ميشيل بطرس - أبو قانا

وليم نصار
مؤلف موسيقي ومغني سياسي
(William Nassar)

الحوار المتمدن-العدد: 3958 - 2012 / 12 / 31 - 11:03
المحور: الارهاب, الحرب والسلام
    

إلى صديقي ميشيل بطرس .. الرائد في الجيش العربي السوري .. الذي استشهد البارحة في حلب . دفاعا عن وحدة سورية.

لما البطل جابوه .. محمول عالاكتاف ..
الرصاص عبى السما ... وناس تلم الناس ..
والورد فوق الجبل ... مندور للحراس..
يل عم يحمو الوطن ... ويحمو عيون الناس



صباحك سوري يا ميشيل ..
مساك عابق بالعز.. يا أبو قانا ..
سنينك نصر يا صاحبي .. النصر الطالع من كل نقطة من دمك زينت حيطان حلب تتبعت ريحة عطر للشام ..

اليوم طول النهار عمجرب اكتبلك .. ما كان يكتب القلم .. حتى البيانو ما طلع صوتو لمن عرف إني عمابكيك ..
البيانو كان بارد اليوم يا أبو قانا ..

أديش رح تفتقدلك آلة البزق يل كانت تبكي عصابيعك ..

رشو الورد .. يا صبايا .. رشو الورد مع الياسمين ..

حبيبي يا ميشيل .. اليوم بالكافتيريا .. انا وعماشرب قهوة .. الناس كلا كانت عم تضحك وأنا الوحيد في دمعة بعيني مش رضيانة تنزل ...
صدقني مش زعلان انك استشهدت كرمال سورية .. سورية يل ظلمتني كتير وظلمتك أكتر .. زعلي كلو إني بس اطلع على ضيعتك رح بعرف إنك مش موجود بالضريح لانو ما بقي منك شي ..

على شو بدي حط زهرة توليب حمرا يا صاحبي .. على قبر فاضي؟

تزكرتك لمن قلتلي قبل كم شهر وقت كنت عماحكيك يل بقلبي عن هيداك الصاحب ... قلتلي وقتا إنك ما بتآمن بالمثل يل بقول "البعيد عن العين بعيد عن القلب" ... قلتلي وقتا هيدي حجة عديم الوفا ...

إنت الوفا كلو يا ميشيل .. من سنة 1982 .. من وقت كنا فريخات وكانو أهلك ساكنين ببيروت قبل ما يغادروها بسبب الاجتياح .. لسنة 2012 .. ما التقبنا غير 6 مرات .. وكل مرة كان اللقاء كأنو ما افترقنا أبدا ..

كل مرة كنا نحكي نفس الحديث .. كيف خلينا دبابة اليهودي عالمتحف تطير متل البرغشة ....
هل رح يبقى حدا يطير دبابات اليهودي؟

ميشيل يا صاحبي وحبيبي .. يا أجمل شيوعي ..
دمك برقبة اسماعيل هنية .. وخالد مشعل .. وفتح .. وكل تنظيم فلسطيني داعم للارهابيين بسورية ...
دمك برقبة كل شعوب الخليج ... من الأمير للشحاد ..
دمك برقية كل شيوعي لبناني .. مفرشح .. وحاطط إجر بالفلاحة وإجر بالبور.
دمك برقبة كل سوري قومي إجتماعي ما بيعرف من تحيا سورية غير إنو يكتبا عالفايسبوك ...
دمك برقبتنا ... نحنا يل ما عرفنا نزلزل الأرض تحت إجرين الطغاة ..

غيابك بهالطريقة كتير قاسي ..
سلام عليك يوم ولدت .. ويوم استشهدت .. ويوم تبعث حيا ..

صاحبك دائما وأبدا
وليم نصار

#وليم_نصار (هاشتاغ)       William_Nassar#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات