اخف من اى توصيف

* * *
كل الليالى
عند المهرج شبه بعضها
الا الليلة اللى عينه بكت فيها بجد
على حبل روحه اللى ما قدرش يمشى عليه

* * *
الوحدة
مش اربع حيطان
انا بينهم
الوحدة كرسى وحيد ف فضا روحي
****


العطش
مش انك ما تشربش
العطش الحقيقى
ف الميه الممزوجة بحزن وحدتك

* * *
طيب
تفتكر ايه شكل الحزن ؟
البكا مثلا
على وحدتك وسط اصحابك
او حفلة التأبين اللى م حضرهاش حد
- ولو للذكرى -
طيب
لو مش هو البكا ؟
ممكن يبقى.....؟
* * *
ح يكون
مرجوعنا للمخزون
و الكلام عن ذكريات محفوفة بالخطر
لما اتسولت روحك لحظة ما عطشت
مروا عليها بعملة مخرومة
عشان الذكريات تعدى بشويش
و ما تحصلش ازمة ضميير لحد
ويكون مرجوعى
لنفس الفكرة المسيطرة علي
احنا ليه رخاص عندك يا رب ؟

#امينة_عبد_الله (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات